Evesos 2

Aanyet Ta̱mu̱ta̱dde̱n kabait ko̱do̱ye̱ ki Ki̱ri̱sto̱

1Ogonnu niga ba̱li̱ye̱ ki i̱yo̱ko̱ ol cik a̱da̱i̱to̱ eci niga u̱tu̱gu̱zzu̱ mu̱nye̱n kar utuburet zoz ci Ta̱mu̱ta̱dde̱no̱. 2Ogonnu kaal cik gerzek, annuyu olli lo̱o̱tu̱, irezzu lo̱rye̱ni̱t wa een alaan ci abal lo̱o̱c kaale do̱o̱k cik iróng nege irez Ta̱mu̱ta̱dde̱n. 3Kabak ba̱li̱ye̱ naga bu̱k ki i̱yo̱ko̱, kabal e̱le̱tti̱ kaale cik kireze e̱le̱tti̱. Kaanycik zin naga Ta̱mu̱ta̱dde̱n komoze zo̱ze̱ ci kogon naga ko̱, okko atin enne ettedekket lo̱ki̱ko̱ ki ol do̱o̱k. 4-5Ma̱i̱je̱ Ta̱mu̱ta̱dde̱n anyak deten! Ka̱da̱kta̱ ba̱li̱ye̱ mu̱nye̱ne̱ cik kogon naga, abarik Ta̱mu̱ta̱dde̱n irezet oroot kar kaanyyet ruget ngati Ki̱ri̱sto̱, eelannet bunnati ci Ta̱mu̱ta̱dde̱no̱. 6Ma zin i̱yo̱ko̱ kurumtozik naga ki Ye̱su̱ bali itingawe Ta̱mu̱ta̱dde̱n nonno daiza ke̱. Kar kaanyyet nginti aave ojonun ki Ye̱su̱ Ki̱ri̱sto̱, ta̱mu̱-kenga. 7Ogon Ta̱mu̱ta̱dde̱n niko abunna ming i̱ye̱le̱kke̱t bunnat ki i̱rrke̱ne̱t ci lo̱o̱c ci atin a̱kku̱ ke̱ zo̱ze̱ ci Ye̱su̱ Ki̱ri̱sto̱. 8Kar zin zo̱ze̱ necu, urubtau niga ruget bunnate ci Ta̱mu̱ta̱dde̱no̱ tu̱we̱nta̱, nonno ci a̱ti̱ri̱zu̱ng oroot kommog baiz cunno̱ng. Een necu muci ci Ta̱mu̱ta̱dde̱no̱ ci aanyik e̱e̱t ci diiri, iróng aanyik go̱o̱le̱ ci ogone e̱e̱ti̱ kaal. 9Iróng een go̱o̱le̱ ci a̱li̱ngli̱nge̱ e̱e̱ti̱ ci diiri, i̱llo̱i̱ gi̱i̱ imma ci wo̱ye̱ odonge e̱e̱ti̱ ele zo̱ze̱ necu. 10Aruguzet Ta̱mu̱ta̱dde̱n kar naga ku̱tu̱gu̱z kaal cik abunna ngati Ye̱su̱ Ki̱ri̱sto̱. A̱rri̱ta̱nne̱t enne agit kar ki̱li̱ngli̱nge̱t li̱ngli̱ngo̱n cinne wa abunna lo̱o̱ta̱ ngatu.

Urumte ol cik a̱tu̱we̱ iróng een Ya̱u̱d zo̱ze̱ ci Ye̱su̱ Ki̱ri̱sto̱

11Abunna zin ming a̱a̱da̱nnu̱ iróng niga e̱e̱ggi̱nnu̱ olli Ya̱u̱do̱. Awuyung ba̱li̱ye̱ ol wak etted wucic vi̱ca̱vi̱cce̱t#2:11 Etted vi̱ca̱vi̱ca̱: U̱du̱wa̱k bali Ta̱mu̱ta̱dde̱n Aburaham a̱nne̱k ne, ming anyait dooli cigunnek macik i̱i̱nya̱ tu̱rge̱, anyik ol kettedit wucic vi̱ca̱vi̱cce̱t kar ki̱ye̱la̱ azi ne, e̱e̱ggi̱n nege dooli cik Ta̱mu̱ta̱dde̱no̱. IkebKananet 17:9-14. ko̱ izet ol cik iróng etted wucic vi̱ca̱vi̱cce̱t. 12Imma e̱rki̱te̱ neci, iróng niga a̱gga̱yyu̱ zoz ci obod ki Ki̱ri̱sto̱. E̱e̱ggi̱nnu̱ niga i̱do̱ngi̱ ki olli Israilo ngati olom bali u̱du̱ya̱i̱ ke̱, iróng niga anyakku taban ci aanyik Ta̱mu̱ta̱dde̱n nogo. Abakku ba̱li̱ye̱ niga lo̱o̱ce̱ cu gaganiko, i̱llo̱i̱ zoz ci a̱kku̱ atin, i̱llo̱i̱ rok Ta̱mu̱ta̱dde̱n bu̱k. 13E̱e̱ggi̱nnu̱ niga ol balik aavtiyyu reena ngati Ta̱mu̱ta̱dde̱no̱, ma̱i̱je̱ i̱yo̱ko̱, aanyik Ki̱ri̱sto̱ Ye̱su̱ ele cinne kize wawac kar kidimanung i̱ge̱t izet ol cik Ta̱mu̱ta̱dde̱no̱.

