Buk wa To̱ni̱a̱u̱ 2

I̱ki̱ya̱k Vongizi ci A̱li̱le̱ ol

1Baling i̱ki̱ya̱ I̱i̱te̱ni̱ wa Pentakosi,#2:1 I̱i̱te̱ni̱ wa Pentakosi: A̱kku̱ I̱i̱te̱ni̱ wa Pentakosi ko̱ i̱i̱nya̱we̱ cik e̱e̱ggi̱n moten tu̱r vu̱rrte̱ ci I̱i̱te̱n wa Va̱rda̱ngi̱nto̱, baling uk Ta̱mu̱ta̱dde̱n a̱va̱rda̱ng ce̱e̱zi̱ cik olli Israilo balik e̱e̱ggi̱nne̱ nege du̱cca̱k Masire ke̱. Imma I̱i̱te̱ne̱ wa Pentakosi, anyaha olli Ya̱u̱do̱ da̱i̱ne̱t cigge̱k wak e̱e̱ggi̱n o̱o̱tti̱ etteda manine kar kanycik Ta̱mu̱ta̱dde̱n Jerusalema kar ka̱a̱dda̱ i̱i̱te̱n ci anyik Ta̱mu̱ta̱dde̱n lo̱ti̱nno̱k Muses biye ci een Sinai. A̱a̱dda̱ Kiristiani I̱i̱te̱n wa Pentakosi bali a̱kku̱na̱k Vongizi ci A̱li̱le̱ ol wak a̱tu̱ Ye̱su̱ i̱i̱te̱ne̱ neci. IkebNambars 28:26-31. aavtte bali nege do̱o̱k nga̱to̱de̱. 2Ataman niko i̱ki̱ya̱ mului ci ogon ki lamlami ci a̱vvu̱wa̱n ta̱mu̱-kenga kiddera ce̱e̱z bali aavtte nege ke̱ do̱o̱k. 3Icinnet zin nege kaal cik ogon ki a̱ha̱tti̱ cik gwo̱o̱ya̱k ming engero kar zin ka̱vvu̱to̱ o̱o̱tti̱ne̱ cigge̱k do̱o̱k e̱co̱de̱ e̱co̱de̱. 4Iddera Vongizi ci A̱li̱le̱ ko̱ nogo do̱o̱k kar zin nege kozozit u̱tu̱ge̱tti̱ne̱ cik aavtte do̱ do̱ ki i̱yo̱ko̱ ming aanyik Vongizi nogo komiz ci ozoze nege ko̱.

5Aavtte da̱ Ya̱u̱di̱ cik o̱ngo̱o̱le̱ Ta̱mu̱ta̱dde̱n lo̱o̱co̱we̱ do̱o̱k Jerusalema. 6Baling iziyyet nege mulukwa ne̱ke̱, a̱ma̱li̱ltte̱ koole ne̱ke̱ o̱o̱tti̱, eci nege do̱o̱k aziye zoz u̱tu̱ge̱tti̱ne̱ cigge̱k do̱ do̱. 7A̱ma̱li̱ltte̱ ol o̱o̱tti̱ kar bo̱do̱k ku̱ku̱lte̱k je̱e̱n oroot, i̱jji̱nto̱ zin nege, “Ma dim ol ciko do̱o̱k iróng een olli Ga̱li̱li̱? 8Kar zin nya ming kaziye naga nogo ming ozoz u̱tu̱ge̱tti̱ne̱ cigga̱c ko̱? 9Ke̱e̱ggi̱n naga ol cik a̱vvu̱ lo̱o̱co̱we̱ ciko, Parthians, Medes, Elamites, Mesopotamia, Ju̱de̱ya̱, Cappadocia, Pontus, Asia, 10Phrygia, Pamphylia, Masir, kar orog ci een Cyrene ci aave lo̱o̱ce̱ ci Libiya; ki ol cik a̱vvu̱ o̱rge̱ ci a̱ddi̱ki̱re̱ een Roma, 11ki lo̱o̱c ci Crete ki Arabiya. Ke̱e̱ggi̱n naga Ya̱u̱d ki i̱do̱ngi̱ wak utuhuye kizeto Ya̱u̱d; kazikna naga nogo do̱o̱k ming ozoz zoz ci Ta̱mu̱ta̱dde̱no̱ u̱tu̱ge̱tti̱ne̱ cigga̱c!” 12Baling a̱ma̱li̱ltte̱ ol o̱o̱tti̱, i̱jji̱nne̱t zin nege e̱le̱tti̱, “Azi keng ci zoz cu nya?”

