Markus 16

Puang Isa tuo pole'

16:1-8

(Matius 28:1-8; Lukas 24:1-12; Yahya 20:1-10)

1Ia tonna mangkamo Allo Katorroan, malemi Maryam Magdalena, Maryam indona Yakub na Salome nnalli minynya'-minynya' busarungngu' la naminynyakan batang rabukku-Na Puang Isa. 2Melambi'pa tonna mane' ollong allo joo allo Aha', malemi tuu lako baine lako liang. 3-4Sipangkada-kadami jio tangnga lalan nakua, “Indamora to la llentenanki' dau joo batu petungu' liang?” Nasaba' gaja tonggo joo batu. Apa ia tonna ratumo lako, nakitami mangkamo dilentenni. 5Ta'pa tarruhmi tama liang. Apa gaja sabakanni, sanga ngkitai tokallolo mangpakean baju malando mabuccang cumadokko jio sa'de kanan.

6Mangkadami joo tokallolo nakua, “Danggi' mimalaja'! Kuissen kumua nnangah kamu' Puang Isa to-Nazaret, to mangka dipampang. Te'damo Ia ntee! Tuo pole'mi Ia. Kitami tee ngenan dinii mbujuhhi. 7Ia tee too, malemo kamu' madoi' mpauanni to anak gurun-Na Puang Isa sola Petrus kumua, ‘Malemi njoloi kamu' re' tana Galilea, na jiopa la minii ngkitai, susi to mangka napauan kamu'.’ ” 8Messunmi lan mai joo liang, nata'pa sikinjarasan, nasaba' gaja sabakanni na silajatan tooi. Te'da bang tau napauan apa to mangka jaji, sanga malaja'i.#16:8 Anggemi ntee pangnguki'na Markus to diampuipa ia joo wattu. Ia to diampa' undi, iamo tee aya' 9-20. Den unapa diampa' undi pole'pa, la'bih bondi' ia kadanna na ia to diampa' jolo, iamo tee aya' 9-10: [ 9 Napendete'i tuu lako baine to Petrus sola solana, anna pebondi' bangngi ncuritai ia ngasan to apa napauanni joo tokallolo. 10 Ia tonna mangkamo joo, nasuami Puang Isa to anak gurun-Na male mpangpeissenanni to Kareba Kasalamatan tangmangnganggean jio mai Puang Allataala mangpamula jio mai kadellekan sanggenna kalambunan. Ia tee kareba mattantumo nang la jaji.]

Puang Isa mpangpekitan kalena lako Maryam Magdalena

16:9-11

(Matius 28:9-10; Yahya 20:11-18)

[ 9Ia tonna tuo pole'mo Puang Isa, allo Aha' melambi', mpangpekitanmi kalena lako Maryam Magdalena. Ia joo Maryam, mangka nanii Puang Isa nnula'i pitu setang. 10-11Malemi Maryam Magdalena mpauanni to tonturu' Puang Isa, to da'tan bangpa masussa nakumarrak kumua, “Ee, tuo pole'mi to Puang Isa, nakukitamo aku'.” Apa ia tonna sa'ding joo kadanna Maryam Magdalena, kumua tuo pole'mi to Puang Isa, te'da nakatappa'ii.

Puang Isa mpangpekitan kalena lako dua anak gurun-Na

16:12-13

(Lukas 24:13-35)

12Ia tonna mangka omo joo, laen omi carana Puang Isa mpangpekitan kalena lako dua tau to nturu'mi, tonna lan kalingkanna sola dua mangnguju lako mesa' kampong. 13Jaji, ta'pa polemi sola dua, anna curitai joo kajajian lako solana, apa te'da nakatappa'ii joo curitanna.

Puang Isa mpangpekitan kalena lako sangpulo mesa anak gurun-Na

16:14-18

(Matius 28:16-20; Lukas 24:36-49; Yahya 20:19-23; Jamanna Rasulu' 1:6-8)

14Mangkatampakanna mpangpekitanmi kalena Puang Isa lako sangpulo mesa anak gurun-Na, tonna kumande. Nacaccai Puang Isa, nasaba' kamembattukan penawanna nacia' ngkatappa'i curitanna to tongkitami kumua tuo pole'mi Ia. 15Anna kuanni nakua, “Malemo kamu' lako a'pa' sulapa'na lino, mpangpeissenanni to Kareba Kasalamatan jio mai Puang Allataala lako sininna rupa tau. 16Ia to tongkatappa'ii na dijio', la salama', nasaba' te'damo nadireken to salana, apa ia to tote'da nakatappa'ii la nasessa Puang Allataala. 17Ia to tau matappa' la ntarima kuasang-Ku' la mpugauk tanda mejangngaran, nnula'i setang, na mangkada mpake basa to te'da naissenni. 18Ianna ntoe ulah bolong, ba'tu nniso' racun, te'da namatumba. Ianna kaka'i tuu lako tomasaki, la malagah.”

Puang Isa tiangka' de' suruga

16:19-20

(Lukas 24:50-53; Jamanna Rasulu' 1:9-11)

19Ia tonna mangkamo Puang Isa sipangkada sola anak gurun-Na, tiangka'mi de' suruga, na cumadokko jio sa'de kanan-Na Puang Allataala. 20Malemi joo anak gurun-Na Puang Isa mpangpeissenanni to Kareba Kasalamatan lako sulapa'na lino. Na Puang tuli ntulungngi lan jamanna, mpugaukki to tanda mejangngaran, la menjaji butti kumua tongan ia to apa napau.]

Currently Selected:

Markus 16: mvpAD

Highlight

Compare

Copy