2 Ko̱ri̱nto̱ 11

Pa̱u̱lo̱ ki To̱ni̱a̱k wak volongak

1Korongnyung izikttang annit ju̱rru̱m, ma wo̱ye̱ nu̱nu̱n kozozi kiwagon e̱e̱ti̱ ci tarbali, izikttang annit niko. 2Kazunnung anna i̱ge̱t kiwagon Ta̱mu̱ta̱dde̱n ming azunnung i̱ge̱t ko̱. U̱tu̱gu̱zzu̱ niga kiwagon do̱le̱c ci nga̱a̱ye̱#11:2 Do̱le̱c ci nga̱a̱ye̱: Een do̱le̱c ci nga̱a̱ye̱ dici ngen ka̱ta̱gu̱zzo̱ ki e̱e̱t imma ci maci udut. ngen ka̱ta̱gu̱zzo̱ ki mac cinne. Ku̱du̱wa̱u̱ng anna i̱ge̱t kar urumtte ki Ye̱su̱ Ki̱ri̱sto̱. 3Ma̱i̱je̱ i̱yo̱ko̱, ko̱ngo̱o̱le̱ anna alabanung atin uwat ki bali ming alaba ogonikket Eva,#11:3 Eva: Een enne ba̱li̱ye̱ ngaa ci Adami kar bo̱do̱k kize e̱e̱ti̱ ollu do̱o̱k. Ikeb gool ci bali a̱lu̱te̱ uwat Eva warage ciKananet 3:1-19. ngaa ci Adami nyaate ci een Eden ke̱. Kar i̱yo̱ko̱, ecebannung atin uwat o̱o̱tti̱ kar iróng ngen arikku zi̱nze̱tti̱ Ki̱ri̱sto̱ de̱de̱ ki ba̱li̱ye̱. 4Kuwaktteung naga i̱ge̱t zoz ci Ye̱su̱, kar niga a̱gga̱mtta̱u̱ zoz cinna̱ng ki Vongiz ci A̱li̱le̱. Ma̱i̱je̱ vu̱rrta̱, i̱vi̱ta̱ ol uggak kuwaktteung i̱ge̱t zoz ci Ki̱ri̱sto̱ aave do̱, elemttau zin niga kaviyak ne̱ke̱ ki vongiz ci aave do̱. 5Ka̱gga̱ anna azi gon to̱ni̱a̱ha̱ cik volongak ne ke̱e̱ggi̱nna̱ nege to̱ni̱a̱k cik Ta̱mu̱ta̱dde̱no̱ riilik do̱o̱k, iróng zin nege ommogja annita. 6Ka̱gga̱ iróng anna ke̱e̱ni̱ e̱e̱t ci ka̱gga̱ uwai, ka̱gga̱ zoz ci Ta̱mu̱ta̱dde̱no̱. Ki̱ye̱le̱u̱ng anna i̱ge̱t ba̱li̱ye̱ zoz necu go̱o̱lo̱we̱ do̱o̱k.

7Kabaca bong da̱ anna baling kobodane ele kar kodong zar cuggo̱k ngati kuwahekkung kaviyak cik abunna Ta̱mu̱ta̱dde̱no̱ ci iróng ka̱gga̱ma̱nnu̱ng o̱ro̱bi̱ya̱? 8Kogoroza abarik anna olli ke̱le̱ci̱a̱nya̱ u̱gge̱ ka̱gga̱ma̱ o̱ro̱bi̱ya̱ cigge̱k kar ki̱li̱ngli̱ng ngatinno̱ng. 9Baling kabak ki i̱ge̱t ke̱, ming i̱zzi̱ gi̱i̱ imma to ngatinanni, iróng anna kalayyung. Anyak de̱de̱ ollik Ta̱mu̱ta̱dde̱no̱ lo̱o̱ce̱ ci Macedonia cik aanyya o̱ro̱bi̱ya̱ cik kadayinne. Iróng zin anna ka̱a̱nyu̱ng elem cinanni i̱ge̱t udut. 10Ka̱du̱wa̱kku̱ng kaal ne̱ko̱ ko̱, eci kozozi zoz ci Ki̱ri̱sto̱ een de̱de̱ ngatinanni. I̱llo̱i̱ e̱e̱t imma ci wo̱ye̱ abilizan lo̱o̱ce̱ ci Achaia#11:10 Lo̱o̱c ci Achaia: Aave orogi ci Ko̱ri̱nto̱ lo̱o̱ce̱ ci Achaia. ko̱ ngati kodonge ele zo̱ze̱ necu. 11Kogonni niko ko̱, eci kirezzung, iróng ka̱gga̱ma̱nnu̱ng o̱ro̱bi̱ya̱ cik kuwahekkung zoz ci Ta̱mu̱ta̱dde̱no̱. A̱gga̱ Ta̱mu̱ta̱dde̱n kirezzung anna i̱ge̱ta̱ oroot.

