MATEO 17
17
Jesús shuctaclaya tucushcamanta
(Mr 9.2-13; Lc 9.28-36)
1Sucta punzha quipami, Jesusca Pedrotapish, Jacobotapish, paipac huauqui Juantapish pushashpa, shuc jatun urcuman rirca. 2Chaipimi Jesusca paicunapac ñaupapi shuctaclaya tucushpa, ñahuica inti shina jagan nicuc, churanaca luz shina yurac achicyachicuc ricurirca. 3Chaipimi Moisespish, Eliaspish, Jesus-huan parlanacucta ricurcacuna. 4Chaimantami Pedroca Jesustaca: «Apunchic Jesús, ñucanchicca allimi caiman shamushcanchic. Can munacpica, quimsa chucllata ruhuasha, shuctaca canman, shuctaca Moisesman, shuctaca Eliasman» nirca.
5Pedro rimacucpillatacmi, yuranlla puyu paicunata taparca. Chai puyu ucumanta rimashpaca: «Caimi ñuca cuyashca Churi. Paimi ñucataca cushichin. Paita uyanguichic» nirca.
6Yachacuccuna chaita uyashpaca, manchaihuanmi pambacaman cumurirca. 7Chaimanta Jesús cuchuyashpa, tuparishpaca: «Jatarichic, ama mancharichicchu» nirca.
8Paicuna jatarishpaca pitapish mana ricurcachu. Chaipica Jesusllami cashca carca.
9Jesús yachacuccunahuan urcumanta cutishpaca:
—Cai ricushcataca Runa Tucungapac shamushca huañushpa, causaringacaman paimanta ama huillanguichicchu— nishpami mandarca.
10Chaimanta yachacuccuna Jesustaca:
—¿Imamantatac mandashcacunata yachachiccunaca: “Eliasracmi shamunga” ninyari?— nirca.
11Shina nicpimi Jesusca:
—Ari, Eliasracmi shamunga. Pai shamushpami, tucuita allichinga. 12Shina cacpipish ñucaca: Eliasca ñami shamurca. Paita mana ricsishpami piñashpa, paicuna munashcata ruhuarca. Shinallatacmi Runa Tucungapac shamushca ñucapish, paicunapac maquipi llaquita apana cani— nirca.
13Jesús chashna nicpimi, yachacuccunaca Bautizac Juanmanta parlacushcata entendirca.
Supai japishca huambrata Jesús alliyachishcamanta
(Mr 9.14-29; Lc 9.37-43)
14Jesús achca gentecunapacman chayacpi, shuc runa paipac ñaupaman shamushpa, cungurishpaca:
15—Apunchic Jesús, ñuca churita llaquiyari. Paica yuyaita chingachishpami yacupi, ninapi urmashpa, llaquita apacunlla. 16Cambac yachacuccunapacmanca, ñami apamushpa ricuchircani, ashtahuanpish mana alliyachi pudircachu— nirca.
17Chaimantami Jesusca:
—¡Aij, mana cric millai gentecunalla! ¿Ima horacamantac cancunamanca yachachicushalla? ¿Maicamantac cancunahuanca llaquita apacushalla? Huambrata pushamuichic— nirca.
18Pushamucpica, Jesusca sinchita rimashpami, huambramanta supaitaca llucchishpa cacharca. Huambraca chai ratollatacmi alli tucurca. 19Chaimantami yachacuccuna Jesusta pacalla tapushpaca:
—¿Ima nishpatac ñucanchicca supaita mana llucchi pudircanchic?— nirca.
20Shina nicpimi Jesusca:
—Cancunaca, mana tucui shunguhuan cricchu canguichic. Cancuna crishca shuc uchilla mostaza muyu shinallapish cacpica, cai urcuta “caimanta chimbaman ri” nicpica, rinmanllami. Chashna ashallatapish cric cashpaca, imapish ruhuanguichicmanmi. Chaica chashnatacmi can. 21Cai shina supaicunataca ayunashpa, Diosta mañashpallami llucchina— nirca.
Jesús huañunata cutin huillashcamanta
(Mr 9.30-32; Lc 9.43-45)
22Jesusca paipac yachacuccuna Galilea llactapi cacpimi, paicunataca: «Runa Tucungapac shamushca ñucataca, runacunaman japichingacunami. 23Paicunami ñucataca huañuchinga. Shina huañuchicpipish, quimsa punzhapica causarishami» nirca.
Chaimantami yachacuccunaca munai llaquirirca.
Diosta mañana huasimanta impuestota cushcamanta
24Jesús Capernaúm puebloman chayacpimi, Diosta mañana huasimanta impuestota japiccuna Pedropacman cuchuyashpaca:
—Cancunata yachachicca, ¿Diosta mañana huasimanta impuestota paganllachu?— nishpa tapurca.
25Shina nicpimi Pedroca:
—Ari, paganllami— nirca.
Pedro huasiman chayacpi, Jesús tapushpaca:
—¿Simón imatatac yuyangui? Cai pacha jatun mandaccunaca, ¿paicunapac llactacunamantachu, mana cashpaca, shuctac llactacunamantachu impuestotaca chasquincuna?— nirca.
26Shina nicpimi Pedroca:
—Shuctac llactacunamantami chasquin— nirca.
Shina nicpimi Jesusca:
—Shinashpaca, quiquin llactapi causaccunaca mana paganachu canchic. 27Ashtahuanpish impuestota japiccunata mana piñachingapacca, cuchaman ri. Chaiman chayashpaca, anzuelota shitangui. Punta japishca challua shimipimi cullquita taringui. Chaita canmantapish, ñucamantapish impuestota cungui— nirca.
Currently Selected:
MATEO 17: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.