Isaia 26
26
1HNYI bong eling adre me he ka sit khumöng ang hnyi hnyei Juda, ka habe, E hu but gata taun ae hwege; e ame he ka otilâ ûhomeli hnân hak me singiny. 2Khong ut je homagöule me me didro hnyei ae wisa, a at ame tuö hnathu. 3U ma he bi ka tuö hnyi hnahic ie bekhot at ame tethmâ hnyok unyâm: anyin a e ame labageju köu. 4Labageju thö kö Iehova nyiele balua: anyin a haba Than Iehova, me kic nyiele balua. 5Anyin a e ame hia but öüo tavat adre me laba ethö, wale taun ae gorany: e ame ohnyikânâ e, me othahonâ e me sesâ. 6Kʼ adre me he ka ututo e ge ca; a je can tavat ae theduoc, a je can tavat ae ba ta ûnyi. 7E wisa gethen deny tavat ae wisa: u thibi at ae wisa ke u je okhabalaûâ gethen deny tavat ae wisa. 8Eke, Iehova lö, hnyi gethen deny hnâm je hna owisa, öhmun e hia but halubahingâm; ke weny je hnyekuhmun ka iâm, ke he ka ûnykûmi u. 9Ame weny u ge hnyekuk hnyi hnyinghet; eke, oge me he ka elelöm u ge hanuk eû hnyi hnyekuk; ke wale but ang hnyi hmeledrany hnâm je hna owisa, waleling me me he tavat adre me laba hnyi hmeledrany ka nâ hwakecin ae wisa. 10Eja ke ne adre ne betenge ge at ae kong, me ame ca he ka nâ wisa; kʼ ame he ka ânyâ hwakecin ae hwali hnyi hnyei ae wisa, kʼ ame ca he bi ka wâ hmâ hmanenangi Iehova.
11Iehova lö, e gorany hnyamân, kʼ adre me ca wâ bi: ke so bi adre me he ka wâ wem ae gan hmâ ka tavat, mʼ adre me be ka hmehma bi; eke, ame he meic ka an ta je iwahnaihmiony möu. 12Iehova lö, u me he ka otilâ ûsoköu hobi kohmun: anyin a u je hia but ânyâ hobi kohmun anyihmun ta je huliwa hia thithö. 13Iehova Khonguhmun lö, adre hia but musi öhmun hnen ke je than minya; ke hake u ke thibi, mʼ öhmun e he ka ogânâ iâm. 14Adre mokcu, adre me ca he bi ka möt; ödra ta je komok, adre me ca he ka tot hmetu: anyin a wale u je hia but senʼ ödra me ohiʼ ödra, me tha ohia hna ûnykûme gadra. 15Iehova lö, u je hia but osehiâ hnyei, u je osehia hnyei; adre hia but oganö u: u je oc ûsâkâûöâ je hnyigöuleny hnyei hia.
16Iehova lö, hnyi ûen vec adre hia but senö u, adre me hingâlâ hic, u ka hom ûhnyûkongu ödra. 17Haba momo ame he ka o erkin, me ame vec ke ame kuku ge vec; helâe gahmun Iehova lö, hnyi hnyimâkâm. 18Öhmun e helâji me erkin, öhmun e vec, me oâ thibi ang; öhmun e ca bi melen tavat; ke adre me ca kolu hi tavat adre me labā hmeledrany. 19Ame he ka möt hmetu ta je kokâm; ame he kʼ tot hmetu ta je kokik. Hmak dö, me khumöng dʼ öbun tavat öbun e laba hnyi sesâ: anyin a helâ me dân hau hon ûö ae ometu dân ânyâm hau, ke ame he kânâ ka oâ ta je komok.
20Aiö u, ik hnyei, didro ka hnyi je hnyeulem, ke hlöng ju hwanuma hwabâm: ke ikhölö ju helâ me thuthubadecmak ke ne o but ame hia but hmonyin, 21Anyin a wâ bi, ame he Iehova ka he ûheny hnyi hnen hna laba, he ka bi hwaban hulo anyin tavat adre me labā hmeledrany: ke ame he hmeledrany ka omanenâ dren e, ke ame ca he hmetu ka tube ta je hna hlingâ.
Currently Selected:
Isaia 26: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society