Vilipia 2

Anycik ol do̱o̱k kalac Ye̱su̱ Ki̱ri̱sto̱

1Anyaha baizi cunno̱ng ngati Ki̱ri̱sto̱ zoz ci i̱lo̱ttu̱ niga ol de̱de̱? Anyak rezinet cinne zoz ci irezzu niga ol u̱gge̱ de̱de̱? Anyakku niga de̱de̱ wowonet ki Vongiz? Anyakku i̱rrke̱ne̱t zi̱nze̱tti̱nne̱ cuggo̱k de̱de̱? 2I̱yo̱ko̱ zin, ming e̱e̱ggi̱n zo̱zo̱wa̱ ne̱ko̱ de̱de̱, katalne zin anna oroot eci niga ogonnu ki anna, anyakku rezinet ci kanyai anna ko̱, aavtte zi̱nze̱tti̱ cuggo̱k nga̱to̱de̱ ki li̱ngli̱ngo̱n ci ogonnu niga ko̱. 3Ma anyakku meder icima zoz ci odongnyu e̱le̱tti̱, abarik izet ol cik gununik kar aanycik ol u̱gge̱ kizeto riile kommogit e̱le̱tti̱ cuggo̱k. 4U̱zu̱tte̱ nogo ki ming azunnu niga e̱le̱tti̱ cuggo̱k ko̱.

5Abunna ming anyakku i̱no̱ni̱ go̱o̱le̱ ci i̱no̱nnu̱ Ki̱ri̱sto̱ Ye̱su̱ ko̱:

6Een bali Ki̱ri̱sto̱ Ta̱mu̱ta̱dde̱n de̱de̱.

Iróng zin bali enne atubuz ele cinne ki Ta̱mu̱ta̱dde̱n.

7Abarik utungek enne kaal do̱o̱k lo̱o̱c, a̱vvu̱ enne gaganiko

kar kize abarik du̱ca̱i̱t,

a̱rri̱ta̱i̱ ku̱tu̱gu̱ kiwagon e̱e̱ti̱ ci diiri ko̱.

8Ogon bali enne ki e̱e̱ti̱ ci diiri,

obodane enne ele cinne

kar kelema daiz rok keete wa een ta̱la̱ke̱c!#2:8 Ta̱la̱ke̱c: Ododek olli Romi ol ta̱la̱ke̱c ci een keet abunna ming edez u̱ce̱zi̱ e̱e̱t idic idic zee ka̱da̱k e̱e̱ti̱.

9Kar zin Ta̱mu̱ta̱dde̱n kaanyik Ki̱ri̱sto̱ nginti aave ta̱dde̱na̱,

kar zin kakatek nonno zar cik ommog cik ollu do̱o̱k.

10Imma zin zare cik Ye̱su̱,

akannek ol do̱o̱k u̱zu̱ngtti̱ lo̱o̱c,

ol ne̱k aavtte ta̱mu̱-kenga, ki cik aavtte lo̱o̱ta̱, ki cik aavtte lo̱o̱ta̱ ecito todowai,

11kar ol do̱o̱k u̱tu̱ge̱tti̱ne̱ cigge̱k kizeto ne, een Ye̱su̱ Ki̱ri̱sto̱ Manyi, imma zin zo̱ze̱ necu

a̱di̱ngdi̱nga̱n nege Ta̱mu̱ta̱dde̱n Baba.

Atalanyit kiwagon munyunya

12Gonogga wak zinino, gon ba̱li̱ye̱ ming kaavtte ki i̱ge̱t ojonun, o̱ngo̱o̱li̱nnu̱ niga Ta̱mu̱ta̱dde̱n odohize. I̱yo̱ko̱ zin kaave anna reena, abunna zin ming o̱ngo̱o̱li̱nnu̱ oroot. Abait zin go̱o̱le̱ ci amudannu niga ti̱ri̱ze̱ne̱t ko̱ ngo̱li̱nta̱ ki baritona, 13eci Ta̱mu̱ta̱dde̱n ci a̱li̱ngli̱ng baize cunno̱ng kar ka̱a̱nyu̱ng zinin ci ogonnu kaal cik abunna ki ming a̱du̱wa̱ zoz cinne.