13Ma̱i̱je̱ abarik ol uggak aarane nogo, azi ne, “Uudet nege merte ci a̱ppwe̱.”

Ozozek Peturu koole

14Ibil zin Peturu je̱e̱na̱ ki to̱ni̱a̱k u̱gge̱ omoto ki co̱de̱, kar zin kozozek koole muluwe ci oroi oroot: “Ol cigannik Ya̱u̱d ki i̱ge̱t do̱o̱k wak abakku Jerusalema, korongi koobeung keng ci zoz cu; izikto ju̱rru̱m zo̱ze̱ ci kozozi anna ko̱. 15Iróng ol ciko ibbakce; ngen abarik een i̱i̱ torkoc nge̱rre̱t! 16Abarik iróng een niko, een zoz necu ci u̱du̱wa̱ bali a̱ri̱to̱i̱ti̱ wa een Joel:

17“‘Azi Ta̱mu̱ta̱dde̱n i̱i̱nya̱we̱ cik vu̱rrta̱k ne,

ka̱du̱te̱k atin anna Vongiz cinanni ol do̱o̱k.

A̱du̱wa̱k atin dooli cigunnek macik ki cik nga̱a̱ye̱k ol zoz cinanni.

Ovvo atin logoz cigunnek acin kaal cik meelek o̱no̱zo̱we̱,

kar bo̱do̱k ol wak macik ciggo̱k a̱ddi̱ki̱re̱ ko̱ kanyait o̱no̱zzo̱k.

18Okko ngati du̱cca̱k cigannik, cik macik ki cik nga̱a̱ye̱k,

ka̱du̱te̱k atin anna nogo Vongiz cinanni i̱i̱nya̱ ne̱ke̱,

kar atin nege kanyait arizet ci a̱du̱wa̱ne̱ zoz.

19Ki̱ye̱la̱ atin anna kaal cik aanyik ol ka̱ma̱li̱ltte̱ o̱o̱tti̱ ta̱mu̱-kenga,

ki kaal cik a̱vu̱la̱ lo̱o̱ta̱ ngatu todowai,

oowa atin ol bi̱ye̱ ki gwo̱o̱ ci anyak bbu̱rre̱t ci gi̱da̱ngi̱.

20Ukce atin koor kize o̱lla̱ ter

okko nyelowi ukce ki̱bbi̱r ku̱tu̱gu̱ kiwagon gwa̱a̱

i̱i̱te̱ne̱ ci ngen Manyi ki̱ki̱ya̱#2:20 I̱i̱te̱ne̱ ci Manyi: Oob zoz necu zoz ci okko Ye̱su̱ obodak lo̱o̱c, kar Ta̱mu̱ta̱dde̱n ketted lo̱ki̱ko̱ ci ol wak aruge ki wak a̱da̱i̱to̱. IkebBuk wa To̱ni̱a̱u̱ 2:20; 1 Ko̱ri̱nto̱ 5:5; 2 Ko̱ri̱nto̱ 1:14; 1 Te̱se̱lo̱ni̱ka̱ 4:13-18; 2 Te̱se̱lo̱ni̱ka̱ 2:2; 2 Peturu 3:10. komize cinne a̱ddi̱ki̱re̱ ki di̱ngdi̱ngo̱n.

21Imma e̱e̱ti̱ ci awu

zar cik Manyi, okko atin enne amuda ti̱ri̱ze̱ne̱t.’#Joel 2:28-32

22“Olli Israilo, iziyyet zoz cu: Een bali Ye̱su̱ wa Nazereti e̱e̱t ci aanyet Ta̱mu̱ta̱dde̱n agit go̱o̱le̱ ci ogone enne kaal cik a̱vu̱la̱ ki kaal cik aanyik ol ka̱ma̱li̱ltte̱ o̱o̱tti̱, ki baayen balik ogonekku̱ng Ta̱mu̱ta̱dde̱n i̱ge̱t ke̱, eci bali a̱gga̱yyu̱ niga e̱le̱tti̱ne̱. 23Anyonikkung e̱e̱ti̱ cu i̱ge̱ta̱, a̱kku̱ ngati Ta̱mu̱ta̱dde̱no̱ zo̱ze̱ ci odola enne, kar niga ki olli mu̱nye̱nu̱ adaya nonno, kar zin niga u̱ru̱we̱t nonno ka̱da̱k ngati ododikku nonno keet ci een ta̱la̱ke̱c.#2:23 Ta̱la̱ke̱c: Ododek olli Romi ol ta̱la̱ke̱c ci een keet abunna ming edez u̱ce̱zi̱ e̱e̱t idic idic zee ka̱da̱k e̱e̱ti̱. 24Abarik zin Ta̱mu̱ta̱dde̱n itingai nonno daiza, aara wu̱ce̱z ci daizo ngatinne, eci daizi iróng anyak doiz ci a̱gga̱me̱ nonno. 25Ozoz Da̱vi̱de̱ zoz ci obod ki e̱e̱t neci, azi ne,

“‘Kedenya anna Manyi odohize o̱o̱we̱ cinanni.

