Buk wa To̱ni̱a̱u̱ 4

Abile Peturu ki Jon ro̱ni̱a̱ lo̱ki̱ka̱

1Baling ngen Peturu ki Jon ozozik ol, i̱vi̱tta̱k zin olli wawaco#4:1 Olli wawaco: Azi lo̱ti̱nno̱wa̱ cik Musesi ne, olli wawaco do̱ cik amuc wawac Ce̱e̱ze̱ wa Ta̱mu̱ta̱dde̱no̱. A̱vvu̱ nege la̱du̱n boore co Le̱vi̱. ki ddi̱ki̱ryo̱i̱t ci aciir wak ebek Ce̱e̱z wa Ta̱mu̱ta̱dde̱no̱ ki Saddocis.#4:1 Saddocis: E̱e̱ggi̱n ne̱ko̱ koole ci olli Ya̱u̱do̱ cik a̱tu̱ Lo̱ti̱nno̱k cik Musesi ming a̱vvu̱ ngati Ta̱mu̱ta̱dde̱no̱, iróng zin nege a̱tu̱ vongiz ki anjilo icima ingazi atin ol daiza. IkebBuk wa To̱ni̱a̱u̱ 23:8. 2O̱mo̱zze̱ bali nege oroot eci Peturu ki Jon wak e̱e̱ggi̱n to̱ni̱a̱k ko̱ edemez ol azi ne, ingazi atin ol daiza ki bali ming ingazi Ye̱su̱ ke̱. 3A̱gga̱mi̱t zin nege Peturu ki Jon, eci bali ize looci yo̱mo̱n, aartik nogo lagam ka̱ta̱gu̱zzo̱ kaal. 4Ma̱i̱je̱ ol cik meelek iziyyet kaviyak ne̱ke̱ kar ku̱tu̱we̱t zoz ci Ye̱su̱, otorte ol ne̱ke̱ izeto i̱bbo̱nge̱t tu̱r (5,000).

5Ma bali nge̱rre̱t, u̱lu̱tte̱ nyakanganeta, lo̱ddi̱ki̱re̱ ki de̱me̱zzo̱k wak lo̱ti̱nno̱u̱ Jerusalema. 6Aave da̱ Annasi alaani ci a̱ddi̱ki̱re̱ wawaco nginati, ki bo̱do̱k Kaipas, Jon, Alizanduru ki ol cik boor wa alaan ci a̱ddi̱ki̱re̱ wawaco.#4:6 Alaan ci a̱ddi̱ki̱re̱ wawaco: Ommog alaani ci a̱ddi̱ki̱re̱ wawaco ko̱ alaat cik olli wawaco eci een nonno do̱ ṯok ci gon i̱i̱zo̱ Ce̱e̱z wa Ta̱mu̱ta̱dde̱no̱ Ngin wa A̱li̱le̱ Oroot e̱rki̱ta̱ lak co̱de̱. Anyaha enne bi̱ye̱ cik kar kutuny mu̱nye̱n cigge̱k. Aave Ta̱mu̱ta̱dde̱n di̱ngdi̱ngo̱nta̱ Ngin wa A̱li̱le̱ Oroot, zoz zin ci iróng alaani ci a̱ddi̱ki̱re̱ wawaco ko̱ i̱i̱zo̱ ngintu i̱i̱te̱n imma e̱rki̱ta̱. IkebLeviticus 16; I̱bu̱ru̱ 9:1-7. 7Baling anyakttak ol Peturu ki Jon, a̱ka̱tte̱ zin i̱jji̱nne̱t nogo izektek ne, “Komize ci een nyaa icima zare cik ngene ci ogoni i̱nna̱ kaal ciko ko̱?”

8Kar zin Peturu ngati anyahe Vongiz ci A̱li̱le̱, kizek nogo ne, “Nyakanganet ki lo̱ddi̱ki̱re̱ cik ollu! 9Ming a̱jji̱nne̱t ol wazin necu zo̱ze̱ bali abunna kogon ke̱ ki̱ye̱le̱k bunnat e̱e̱t bali ngooli ke̱, kar nege ki̱jji̱nte̱t amuda enne ti̱ri̱ze̱ne̱t ku̱? 10A̱gga̱yyu̱ niga ki olli Israilo do̱o̱k zoz cu: Abile e̱e̱ti̱ cu ngatu kubunna ko̱ zo̱ze̱ ci zar cik Ye̱su̱ Ki̱ri̱sto̱ wa Nazereti, wa bali ododikku niga ta̱la̱ke̱c ka̱da̱k, ma̱i̱je̱ Ta̱mu̱ta̱dde̱n itingai nonno daiza. 11Een enne

“‘Bee bali utuburtu niga ol wak eenyce ke̱

ize bee ci abilne ce̱e̱z kommog veelek.’#Caliwon 118:22

12A̱zze̱ e̱e̱ti̱ imma ci a̱ti̱ri̱ze̱t wo̱ye̱ agit to, eci i̱llo̱i̱ e̱e̱t imma ci kamuda naga ta̱mu̱-kenga kar wo̱ye̱ ki̱ti̱ri̱z ol, een Ye̱su̱ do̱ niko.”

