Esetera 3
3
1KE hwaban ta je ûnyi e haba Asueru than ame oganö Hamana nöku Hamedatha at Agaga, me ogöranyâ e, me ip taben tap hon taben je than hia unyin. 2Ke haba lathnyabainy than a ödrin hnyi homagouleny than, me ödrin e labö nom, me iyâû kö Hamana; anyin a than ame hûna helâe gan. Ke haba Modikai ame ca nom me iyâû kâu. 3Ke haba lathnyabainy than a ödrin hnyi homagouleny than, ödrin e ha kö Modikai, ka habe, Ieû gam u me hanyâûâ hnanyibu anyin than? 4Ke ödrin e ha kâu hnyi ke bong me ke bong, ke ame ea ling ödrin, mʼ ödrin e thumetu Hamana, me me manen bi a gʼ ame tethmâ la bongu Modikai: anyin a e ame thumetu ödrin a e at Juda. 5Ke a wâ Hamana a Modikai ame ca nom, me iyâû kâu, me Hamana ame unöngöt ge hmonyin. 6Ke ame höcö he ka hake hlingö Modikai; anyin adre hia but omanenâ kâu hnyei i Modikai: anyin a wale Hamana ame heleû deny he ka ohia at Juda hia thithö a ödrin hnyi je ke keihen hia dokhu dokhu Asueru, wale hnyei i Modikai. 7Haba hnyi tehi a bân, wale tehi Nisan, hnyi huna a twelviny musi anyi Asueru, me ödrin e ânyâ Puro, wale ugleköb, hnyi hnyimakö Hamana hnyi ke bong me ke bong, me ke tehi me ke tehi, ke ne o but hnyi tehi a twelviny, wale tehi Adara. 8Ke haba Hamana ame ha kö Asueru than, ka habe, E hu tavat adre me vese me ve laba hnyi je hnyei a je ke keihen hia hnyi dokhom dokhu; ke e ke anyidrin je hnanyibu me ta ogo hnyei hia thithö; ke ödrin e ca ânyâ je hnanyibu anyin than: anyin a wale e ca ûcû bi ka than he ka hokhnyoki ödrin. 9Awe, ame ne so ka than, me so adre me sihnalimen mʼ adre me ohiʼ ödrin; ke hamök bi he ka ham ten thauzan je talan sileva ka hnyat adre me ânyâ huliwa anyin than, mʼ adre me hom e ka hnyi tang omjehen than. 10Ke haba than ame uny jut wen banyen me ham e kö Hamana nöku Hamedatha at Agaga, at ame bi iwahnaihmiony me at Juda. 11Ke haba than ame ha kö Hamana, ka habe, Adre hia but ham köu sileva, me tavat minya, mʼ u me ânyâ ködrin helâ me wem. 12Me adre me hawâ tavat sihnalimen anyin than hnyi bong a thötininy tehi a bân, me adre me sihnalimen helâ me hnö Hamana hna hûna ka tavat musi ae beönua anyin than, me je gavena hnyi je ke keihen hnyei, me tavat muso je hnyei; ka ke ke keihen me ke ke keihen hnyei helâ me hna sihnalimen, me ka ke hnyei me ke hnyei hoton hwan je hnyei; ke adre me sihnalimen hnyi iö Asueru than, ke adre me ohmâ haten hnen wen banyen than. 13Ke adre me kunâ tavat wadringâ je tusi ka hnyi je ke keihen hnyei iny than, he ka ohia me hlingâ, me oba at Juda hia thithö, tavat ae ûhnyûkong me wahingat, me ta je wanakat me omomo, hnyi bong a khaca, wale hnyi bong a thötininy tehi a twelviny, wale tehi Adara, ke adre me he ka söh anyidrin ta je ûnyi. 14Ke haba hna oc onyen tusi, adre me kunâ ka hnyi je hnyei, mʼ adre me he ka omanenâ hnanyibu hnyi je ke keihen hnyei, mʼ adre me he ka laba penapena hobi kâu bong eling. 15Ke ame ie he but tavat wadring ge hna hûna hnen than, ke adre me omanenâ hnanyibu hnyi Susani hnyaban than: ke haba than me Hamana ödru me tha laba he ka ic; ke ame hlohlo but taun Susani.
Currently Selected:
Esetera 3: IAAI
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society