Josua 2
2
1KE haba Josua nöku Nuna ame kunâ duöngâ ûheny Sitima li at he ka ecmak, me ha, ka habe, He thö ka wâ hnyei, me Jeriko. Me ödru me he me o ka hnyi uma umen momo hnyi gethen, Rahaba ien, me mokut eling. 2Me adre me thumeto thaniny Jeriko, ka habe, Wâ bi, ame he jem li at eja hnyinghet ûheny unyin lakon Isaraela, he ka ecmâkâ hnyei. 3Me haba thaniny Jeriko ame ûkhûnöng kö Rahaba, me ha, ka habe, Hom but jem li at a o köu, wale ödra dit ka hnyin umâm uma; anyin a ödre o he ka ecmâkâ hnyei. 4Ke haba momo ame hom li at me ikhölʼ ödru; me haingen, ka habe, E hnathu a o könya li at, ke ca khanö nya dok ödre mwi hnyin: 5ke haba hnyi ûen adre me he ka hlöng homagöule hnyi lit, me ame didrut li at, ke ca kbanö nya dok ödre me he ka hnyin: tiga wadring hotudra anyin a öbun e he ka kot ödru. 6Ke a hia but momo hum ödru ka hnyi hon ban uma, me tubi ödru ge je thi lino wale e ame ip gaga ethö hnyi hon han uma. 7Ke haba tavat ödrin e wadring hotudru hnyi gethen deny Joridano, ke ne o but hnyi je dok ae cöcö: ke adre me ie hlöng homagöule hwaban hna didrut tavat he ka hnu hotudru. 8Ke ödru tiga ca mokut, me momo ame ölö thö ködru ka hnyi hon ban uma; 9ke e ame ha ka li at, ka habe, E khanö nya a Iehova ame ham köbun hnyei, ke a o but kohmun ot gabun, kʼ ame aû but aten hnyei hia thithö hnyi hnyimaköbun. 10Ke öhmun e hia but long a Iehova ame ohmö köien Köiö ae Dra i hobi köbun, hnyi ûen öbun e he jem ûheny Aigupito; ke hnöbun minya hna ânyâ ka li than Amora hnyi hoton Joridano, a Sihona, me Oga, waleji öbun e ohia. 11Ke öhmun e long e, me ame köiö but je hnyekuhmun, ke ba hmetu tang hwege eû hnyi hnyekon ke at, cabun: anyin a Iehova Khongubun me e thibi Khong ethö hnyi drany, me eang hmelen. 12Ke walang ang ö öbu khemanyin könya hnyi iö Iehova, a öbu me be ka betenge ge lap anyi cica helâ me oge me betenge gabu, ke ham könya haten ae hnathu: 13ke omeli cica, me bai, me lahanik, me je liamekeiny mönya, me ta je ûnyi hia unyidrin, ke: omeli öhmun, mʼ öhmun e ca he bi ka mok. 14Ke ame thu ka momo hnen li at, ka habe, Öhmu me he ka mok hwaböbun, öbun e ne ca he ka omanenâ ûhemnu eang; ke e ka āt bi a gʼ ame he Iehova ka ham kohmun hnyei; me öhmun e he ka ânyâ hwakecin ae betenge me hnathu köu. 15Me e ame öû ödru ge tö ûheny hnyi mamalama: anyin a umen uma, me ethö hon haginy taun adre up, ke e ame laba hnyi hon hna up haginy. 16Ke e ame ha ködru ka habe, Kec dʼ öbu ka hnyi bucen, wâ e nye ûkhanö möbu tavat ûhnûhnû; me öbu me lubaduöng eling hnyi kun ta bong, ke ne o but ame hmetu tavat ûhnûhnû: ke hwa ban e, mʼ öbu he thö. 17Me ame ha kâu li at, ka habe, öhmu me he ka gufa hnyi hna khemanyin eang u me kunʼ öhmun hnyin. 18Wâ bi, öhmun ka e hnyi hnyei eang, hamâm he ka hûkâlâ tö ae dra eang hnyi mamalama u je hnʼ ohmu hnyin: ke u me he ka ûkhacaköuâ unyâm e hnyi hnyabam eang kâmâm me hinyâm, me je liamekeiny mou, me lap hia anyin kâmâm. 19Ke haba at ame he ka dit kâû ka hnyi gethen ûnyi hnyi hwanumen umâm uma, me ame he ka takoû ban ge dren bi, ke öhmu me he biju ka gufa: ke haba tavat a tha e möu hnyin uma, ame he ka takoû böhmu ge drödrin, e ka hu at ame he ka hinöbeny ködrin. 20Ke so bi, u je ne omanenâ ûhehmu eang; me öhmu me he ka gufa hnyi hna khemanyin u je kunʼ öhmu hnyin. 21Me haingen, ka habe, Ame he ka helâ me hnöbu hna ha. Ke e ame kunʼ ödru, me ödru me he: me e ame hûkâlâ tö ae dra hnyi mamalama. 22Ke ödru me he but me o ka hnyi bucen me laba eling hnyi kun ta bong, ke ne o but ame hmetu tavat ûhnûhnû: ke adre elöm ödru hnyi gethen hia ge tavat ûhnûhnû, me ödrin e ca wâ bi. 23Ke ame hmetu li at, me utut ûheny hon bucen, me hanyâûâ me o unyi Josua nöku Nuna; me ödru me thumeto e ge ta je ûnyi hia a o ködru, 24Ke ödru me ha ko Josua, ka habe, E hnathu a hia but Iehova hna kötin hnyei hia; he haba khaca ame köiö hnyekon tavat hia thithö a aten idra hnyei, ûnyi gata.
Currently Selected:
Josua 2: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society