Genesis 50
50
Jacob-kenh alerikw-rnemel renh awenng-warl akwerneyel
1Joseph ra artnek-anem aynikw-anem atnyenek, arrwantyek. 2Egypt-areny akalty ingkerrenh anek, arrewaly anterel apernetyek. Rernem arlta 40-ek-atwety alakenh-anyem mpwarek. 3Rernem atnalhelerrenh arlta 70-ek-atwety artwamp ikweran. Joseph-el artwa ilanthek arrewaly renh anterel apernetyek rag-el ataperrelemel.
4Rernemarl amperrngirrek-penh, Joseph Egypt-areny Atyetyart-rnem-warl angkek, “Arrantherr apek atyeng inkwerelhentyan, arrantherr Pharaoh renh ayernenherr-arey. 5Akngey atyenh ilweyew-athath, atha renh alhelek, intey apmer Canaan-itwek renh akwernetyek.”
6Pharaoh-el renh ilek, “Akngey ngkwenh akwerna, ntwarl renh ilek-angkwarr-antey akwernetyek.” ...
12... Jacob-kenh alerikw-rnemel irrkaty-angkwarr mpwarek, rarl renh-rnem ilek-angkwarr-antey. 13Apmer irrkaty Machpelah intey ikwer-itwek-antey Abraham-el Ephron, Hitt-kenh payemelek-itwek, renh akwernek. 14Rernemarl atnalhelirrek-penh awayenheng rernem Egypt-warl-anem alpek.
Joseph-el awayikw ikwerenh-rnem ileyel
15Aynikw ikwerenh-rnem-kenh ilwek-penhan rernem angkerrenh, “Joseph anwekingkerr ahelirrekerr wenh, ra anwenhingkerr atwekerr.” 16Rernem thwenek artwa angkakert Joseph ikwer-warl. Ra iley-alhek, “Aynaynwekingkerr ilwey-alentyel, wetharl anwekingkerr ilerlelpek, 17‘Arringkerr Joseph ayernetyek, mwerrant-arey arringkerr anetyek, arringkerrarl apmwel-areth ikwer anenh.’ ” Ra angka awek-penh, Joseph artnek-anem.
18Awayikw ikwerenh-rnem ikwer-warl apetyek, angkey-alhemel, “Anwingkerr ngkwenh warrkenh-anemarl.”
19Joseph-el renh-rnem ilek, “Aterirrey-angenh. Ayengan Akngey-wenyarl. 20Arringkerr atyeng ilkelhey-angenh irrek Egypt-areny-rnem ayenh anthemel. Akngeyel ayenh arntarnt-arekarl. Atyeng-angkwarran Akngeyel ikwerenh-rnem arntarnt-arek, itethilek. 21Alakenh-anyem-kety arringkerr aterirrey-angenh anetyek. Atharl arrenhingkerr arntarnt-arem, aler arrekingkerrenh-rnem-then. Ikwer-penhan rernem mwerrant-arey-anem anenh.”
Joseph ilweyel
22Joseph apmer Egypt ikwer-itwek anenh, awayikw-rnem-akert. Joseph aherrety 110 anenh, artwa ampwanem. 23Ra Ephraim-kenh arreng-rnem arek, Manasseh-kenh alerikw Makir.
24Joseph ra awayikw ikwerenh-rnem ilelhek, “Arrer-anem ayeng ilwetyek-anem. Akngeyel anwenhingkerr arntarnt-arem, apmer rarl Abraham ingkerrenh alhelek ikwer-warl, Abraham-ek, Isaac-ek, Jacob-ek.” 25Rap renh-rnem ilek, “Arringkerr arraty ayenh iletyek. Ayeng ilwenty, arrewaly ayenh aknga Akngeyel arrenhingkerr atnwenheyneyel apmer Canaan ikwer-warl, ikwer-itwek akwernetyek.” Kel rernem renh arraty ilek.
26Joseph aherrety 110 irrekel-anem, ra ilwek. Rernem arrewaly anterel-anem apernek, rag-el ataperrelemel, coffin-warl arrernemel.
Currently Selected:
Genesis 50: aly
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