Eci enne aave a̱tte̱ cinanni a̱zzo̱,

iróng atin anna ka̱bba̱ri̱ti̱.

26I̱yo̱ko̱ zin katalne anna oroot kar bo̱do̱k kinnati i̱nne̱t oroot, Manyi ye̱i̱,

abak ele cinanne zo̱ze̱ ci karike anna zinin Ta̱mu̱ta̱dde̱n eci i̱llo̱i̱ gi̱i̱ ci gerze i̱i̱na̱ka̱ atin.

27Eci iróng atin i̱nna̱ ungneka annit ilomi,

iróng i̱nna̱ anyik ele ci Ngerunne wa A̱li̱le̱ O̱de̱ Ṯok ku̱mu̱ lo̱o̱wa̱.

28I̱ye̱le̱ya̱ ba̱li̱ye̱ i̱nna̱ annit gool ci rugeto;

aanya atin i̱nna̱ annit katalo, eci anna kovvo kaavtte ki i̱nne̱t udut.’

29“Gotonogga, ka̱du̱wa̱kku̱ng wo̱ye̱ anna i̱ge̱t de̱de̱ a̱da̱k Da̱vi̱de̱ kar zin kadawe, aave ilomi cinne ngatu rok i̱yo̱ko̱. 30Een zin bali enne a̱ri̱to̱i̱t ci a̱gga̱ olom ci u̱du̱wa̱k Ta̱mu̱ta̱dde̱n nonno ke̱, odola bali Ta̱mu̱ta̱dde̱n zo̱ze̱ ci a̱nne̱ke̱ Da̱vi̱de̱ ne kanyik atin do̱le̱c imma dooline ciginnek karagiz alaanzet cinne. 31Baling a̱gga̱ Da̱vi̱de̱ gi̱i̱ ci atin kar ku̱tu̱gu̱ Ta̱mu̱ta̱dde̱n niko, kar zin kozoz zoz ci obod ki ngazi ci Ki̱ri̱sto̱,#2:31 Ki̱ri̱sto̱: Utuge ci Gi̱ri̱yo̱ azi keng ci zar cik een Ki̱ri̱sto̱ ko̱ ne, wa o̱de̱ atahala Ta̱mu̱ta̱dde̱n kize Alaan. Utuge ci I̱bu̱ru̱ azi keng ci zar cik een Ki̱ri̱sto̱ ko̱ ne Missaya. kar kize ne, iróng Ta̱mu̱ta̱dde̱n ungnek nonno ka̱da̱k, kar zin bo̱do̱k ele wainne ku̱mu̱ lo̱o̱wa̱. 32Itingawe zin Ta̱mu̱ta̱dde̱n Ye̱su̱ daiza de̱de̱. I̱yo̱ko̱ zin naga do̱o̱k kizetta bbacak zo̱ze̱ necu. 33Uwe Ta̱mu̱ta̱dde̱n nonno ta̱mu̱-kenga, kar karik nonno a̱zzi̱t cinne a̱zzo̱, uruba zin enne ngati Baatinne zoz bali u̱du̱wa̱ enne ke̱, een Vongiz ci A̱li̱le̱ kar ku̱du̱ta̱k lo̱o̱c kaal cik acinnu ko̱ ki cik aziknnu ko̱. 34Ngen bali Da̱vi̱de̱ kuk rok ta̱mu̱-keng, abarik enne u̱du̱wa̱ zoz ci obod ki Ye̱su̱, azi ne,

“‘A̱nne̱k Manyi, Manyi cinanni#2:34 A̱nne̱k Manyi, Manyi cinanni: Awu Manyi Ta̱mu̱ta̱dde̱n Ye̱su̱, azi ne, een enne Manyi. ne,

“A̱vvu̱ a̱tte̱ cinanni a̱zzo̱ ngati a̱di̱ngdi̱nga̱ni̱ ol,

35zee ku̱tu̱gu̱ anna mo̱ddo̱ wagunnek,

ka̱vvu̱to̱ zoone cigunnek.”’#Caliwon 110:1

36“Abunna zin niga olli Israilo ming a̱gga̱yyu̱ zoz necu ju̱rru̱m do̱o̱k. Idiman Ta̱mu̱ta̱dde̱n Ye̱su̱ bali ododoyu niga keete ci een ta̱la̱ke̱c ke̱, kize Manyi ki Ki̱ri̱sto̱.”

