Efesus 1

Passallang

1:1-2

1Ee, tomala'bihku' sola ngasan, tomatappa' na tonturu' Puang Isa Almaseh jio kota Efesus!#Jamanna Rasulu' 18:19-21, 19:1 Ia tee sura' pole jio mai aku' Paulus, rasulu'-Na Puang Isa Almaseh situru' pakkaeloran-Na Puang Allataala.

2Dennaa upa' nabarakka'i kamu' Ambe'ta' Puang Allataala sola Puang Isa Almaseh, naben kamu' kamasannangan.

Nabarakka'iki' Puang Allataala, nasaba' Puang Isa Almaseh

1:3-14

3Pakala'bihhi Puang Allataala, Ambe'-Na Puangta' Puang Isa Almaseh! Iamo mangka mbenki' sininna barakka' jao mai suruga, nasaba' memmesa'miki' sola Almaseh.

4Napakamoja'ki' Puang Allataala. Napileimiki' tonna te'dapa nadipaden tee lino nasaba' Almaseh, antawa'ding menjaji tau mesan-Na nate'da caccata' ba'tu kakuranganta'. 5Ia joo wattu napattantu jolomiki' Puang Allataala kumua la diangka'ki' menjaji anakka-Na situru' pakkaeloran-Na nasaba' Puang Isa Almaseh. Iamo nanii pajan to pangpakamoja'-Na. 6Pakala'bihhi Puang Allataala, nasaba' pangpakamoja'-Na to te'da susinna. Manassa to pangpakamoja'-Na, nasaba' nabenmiki' Anak to napakamoja'.

7Mangkamiki' nala'bak Puang Allataala jio mai kuasa dosa, battuananna didampanganmiki', nasaba' kita'ra namate to Almaseh.#Kolose 1:14 8Napugaukki Puang Allataala susi joo, nasaba' liwa'ki' napakamoja'. Liwa' mandalan tangngah namacca to Puang Allataala! 9Situru' ia pakkaeloran-Na, napaissennimiki' akkatta-Na to tangnaissen tau tonna anu'. Na ia tonna te'dapa nadipaden tee lino, pura napattantu kumua Almasehra la mpugaukki joo akkatta-Na. 10Ia to akkatta-Na kumua sininna apa la jao suruga, la lanna lino, la menjaji mesa' na Almaseh menjaji kapalana. La napugaukki Puang Allataala joo ke nadete'mi wattunna.

11Ia to napugauk-Na Puang Allataala, napasituru' tarruhhi akkatta-Na sola pakkaeloran-Na to pura napattantumo. Ia tonna te'dapa nadipaden tee lino napileimiki', sanga madoangngi antamenjaji umma'-Na, nasaba' memmesa'ki' sola Almaseh. 12Napugaukki susi joo anna ia tee kami' to-Yahudi to pamulanna mangrannuan lako Almaseh, mpakala'bih Puang Allataala to mala'bih.

13Susi todamo kamu' tommisa'dingmo kareba tongan jio mai Puang Allataala, iamo to Kareba Kasalamatan, menjajimo kamu' umma'-Na ammidipasalama'. Ia tommimatappa'mo lako Almaseh, dibenmo kamu' Roh Allataala to nabasse tonna anu', menjaji butti kumua umma'-Namo kamu'. 14Ia joo Roh Allataala buttinna kumua la tatarimamo to apa nabasse Puang Allataala lako umma'-Na. Battuananna, iamo tanii ngkanassai kumua la nala'bak tonganki' Puang Allataala kita' tee umma'-Na. Napugaukki susi joo antapakala'bih Puang Allataala to mala'bih!

Massambajangngi Paulus kumua antaissenni to barakka' napasadianki' Puang Allataala

1:15-23

15Iamo joo anna ia tongkusa'dingngi kumua matappa'mo kamu' lako Puang Isa, na sipakamoja' kamu' sininna umma'-Na Puang Allataala, 16mangkurru sumanga' tarruh bangna' lako Puang Allataala nasaba' kamu', ke kupassambajangan o kamu'. 17Kupassambajangan kamu' lako Puang Allataala, Ambe' mala'bih, Puang-Na Puangta' Puang Isa Almaseh, anna ia to Roh Allataala mben kamu' kapaissenan, ammiwa'ding nnissen tonganni to Puang Allataala. 18Kupassambajangan too kamu', napapahangngi kamu' Puang Allataala, ammiwa'ding nnissenni to apa mirannuan jio mai Puang Allataala to mangka mpilei kamu' menjaji umma'-Na. Ammiissenni kumua liwa' melo to apa nabasse Puang Allataala lako umma'-Na. 19Ammiissen tooi kumua tangdikulle mpikkiri'i to kuasan-Na Puang Allataala ntulungki' to tomatappa' lako kale-Na. Liwa' mejangngaran joo kuasan-Na. 20Iamo joo kuasa to mangka napake mpatuo pole' Almaseh jio mai kamatean, napacadokkoi jao cadokkoan mala'bih jio sa'de kanan-Na jao suruga anna mangparenta sola.#Zabur 110:1 21La'bih majao ia to torroan-Na Almaseh na ia to torroanna sininna kuasa ba'tu kaparentan jao langi' na lan lino, ba'tu laenna to dikita majao, la tuona tee too, ba'tu ia ke jio ahera'. 22Nabenni Puang Allataala to sininna apa nakuasaii Almaseh, na iamo menjaji kapalana sininna tomatappa' lako. Iamo susi ulu,#Zabur 8:7 23na ia to tomatappa' susi batang kale-Na. Ia to tomatappa' mpasukku' Almaseh na ia to Almaseh mpasukku'i to sininna apa.#Kolose 1:18

Currently Selected:

Efesus 1: mvpAD

Highlight

Copy

Compare