3 JUAN 1
1
Saludashcamanta
1Criccunata pushac ñucami, tucui shunguhuan cuyashca Gayoman cai quillcata quillcani. 2Cuyashca Gayo, ima shinami Diospac ñaupapi alli cangui, shinallatac cambac cuerpopipish tucui imapipish alli cachunmi, Diosta mañani. 3Maijan criccuna shamushpa “cashcata nic huillashcata uyashpa allimi caticun” nishpa canmanta huillacpimi, ñucaca yallita cushicurcani. 4Ñuca huahuacuna cashcata nic huillashcata uyashpa, alli caticucta yachashpami, tucuimanta yalli cushicuni.
Gayo alli chasquic cashcamanta
5Cuyashca Gayo, criccunaman shinallatac shuctac llactamanta shamuccunaman imata ruhuacushpaca allitami ruhuacungui. 6Paicunami can ima shina cuyaita charishcataca tandanacushca criccunapac ñaupapi huillarca. Paicuna ashtahuan Diospacta ruhuashpa purichunmi, imallahuan ayudashpa catichun mañani. 7Paicunaca Jesucristomanta huillangapac llucshishpapish, mana criccunamantaca ima ayudata mana chasquircacunachu. 8Chaimantami ñucanchic criccunaca paicunata imallahuan ayudashpa, cashcata nic alli huillaita huillanata ayudana canchic.
Deotrefesmantapish, Demetriomantapish
9Ñucaca tandanacushca criccunamanmi shuc quillcata quillcarcani. Chashna quillcacpipish, Deotrefesca mandac casha nishpami, ñucanchic yuyaita cushpa quillcashcataca mana chasquisha nirca. 10Chaimantami ñuca rishpaca, ñucanchicmanta huashalla parlashpa, llullashpa puricucta yuyachishpa rimasha. Maijan criccuna pozachichun nicpipish, mana chaquisha ninchu. Shinallatac criccunata chasquishun niccunatapish, jarcashpami tandanacushca criccunamanta llucchishpa cachan.
Demetrio allita ruhuashpa ricuchishcamanta
11Cuyashca Gayo, chashna mana alli ruhuaccunataca ama catinguichu, ashtahuanpish allita ruhuaccunata catingui. Maijanpish allita ruhuacca Diospacmi, ashtahuanpish mana allita ruhuacca Diosta mana ricsinchu. 12Demetriomantaca pai ruhuashcacuna alli cashcamantatacmi tucui mashna alli nincuna. Ñucanchicpish pai ima shina cashcataca huillanchicmi. Ñucanchic huillashca mana llulla cashcataca, cancunallatac yachanguichicmi.
Ña tucuchingapac “allilla causangui” nishcamanta
13Ñucaca achcatami canmanca nisha nini. Chashna cashpapish tintahuan, plumahuan quillcashpallaca mana nisha ninichu. 14Ashtahuanpish canhuan ñahui ñahui cangapacmi, utca shamusha nicuni. Chaipimi ashtahuan parlanacushun.
15Sumac causaita charichunmi munani. Cambac ricsishcacunapish cantaca “allilla causangui” nishpami cachancuna. Ñucanchic ricsishcacunatapish shucllancaman “allilla cashca cachun” ninguiyari.
Currently Selected:
3 JUAN 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.