Numera 25
25
1KE haba at Isaraela adre me labā Sitima, ke ame hwân tavat he ka bi unyi monu me omomoiny Moaba: 2anyin adre hawâ tavat he ka hnyi bi hut ka anyidra je khong; ke haba tavat adre me hnyi han me khudrung ka anyidra je khong. 3Ke haba at Isaraela adre me ûkhacaköu unyi Baala-peora: me ame ubâhlâ thö hmönyin anyi Iehova ka at Isaraela. 4Ke haba Iehova ame ha kö Mose, ka habe, Hom dö je taben tavat hia, me uhno döi ödrin hnyi hnyimakö Iehova, me me hmetu je hmönyin ae gan anyi Iehova ûheny unyi at Isaraela. 5Ke haba Mose ame ha ka tavat owisa unyin at Isaraela, ka habe, He thʼ öbun ka ve hlingâ tavat unyibun adre me tha ödra me Baala-peora. 6Ke wa bi, haba ke at Isaraela ame hom ke momo Midiana ka je liamekeiny mē, hnyi hnyimakö Mose, me hnyi hnyimakan ûkhacaköu anyin lakon Isaraela hia, ödra adre me tenge hnyi hwanumen uma ûkhacaköu. 7Ke a wâ e hnö Fineasa, nöku Eleazara, a nöku Arona at bihut, me e ame todrö hnyi ûkhacaköu, me hom ö hnyi hnyamen; 8me e ame he hoton at Isaraela eling ka hnyi hak, me dâoâ li hnyekudru, wale at Isaraela me momo. Me ame todru mok ae cap unyin lakon Isaraela. 9Ke haba tavat a mokcu ge mok ae cap, me ödra twente foa thauzan.
10Ke Iehova ame bi kö Mose, ka habe, 11Haba Fineasa nöku Eleazara a nöku Arona at bihut ame hia but wia anyik hmönyin ûheny unyin lakon Isaraela, hnyi hnen hna ciâ gak hnyi wanbödra, mʼ oge me ca ohia lakon Isaraela hnyi hnok hna ciâ. 12Anyin a wale ha thö, ka habe, Wâ bi, inya oge me ham anyik ûhihinyköuiny ûsoköu: 13kʼ ame he ka e bi unyin, me je mâtrâniny a hwaban, me me ûhihinyköu he ka at bihut nyiele balua; anyin a e ame ciâ ge Khongon, me bi hwaban möt anyin lakon Isaraela. 14Ke haba ien at Isaraela adre hlingâ, wale at adre tha hlingâ me momo Midiana, me Zimeri, a nöku Salu, thaniny lap anyin ke kamen unyin at Simeona. 15Ke haba ien momo Midiana adre hlingâ, me Kozebi, nöku Zura; ke haba baga eling, me taben ke lap anyin ke kamen hnyi hnyei Midiana.
16Ke Iehova ame ha kö Mose, ka habe, 17Ovecâ at Midiana, me kuc ödra: 18anyin adre me oveci öbun hnyi hnödra hna bi joniny, waleji adre bi jönibun hnyi ûnyi anyi Peora me ûnyi anyi Kozebi, a nokon thaniny Midiana, a hanidra, waleji adre hlingâ hnyi bong bongon mok ae cap can ûnyi anyi Peora.
Currently Selected:
Numera 25: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society