12Anyak ol u̱gge̱ orgene cunno̱ng cik odong e̱le̱tti̱ azi ne ka̱li̱ngli̱ngnyya̱ ki i̱ge̱ta̱ ki i̱yo̱ko̱ ming kogonni anna ko̱. Kodola zin anna li̱ngli̱ngo̱ne̱ cinanni, kar zin i̱llo̱i̱ gool ci ovvo ol ne̱ke̱ odonge e̱le̱tti̱ ngati ogone li̱ngli̱ngo̱n neci ele kogonni anna ko̱. 13Iróng ol ne̱ke̱ e̱e̱ggi̱n to̱ni̱a̱k cik Ki̱ri̱sto̱ de̱de̱. Alaba nege ol azi ne ke̱e̱ggi̱nna̱ to̱ni̱a̱k cik Ye̱su̱. 14Iróng zin annit a̱ma̱li̱le̱ oo zo̱ze̱ necu, eci Sitani bu̱k ogon ele ki ci een anjilo ci Ta̱mu̱ta̱dde̱no̱. 15Iróng wo̱ye̱ ka̱ku̱le̱k je̱e̱n gi̱i̱ye̱ necu, a̱gga̱ to̱ni̱a̱ha̱ cik lo̱rye̱nto̱ uhu e̱le̱tti̱ azi ne kogonna kaal cik abunna. Ngen atin Ta̱mu̱ta̱dde̱n apahek anjilonya cik lo̱rye̱nta̱k lo̱ki̱ko̱ kaale ne̱ko̱ i̱i̱te̱n co̱de̱.

Apirna Pa̱u̱lo̱ zo̱ze̱ ci Ki̱ri̱sto̱

16Iróng anna korongi e̱e̱t imma ngatinno̱ng ci i̱no̱n azi ne ke̱e̱ni̱ anna tarbal. Abarik ming anyak e̱e̱t ci i̱no̱n niko, inya zin kize tarbal kar bo̱do̱k kodong ele idic. 17Ming kodongi anna ele, kodongi kize e̱e̱t ci tarbali, iróng kodongi ele ngati Manyi. 18Ming anyak ol u̱gge̱ cik orong kodongit e̱le̱tti̱ kaale cik u̱tu̱gu̱zzo̱ nege, kodongi atin anna bu̱k ele. 19Ming i̱no̱nnu̱ niga egenyyu oroot niko, abarik atali ngati abakku ki de̱me̱zzo̱k wak tarbalik. 20De̱de̱ anyikku niga ol wak a̱vvu̱ orong ku̱tu̱gu̱ze̱u̱ng kaal cik a̱a̱nyu̱ng izet du̱cca̱k, ogorozzung, aminyyung, kar kapanttung ngu̱mti̱ cuggo̱k. 21Eci adaka annit a̱li̱ya̱ni̱ kar kizetta ne iróng naga kokkomna zo̱ze̱ neci.