14Ye̱su̱ ele ci aganiz olli Ya̱u̱do̱ ki ol cik iróng een Ya̱u̱d, nonno ele ci arum olli Ya̱u̱do̱ ki ol cik iróng een Ya̱u̱d kizeto boor co̱de̱. Aara zin enne gi̱i̱ bali anyike nogo kamarto ke̱. Ogon enne zoz necu daize bali a̱da̱kne̱ enne keete ci een ta̱la̱ke̱c ke̱. 15Aara bo̱do̱k Ye̱su̱ marnonet bali anyaha lo̱ti̱nno̱wa̱ wak Ya̱u̱do̱ eher Musesi ke̱. Anyaha enne olli Ya̱u̱do̱ ki modden ka̱vvu̱to̱ nga̱to̱de̱, ku̱tu̱gu̱zzo̱ ki ci e̱e̱ggi̱n nege dooli cik e̱e̱t co̱de̱, ming idonget enne ganonte ci anyaha enne ko̱. 16Imma ta̱la̱ke̱ca̱#2:16 Ta̱la̱ke̱c: Ododek olli Romi ol ta̱la̱ke̱c ci een keet abunna ming edez u̱ce̱zi̱ e̱e̱t idic idic zee ka̱da̱k e̱e̱ti̱., i̱ti̱vi̱la̱ Ye̱su̱ zoz ci kamarnone naga do̱o̱k. Anyaha gano orgen cinna ki Ta̱mu̱ta̱dde̱n go̱o̱le̱ ci aganize enne olli Ya̱u̱do̱ ki cik iróng een Ya̱u̱d. 17I̱ki̱ya̱ Ye̱su̱ kar kuwaheung i̱ge̱t ol cik iróng een Ya̱u̱d gano, ol balik aavtte reena ngati Ta̱mu̱ta̱dde̱no̱, imma naga olli Ya̱u̱do̱ kanyak gano ki Ta̱mu̱ta̱dde̱n eci naga kaavtte ojonun ki nonno. 18Eci zo̱ze̱ ci Ki̱ri̱sto̱, kanyak naga do̱o̱k olli Ya̱u̱do̱ ki ol cik iróng een Ya̱u̱d gool ci ka̱vvu̱nna̱k naga Be̱e̱ti̱nna̱ Vongize co̱de̱ Ta̱mu̱ta̱dde̱no̱.

19Niga ol wak iróng e̱e̱ggi̱n Ya̱u̱d, iróng niga e̱e̱ggi̱nnu̱ mo̱ddo̱ icima i̱do̱ngi̱ ngu̱me̱ ci Ta̱mu̱ta̱dde̱no̱, abarik izetu niga boor co̱de̱ ki i̱yo̱ko̱ ol wak een boor ci Ta̱mu̱ta̱dde̱no̱ a̱tu̱ nonno ko̱. 20Ogonnu niga kiwagon biyena wak eenyce ol ce̱e̱z ko̱. Imma to̱ni̱a̱ha̱ ki a̱ri̱tto̱k cik zoz ci Ta̱mu̱ta̱dde̱no̱, ogon nege kiwagon biyena wak akane ol teheenyinet ko̱. Ma̱i̱je̱ ngati Ki̱ri̱sto̱ Ye̱su̱, ogon enne kiwagon bee ci riili oroot i̱ti̱re̱ne̱ ce̱e̱z kodok kak. 21Imma niga ol wak a̱tu̱yyu̱ Ta̱mu̱ta̱dde̱n ki Ki̱ri̱sto̱, urumteu izetu ol co̱de̱ kar zin a̱gga̱mi̱t Ce̱e̱z wa Ta̱mu̱ta̱dde̱no̱ kokkom kak ki i̱yo̱ko̱ biyena ne̱k eenyce ol ce̱e̱z ko̱, kar izet niga e̱le̱tti̱ne̱ ce̱e̱z ci Manyi a̱li̱le̱. 22E̱e̱ggi̱nnu̱ zin niga lo̱lo̱i̱t ci ce̱e̱z wa eteeheny Ye̱su̱ ko̱ kar Vongizi ci Ta̱mu̱ta̱dde̱no̱ kabahe.

Currently Selected:

Evesos 2: tex

Highlight

Copy

Compare