Ta je Vejec 16
16
1ÛNYI bi ge at hna penapena hnyok:
Ke ûnyi ga Iehova bi he ka thu ge bohmen.
2Haba ta je gethen hia deny at, me ka so bi kâu:
Ke haba Iehova ame tuluto ta je hanu.
3Hna but ânyâm ta je huliwa kö Iehova,
Kʼ ame he ka tethmâ hnâm je hna ûnykûme.
4Iehova ame op ta je ûnyi hia he ka ve hu hanymen:
Eke, me at minya ae kong hobi kâu bong ae kong.
5Hmiö Iehova tavat hia adre me bi gan:
A ne he ke at ka ihok beny me ke at, me ame ca he ka ba hwaban.
6Ame he ka hneû degecâ hulo hnen ibetengiö me hnathu:
Kʼ ame he tavat ka hota hulo ge ot kö Iehova.
7Ame ne osenyini Iehova ge je gethen deny at
Me e ame oûsoköuâ e me je iwahnaihmiöny mē.
8E so e ûhnyûkong hna tren, tha e me hwakecin ae wisa,
Hon je troban ae gan hmâ, a tha e me hwali bi.
9Haba hnyekon at, me ame ûnykûme deny gethen:
Ke Iehova ame muso hnen ta je hna okca.
10E beönua hofuc hnyi hnyimen than:
Ame ca he hnyimen ka hanyâûâ hnyi hna owisa.
11Haba tulut ke tulut uhni ae wisa, me li ûnyi anyi Iehova:
Anyin bi huliwa ta je fao hnân tulut eû hnyin tang.
12E ikiki hwakecin je than adre me ne ânyâ hulo:
Anyin ame tethmâ theron hnen wisa.
13Ame senyinâ je esongot ae wisa hnen je than;
Ke adre me betenge ge at ame ha hofuc ae wisa.
14Haba hmonyin anyin than, me helâ me je uthumetu adre me mekiny:
Ke ame he at ae metâ ka omenyikâ e.
15E bi möt hnyi melaminy hnyimakan than;
Ke haba anyin betenge me helâ me ûlâiny we a biliny.
16Shaiba ge soiny hom metâ hon gol!
Eke, e so he ka hu wâhmakhmeto hon he ka hûce sileva.
17Haba hna cit gethen deny at ae wisa, me ame saû ûnyi ge hulo:
Haba at ame tuö deny gethen, me ame omelo hanon.
18Ame bân bi gan, ke biliny bi hnaûhango,
Ke ame bân hnyok ae hop, ke biliny bi he ka ta.
19E so he ka hnyok hnyikânâ tha e me tavat ae ilemuk,
Hon he ka tha khenâ je hna söh me tavat bi gan.
20Haba at ame long hoton hofuc me ame he ka wâ so:
Ke hnahic bi at ame labageju kö Iehova.
21Haba tavat ae tren hnyok ae metâ, me adre me he ka ha me tavat wâ wia.
Ke haba hnebwiainy li esongot, me ame bi hanen metâ.
22Haba wâhmakhmeto, me wale pupuainy möt ka at ae hu e:
Ke haba hwen monu anyin tavat ae monu, me ame nʼ ödra bi.
23Haba hnyekon at ae metâ ame nâ hnyi men,
Me bi hanen ûne ka li esongodiny.
24Haba hofuc ae kese, me helâ me hani adre tiga ca hlec,
Ae hnebwia ka hnyi hanu, me möt ka hnyi je jeien.
25E hu gethen ae wisa hnyi ûnykûmenen at,
Ke haba obiny e, me gethen deny mok.
26Haba behan jeû ge at huliwa me ame huliwa hobi kâu:
Anyin a hnyimen ame ûjengoâ e.
27Haba at ae ûnyi baû, me ame vak ûkonguny:
Ke e hnyi hnyimen meic ame an.
28Haba at ae hwali, me ame tā iwatretra:
Ke haba at ame ûhaiö me ame oûsâkâûöâ tavat me lawaedra.
29Haba at ûokonguny, me ame cubec waeny,
Me lelö e ka hnyi gethen ae ca so.
30Haba at ame mook, me ame ûnykûme ta je ûnyi ae hwali:
Ke ame oâ hulo hnen at ame obuhlumo li esongodiny.
31Korona ae hmanenang ûhûen,
Kʼ adre me he ka wâ e hnyi gethen deny wisa.
32E nua at ame bec he ka hmonyin, hon at ae hwege;
Ke nua at ame muso hnyekon hon at ame hûgûnâ taun.
33Adre me khûâ leköp ka hnyi hon li jevan,
Ke hamö Iehova he ka muso hia.
Currently Selected:
Ta je Vejec 16: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society