Ming odong nege e̱le̱tti̱, anna bu̱k, ma̱i̱je̱ ngatu, een gi̱i̱ ci tarbali kar ku̱tu̱gu̱. 22Ming e̱e̱ggi̱n nege olli I̱bu̱ru̱, ke̱e̱ni̱ anna bu̱k ol ne̱ke̱. Ming e̱e̱ggi̱n nege olli Israilo, ke̱e̱ni̱ anna bu̱k. Ming e̱e̱ggi̱n nege doolik Aburahami, ke̱e̱ni̱ anna bu̱k do̱le̱c ci do̱le̱c ci Aburahami.#11:22 Aburaham: Awu Ta̱mu̱ta̱dde̱n nonno abunna ming uungnek boor ki lo̱o̱c cinne lo̱o̱c kar kunu Ta̱mu̱ta̱dde̱n rok lo̱o̱c ci een jor. I̱ki̱ya̱ enne ize be̱e̱ti̱ olli Ya̱u̱do̱. Abak enne e̱rki̱nya̱ i̱bbo̱ng co̱de̱ ki obet tu̱rge̱ (1,800) baling ngen Ye̱su̱ ki̱ti̱rra̱i̱ ke̱. IkebKananet 12-26. 23E̱e̱ggi̱n nege de̱de̱ to̱ni̱a̱k cik Ki̱ri̱sto̱? Ke̱e̱ni̱ anna e̱e̱t ci adaka ngamoni ming kozozi niko ko̱, abarik ka̱li̱ngli̱ngo̱ni̱k nonno kommog nogo do̱o̱k. Ki̱li̱ngli̱nga̱ oroot, a̱ju̱ke̱ka̱ ol lagam lak cik meelek giir zo̱ze̱ ci Ki̱ri̱sto̱. Ki̱bi̱ce̱ a̱lle̱ne̱ kize daizoit. 24U̱ru̱kta̱ olli Ya̱u̱do̱ annit a̱lle̱ne̱ lak moten i̱i̱yo̱ ki torkoc. 25Kar bo̱do̱k aciiri cik Romi ki̱bi̱cca̱ annit lak i̱i̱yo̱, i̱i̱te̱n imma ovoca moddena cigannik biyene, apakce i̱bo̱ ci keerona lak i̱i̱yo̱ nyatapare ci a̱ddi̱ki̱re̱ orgena ka̱vvu̱ maame ecito, katavane anna maame ba̱a̱li̱n ki wazin. 26Ming keeroni gon kokko o̱ro̱gjo̱we̱, kabaza gon anna ele cinanni. Kamuda pirnanet ngati kettede nyatapar ci a̱ddi̱ki̱re̱, karumona gon ki ogoryak wak aam ol kaal. I̱i̱te̱n imma karumona ki ol wagannik e̱le̱tti̱ cik aanya pirnanet. I̱i̱te̱n imma olli Ya̱u̱do̱ e̱le̱tti̱ cik orong a̱ru̱ka̱ annita icima i̱do̱ngi̱ cik iróng een Ya̱u̱d. Kabaza ele o̱ro̱gjo̱we̱, ki balala, ki liila, ki bo̱do̱k ngati ol wak alaba ol azi ne ke̱e̱ggi̱nna̱ olli Ta̱mu̱ta̱dde̱no̱. 27Ka̱li̱ngli̱ngi̱ gon oroot kipira, ki̱zze̱c rok ungnyak. Kowo kodok keng kak i̱llo̱i̱ rok maam cik kaudi. Audda gon lajo oroot eci i̱llo̱i̱ ru̱u̱m ci kabungenne. 28Imma zo̱ze̱ ci kamuda ko̱ do̱o̱k, bo̱do̱k, kapirna odohize, abile zinin je̱e̱na̱ zo̱ze̱ ci ol wak a̱tu̱ Ta̱mu̱ta̱dde̱n ke̱le̱ci̱a̱nya̱i̱. 29Ming anyak e̱e̱t imma ci iróng a̱tu̱we̱ ju̱rru̱m, ki̱no̱ni̱ anna nonno oroot, korongi keela. Ming anyak e̱e̱t ci a̱tu̱we̱ alaba ol wak a̱tu̱we̱ kabaccit zoz, ka̱bu̱ri̱ zin anna nong oroot.

30Ming korongi kodong ele, kodongi atin ele kaale cik iróng anna kogonni ju̱rru̱m. 31Ka̱du̱wa̱ zoz ci een de̱de̱, i̱tto̱ni̱k Ta̱mu̱ta̱dde̱n Be̱e̱ti̱ Manyi Ye̱su̱, abunna kinnat Ta̱mu̱ta̱dde̱n udut, a̱gga̱ enne iróng anna kovolongi. 32Baling kaave o̱rge̱ ci een Damascus ko̱, u̱du̱wa̱k ddi̱ki̱ryo̱i̱ti̱ ci gaalau bali aarik alaan Aretas lecer ke̱ aciir ciginnek abunna ming ebek aran ci olli Demascene, kar atin ka̱gga̱mtta̱n ming kokko anna kiyowa o̱rge̱ neci. 33Eelttawa gonogga, arika dho̱ngku̱ ci anyak baruc ci wu̱u̱ni̱ kar zin ka̱gga̱mi̱t ta̱dde̱na̱, kar kiyoktai lopildinga, bak ungna idic rok lo̱o̱c a̱lu̱wa̱ eci re̱e̱nu̱no̱. Kar anna ki̱vi̱r niko.

Currently Selected:

2 Ko̱ri̱nto̱ 11: tex

Highlight

Copy

Compare