Amos 9
9
Pengkita mangpellima: Pangsessa jio mai Puang Allataala
9:1-6
1Kukitai to Puang Allataala ke'deh siandah ngenan passompan Namangkada Nakua, “Peandongngii pa'tong to tampak ariri bola-Ku' jaoanna natiroge ratu do' batu aririnna, naro'pokkii to tau lan namate. Na ia to te'da namate, la mate lan kapararian, moi mesa' te'da la nasala. 2Moi namembuni jiong lino tomate iarika male de' langi', nang la Kuampa'i. 3Moi namale membuni de' potok Buntu Karmel, nang la Kuula'i Kujokkoi. Moi na la male membuni do' tasik mandalan, la Kusuai to ulah ntittoi. 4Moi nabawai ewana la napali', nang la Kupangpepateanni. Nang la Kuakkattai llanynya'ii na te'da Kulantulungngi.”
5Tiroge to lino,
na masussa ngasan to tau,
nasaba' Natemme'i PUANG Allataala to makuasa.
Ia to sininna padang tiroge,
susi Sa'dan Nil to den wattunna naendek na den wattunna namere.
6Ia ngkabua' bola-Na jao langi',
Napupellesei to batu aririnna jiong lino.
Ia too to mparatu wai saba' jiong mai tasik Nabolloanni de' gantanan.
Ia joo, PUANG Allataala ngasan mpugaukki.
Te'da nakullei to to-Israel mpessalai pangsessa
9:7-10
7Mangkada-I PUANG Allataala Nakua, “Ee kamu' to-Israel, Kuparakai kamu' susi to-Etiopia Kuparakai. Kusolan kamu' jio mai tana Mesir, susi to-Filistin Kusolan jio mai Kreta, na to-Siria jio mai Kir. 8Aku' PUANG Allataala tatta' bang ngkitai to dosana to-Israel. Nang la Kusessai Kulanynya'ii, apa te'da Kulalanynya'i ngasanni.” Susimi joo kadan-Na PUANG Allataala.
9Mangkada-I Puang Allataala Nakua, “Ia to to-Israel to torro lan tangnga bangsa laen, la Kupupessarakki jio mai togaja' sipa'na susi pande batu mangtanda' kassi'. Na susi batu to torrona, susimi joo to togaja' sipa'na dipatorro leko' la disessa. 10Den tomadosa lan tangnga-tangngana umma'-Ku' mangkada kumua, ‘Te'da Nalanneloranki' Puang Allataala nakanna abala'.’ Apa sitonganna la dipatei ngasan lan kapararian.”
Puang Allataala la nnaddampangan pole' umma'-Na
9:11-15
11Nakua Puang Allataala, “La den wattunna Kulampake'deh pole'i to kaparentanna Raja Daud, to mangka dilanynya'i. Susi tau mpemeloi bola to mangka ro'pok, susi toomi joo kaparentanna Raja Daud Kupaden pole' susi tonna jolona. 12Na kamu' to-Israel la mparentai to tau torropa jio Edom sola sininna bangsa laen to menjajimo umma'-Ku'.” Susimi joo to la Napugauk PUANG Allataala, situru' kadan-Na.#Jamanna Rasulu' 15:16-18
13Nakua PUANG Allataala, “Pesa'dingngii, la den wattunna na te'da ka'tunna to tau megandum sola meanggoro', saba' liwa' budanna to assele' bara'bah, arannai ia to wai anggoro' silolongan bangmo susi wai lolong jao mai buntu. 14Kupapole pole'i to umma'-Ku' to-Israel jio mai to dinii mpali'i, Kupemeloi pole'i to katuoanna. Napake'deh pole'i to kotana mangka dilanynya'i to la nanii torro. Namane' ntanannii anggoro' to bara'bahna sola tananan membua nakandei to assele'na. 15La Kupatorro tarruhmo to umma'-Ku' jio tana mangka Kubenni, nate'damo Kulampalelei.” Susimi joo kadan-Na PUANG Allataala to misompa.
Currently Selected:
Amos 9: mvpAD
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