13Ma baling icinnet nege Peturu ki Jon ming ngen keteherto, ol cik labak, a̱gga̱c zin nege ming a̱vvu̱to̱ ol ne̱ko̱ ba̱li̱ye̱ ki Ye̱su̱. 14Baling icinnet nege e̱e̱t ci bali angaruwe ming abile nginati ki nogo, i̱zzi̱ zoz ci ngen nege ozoz to. 15Aanycik zin nege Peturu ki Jon koot reena lo̱ki̱ka̱#4:15 Lo̱ki̱ko̱: Een necu bali lo̱ki̱ko̱ ci arumo alaani ci a̱ddi̱ki̱re̱ wawaco ki alaat cik olli wawaco kar bo̱do̱k lo̱ddi̱ki̱re̱ cik ollu do̱o̱k kar kodolta kozozit no̱ngi̱tto̱n cik obod ki olli Ya̱u̱do̱. kar zin nege kozozit do̱. 16I̱jji̱nto̱ zin nege “Kovvo atin naga kogonik ol ciko nyaa? A̱gga̱c ol do̱o̱k cik abak Jerusalema ming u̱tu̱gu̱zzo̱ ol ne̱ko̱ kaal cik a̱vu̱la̱, ci abarik iróng wo̱ye̱ naga ka̱lu̱gu̱nyi̱. 17Ma̱i̱je̱ ming korong kibilizet kaal ne̱ko̱ olle do̱o̱k, kegerenycek kizettek ne, ma bo̱do̱k abungeku zar cik e̱e̱t cu e̱e̱t imma.”

18U̱tu̱yya̱ zin nege nogo kar izettek ne, ma bo̱do̱k ozozu icima edemezu ol zare cik Ye̱su̱. 19Abarizek zin Peturu ki Jon nogo izettek ne, “Etteddit da̱ o̱o̱tti̱ne̱ cuggo̱k, abunna wo̱ye̱ ngu̱me̱ ci Ta̱mu̱ta̱dde̱no̱ ming ko̱ngo̱o̱le̱ i̱ge̱ta̱ icima Ta̱mu̱ta̱dde̱n. 20Iróng wo̱ye̱ naga kaavtiya li̱i̱m zo̱ze̱ bali kicinnta kar kizikta naga ko̱.”

21Ma baling u̱cu̱be̱t nege nogo oroot kar zin kaanycik nogo koot. Iróng nege odola kar ke̱de̱zi̱t nogo, eci ol do̱o̱k innat Ta̱mu̱ta̱dde̱n zo̱ze̱ bali u̱tu̱gu̱zzo̱ nege ke̱. 22Eci e̱e̱ti̱ wa bali angaruwe zo̱ze̱ ci a̱vu̱la̱ ommog e̱rki̱nya̱ ciginnek moten we̱c.

Lawinet ci ol wak a̱tu̱we̱

23Baling oogtta nege Peturu ki Jon, i̱mi̱rrte̱ zin nege oot olle wak a̱tu̱ zoz ci Ye̱su̱, kar ku̱du̱kta̱k zoz bali a̱du̱wa̱k alaata cik olli wawaco ki lo̱ddi̱ki̱re̱ zoz bali a̱du̱wa̱k nogo ke̱ do̱o̱k. 24Baling iziyyet nege zoz necu, alac nege Ta̱mu̱ta̱dde̱n mulukwane cik a̱bu̱le̱ oroot, izektek Ta̱mu̱ta̱dde̱n ne, “Manyi ye̱i̱, i̱nne̱t ci eenyca ta̱mu̱-keng ki lo̱o̱c ki nyatapar, ki kaal do̱o̱k ne̱k abak ko̱. 25Ozozi i̱nna̱ Vongize ci A̱li̱le̱ utuge ci du̱ca̱i̱t cunne, wa een be̱e̱ti̱nna̱ Da̱vi̱de̱:

“‘Nyaa ol ming abure nong lo̱o̱co̱we̱ do̱o̱k

kar ol kadayya Manyi gaganiko ko̱?