14U̱tu̱gu̱z kaal do̱o̱k ju̱rru̱m ki̱zzi̱ rok zoz ci adangonu, 15kar zin niga izet ol cik anyakku zi̱nze̱tti̱ cik voorik, doolik Ta̱mu̱ta̱dde̱no̱ bu̱u̱le̱ ci gerze ko̱, kar ataranit baiz ci ollu ki i̱yo̱ko̱ munyunya ko̱. 16Ki i̱yo̱ko̱ ming anyikku niga ol kaviyak cik abunna anyaha zoz ci rugeto, kar atin ming okko Ki̱ri̱sto̱ oboda, katalne atin anna zo̱ze̱ cunno̱ng oroot. Kar anna ka̱gga̱ iróng li̱ngli̱ngo̱ni̱ cinanni okko ollin. 17Een tu̱we̱ne̱t cunno̱ng wawac ci li̱ngli̱ngo̱n ci Ta̱mu̱ta̱dde̱no̱, ming a̱ddu̱te̱ bi̱ye̱ta̱ cigannik wawac neci, katalne anna kar niga bu̱k ataltto ki anna. 18Kar zin go̱o̱le̱ necu ataltto niga do̱o̱k ki annita.

Eher Pa̱u̱lo̱ zoz ci Ti̱mo̱te̱yo̱ ki Epaphroditus

19Korongi anna katalo ming kazii kaviyak cik obod ki i̱ge̱ta̱. Ki̱no̱ni̱ anna aanya atin Manyi Ye̱su̱ kar ki̱tto̱na̱kku̱ng i̱ge̱t Ti̱mo̱te̱yo̱ ataman. 20I̱llo̱i̱ e̱e̱t imma ngatu ci kaavtiya bu̱k ci anyak zinin ci abunna ki Ti̱mo̱te̱yo̱, nonno do̱ niko ci azunne baiz cunno̱ng. 21Eci ol do̱o̱k acin li̱ngli̱ngo̱no̱k cigge̱k, iróng een li̱ngli̱ngo̱n ci Ye̱su̱ Ki̱ri̱sto̱. 22Imma Ti̱mo̱te̱yo̱, a̱gga̱yyu̱ niga arizet cinne, ka̱li̱ngli̱ngnya̱ ki nonno bu̱k ngati kuwaheka ol kaviyak cik abunna, ogon enne ngatinanni ki do̱le̱c ci a̱li̱ngli̱ng ki baatinne. 23Korongi atin anna ki̱tto̱na̱kku̱ng nonno i̱ge̱ta̱ ataman, ming ka̱gga̱wa̱ ovvo kaala ku̱ baize cinanni. 24Ka̱gga̱ zin anna zare cik Manyi keronakkung atin anna i̱ge̱ta̱ eliya ataman.

25Abarik riil oroot ngatinanni ming ki̱tto̱na̱kku̱ng bo̱do̱k Epaphroditus, gotona tu̱we̱nta̱ bali i̱tto̱na̱kka̱ng niga abunna okko eelanna annita ke̱. Ki̱li̱ngli̱ngta̱ anna ki nonno, ogon enne kiwagon aciiroci ci oor illa. 26Ma̱i̱je̱ i̱yo̱ko̱ orong enne oroot kar ki̱vo̱nnu̱ng i̱ge̱ta̱. Abile nonno zinin je̱e̱na̱ eci iziktu niga omori enne ba̱li̱ye̱. 27Omori bali enne de̱de̱ oroot, kize ojon daizi. Atamatek zin Ta̱mu̱ta̱dde̱n nonno kar keela, iróng een abarik nonno do̱, eelawa enne annita bu̱k; ngati uzuta zo̱ze̱ ci ki̱no̱ne̱ matiz ci a̱ddi̱ki̱re̱ i̱nna̱ka̱ ko̱. 28Korongi zin anna oroot kar ki̱tto̱na̱u̱ng nonno ataman, kar ming ovvo niga acinnu nonno bo̱do̱k, atalninnu atin oroot, kar atin iróng zinin cinanni ngen abile je̱e̱na̱. 29I̱va̱tta̱ nonno ju̱rru̱m kiwagon gotoneti ci aave zo̱ze̱ ci Ki̱ri̱sto̱, u̱tu̱gu̱z nonno kiwagon e̱e̱ti̱ ci a̱tu̱ zoz ci Manyi. 30Eci ize ojon kar enne ka̱da̱k li̱ngli̱ngo̱nte̱ ci zoz ci Ki̱ri̱sto̱, kar bo̱do̱k ku̱ju̱ke̱k ele cinne tu̱ ngati a̱li̱ngli̱nge̱ka̱ enne annita li̱ngli̱ngo̱n ci iróng niga wo̱ye̱ u̱u̱lu̱.

Currently Selected:

Vilipia 2: tex

Highlight

Copy

Compare