37Ma baling iziyyet ol do̱o̱k zoz necu, o̱to̱ngo̱o̱ltte̱ lo̱o̱c, kar zin izektek Peturu ki to̱ni̱a̱k u̱gge̱ ne, “Gotonogget, kar zin ucca ku̱tu̱gu̱zza̱ nya?”

38Iizek zin Peturu nogo ne, “Uturtta mu̱nye̱n cuggo̱k do̱o̱k kar a̱gga̱mi̱t ba̱ti̱ti̱mo̱ zare wak Ye̱su̱ Ki̱ri̱sto̱, kar atin Ta̱mu̱ta̱dde̱n kalaleung mu̱nye̱n cuggo̱k. Kar atin niga u̱mu̱dda̱ muci ci Vongiz ci A̱li̱le̱. 39Een muci necu cunno̱ng ki dooli cuggo̱k ki ol cik aavtte reena, e̱e̱ggi̱n ol ne̱ko̱ do̱o̱k cik awu atin Ta̱mu̱ta̱dde̱n.”

40U̱du̱wa̱k Peturu nogo zo̱zzo̱k cik meelek; kar kilalek nogo azi ne, “Eelta e̱le̱tti̱ ciggo̱k bu̱u̱le̱ ci gerze ko̱.” 41Imma zin ol balik elemtta kaviyak ciginnek ko̱, a̱gga̱mto̱zi̱k nogo ba̱ti̱ti̱mo̱, e̱e̱ggi̱n wo̱ye̱ nege i̱bbo̱nge̱t i̱i̱yo̱ (3,000), otortozik nege ol cik a̱tu̱we̱ i̱i̱te̱ne̱ neci.

Wowonet ci ol wak a̱tu̱ zoz ci Ye̱su̱

42Aanycik nege e̱le̱tti̱ cigge̱k de̱mzi̱ne̱t ci to̱ni̱a̱u̱ ki wowonet cinne̱ng, ki du̱le̱ne̱t umune nga̱to̱de̱ ki lawinet. 43Ogon to̱ni̱a̱ha̱ kaal cik a̱vu̱la̱ komize ci Vongiz ci A̱li̱le̱, ku̱ku̱lte̱k olli Jerusalemo do̱o̱k je̱e̱n. 44Emena ol wak a̱tu̱ zoz ci Ye̱su̱ a̱gga̱wo̱ owowo ju̱rru̱m nga̱to̱de̱, eelo e̱le̱tti̱ kaale cik anyak nege. 45Utene kaal cik anyak nege ki i̱jjo̱ cigge̱k, aanycik zin nege ol cik amati. 46Alute nege odohize reene ci Ce̱e̱z wa Ta̱mu̱ta̱dde̱no̱,#2:46 Ce̱e̱z wa Ta̱mu̱ta̱dde̱no̱: Anyak Ce̱e̱z wa Ta̱mu̱ta̱dde̱no̱ co̱de̱ ṯok Jerusalema, otodongek ol cik wawaco Ta̱mu̱ta̱dde̱n muci nginati ki bali ming a̱du̱wa̱ lo̱ti̱nno̱wa̱ cik Musesi ke̱. Aave Ta̱mu̱ta̱dde̱n Ce̱e̱ze̱ wa Ta̱mu̱ta̱dde̱no̱ Ngati A̱li̱le̱ Oroot di̱ngdi̱ngo̱nta̱. Alaan ci a̱ddi̱ki̱re̱ wawaco do̱ ci okko Ngati A̱li̱le̱ Oroot Ce̱e̱ze̱ wa Ta̱mu̱ta̱dde̱no̱, okko anyaha bi̱ye̱ cik unye mu̱nye̱n cik ollu ngu̱me̱ ci Ta̱mu̱ta̱dde̱no̱, e̱rki̱ta̱ lak co̱de̱. IkebLeviticus 16; I̱bu̱ru̱ 9:1-7. kar zin kozolit da̱i̱ne̱t ce̱e̱zi̱nne̱, adakce talninta, zi̱nze̱tti̱nne̱ cik abunna, 47kar kinnatit Ta̱mu̱ta̱dde̱n oroot, kar zin ol do̱o̱k kirezit nogo. Kar Manyi kotorek ol cik a̱tu̱we̱ kurumtozik nogo odohize.

Currently Selected:

Buk wa To̱ni̱a̱u̱ 2: tex

Highlight

Copy