26Ait alaata cik lo̱o̱tu̱ illa,

kar bo̱do̱k ol wak abal ol ko̱ a̱vvu̱to̱ nga̱to̱de̱

ka̱da̱ngi̱t Manyi

kar ka̱da̱ngi̱t E̱e̱t Co̱de̱ wa atahalai.’#Caliwon 2:1-2

27De̱de̱ u̱ru̱mto̱ He̱ro̱di̱#4:27 Alaan He̱ro̱d: Awu ol alaan cu azi ne, He̱ro̱d Antipas. Bali vu̱rrta̱ ming okko He̱ro̱d wa A̱ddi̱ki̱re̱ a̱da̱i̱, ize ngerinne He̱ro̱di̱ Antipas alaan. Een enne alaan i̱i̱te̱ne̱ bali a̱gga̱me̱k Joni Ye̱su̱ ba̱ti̱ti̱mo̱ ke̱. IkebMa̱te̱yo̱ 14:1; Marko 6:14; Lu̱ka̱ 3:1. Awu ol He̱ro̱d azi ne, He̱ro̱d wa A̱ddi̱ki̱re̱. Een bali enne alaan koor bali a̱rri̱ta̱i̱ Ye̱su̱ ke̱. IkebMa̱te̱yo̱ 2:1-8; Lu̱ka̱ 1:5. Imma bali vu̱rrta̱ anyak alaan ci een He̱ro̱d Agirippa, ngerrti do̱le̱c ci He̱ro̱d wa A̱ddi̱ki̱re̱. IkebBuk wa To̱ni̱a̱u̱ 12:1-23. ki Pontius Pilato nga̱to̱de̱ ki i̱do̱ngi̱ ki olli Israilo o̱rge̱ cu adawa du̱ca̱i̱t cunne a̱li̱le̱ Ye̱su̱, wa bali atahala i̱nna̱. 28U̱tu̱gu̱zzo̱ nege kaal balik elema i̱nna̱ komize cunne ki zoz ci odola i̱nna̱ ba̱li̱ye̱ kar kakat mo̱o̱le̱t. 29I̱yo̱ko̱, Manyi cin zoz cinne̱ng gerze i̱no̱n nege orong ku̱tu̱gu̱ze̱ta̱, kar anyik du̱cca̱k cigunnek kozozit zoz cunne ngati iróng o̱ngo̱o̱li̱nne̱. 30I̱tto̱n a̱zzi̱t cunne kar kangaru kar tu̱gu̱ kaal cik a̱vu̱la̱ ki cik aanyik ol ku̱ku̱lte̱k je̱e̱n zare cik du̱ca̱i̱t cunne a̱li̱le̱ Ye̱su̱.”

31Baling alayo nege, otomowe ce̱e̱z bali arumene nege ke̱. Kar Vongizi ci A̱li̱le̱ ki̱ta̱k nogo do̱o̱k kar zin nege kozozit zoz ci Ta̱mu̱ta̱dde̱n mazeta.

Ozol ol wak a̱tu̱we̱ i̱jjo̱ cigge̱k

32O̱do̱ye̱ da̱ ol wak a̱tu̱we̱ zi̱nze̱tti̱ cigge̱k ne ṯok. I̱llo̱i̱ rok e̱e̱t co̱de̱ ci azi ne, een ba̱li̱ye̱ i̱jjo̱ ne̱ke̱ ciginnek, abarik nege ozol kaal cik anyak do̱o̱k. 33Anyak to̱ni̱a̱ha̱ komiz ci a̱ppwe̱, kar nege kibbacit zoz ci obod ki ngazi ci Manyi Ye̱su̱ daiza, kar bali deteni ci Ta̱mu̱ta̱dde̱no̱ a̱ppwe̱ ka̱vvu̱ ngatinne̱ng do̱o̱k. 34I̱llo̱i̱ bali nogo e̱e̱t ci amati. Utene gon ol uggak ngatinne̱ng ce̱e̱zi̱ ki lo̱o̱cco̱k cigge̱k, kar kanyakta o̱ro̱bi̱ya̱ cik utene nege ko̱ 35kar kaanycik to̱ni̱a̱k, kar zin o̱ro̱bi̱ya̱na̱ ne̱ke̱ kengertozik ol cik amati.

36Imma da̱ e̱e̱ti̱ imma ci een Yosevo ci boor ci Le̱vi̱,#4:36 Boor co Le̱vi̱: A̱vvu̱ ol wak wawaco do̱o̱k ngati boor ci Le̱vi̱. a̱rri̱ta̱i̱ ngati aburuk maama een Cyprus. Akannek da̱ to̱ni̱a̱ha̱ nonno kize Barnabas, azi ungec ci zar ne̱ko̱ ne, ngerrti e̱e̱t wa i̱lo̱t ol. 37Utuwoi ma̱na̱ cinne kar kanyaha o̱ro̱bi̱ya̱ kaanyik to̱ni̱a̱k.

Currently Selected:

Buk wa To̱ni̱a̱u̱ 4: tex

Highlight

Copy

Compare