Марԛос 16

Иса жь мьрьне рʼадьбә

(Мәтта 28:1-8; Луԛа 24:1-12; Йуһʼәнна 20:1-10)

1Пәй рʼожа шәмийерʼа Мәрйәма Мәждәлани, Мәрйәма дийа Аԛуб у Сәлома чун бьһарәт кʼьрʼин, ԝәки һәрʼьн ль щьнйазе Иса дьн. 2Рʼожа һʼәфтийейә пешьн сәре сьбәһе зу, ԝәхте рʼо дәркʼәт, әԝ чунә сәр тʼьрбе. 3Ԝана рʼева һәврʼа дьгот: «Кʼи ԝе бона мә кәвьр жь бәр дәре тʼьрбе һол кә?» 4Чьмки кәвьр гәләки мәзьн бу. У гава кӧ ль жоре ньһерʼин, дина хԝә дане, кӧ кәвьр жь бәр һол кьри йә. 5У чахе чунә һьндӧрʼе тʼьрбе, дина хԝә дане, хортәки чӧхе сьпи ԝәргьрти ԝе ль алийе рʼасте рʼуньшти йә. Кʼӧлфәт гәләк зәндәгьрти ман. 6Ле әԝи ԝанрʼа гот: «Зәндәгьрти нәминьн! Һун ль ԝи Исайе Ньсрәте дьгәрʼьн, Йе кӧ һатә хачкьрьне. Әԝ жь мьрьне рʼабуйә! Әԝ нә ль вьр ә. Ва йә әԝ щийе кӧ Әԝ ле данибу. 7Дә ньһа һәрʼьн бежьнә шагьртед Ԝи у Пәтрус, кӧ Әԝе бәри ԝә һәрʼә Щәлиле. Ль ԝьр һуне Ԝи бьбиньн, чаԝа кӧ Әԝи ԝәрʼа готийә». 8Әԝ кʼӧлфәт жь тʼьрбе дәркʼәтьн рʼәвин, чьмки рʼьсасе әԝ гьртьбун у дьләрьзин. Кәсирʼа жи тьштәк нәготьн, чьмки саԝе ль ԝан гьртьбу.

Иса Хԝә нишани Мәрйәма Мәждәлани дькә

(Мәтта 28:9-10; Йуһʼәнна 20:11-18)

9Гава Иса рʼожа һʼәфтийейә пешьн сьбәһе зу жь мьрьне рʼабу, Ԝи пешийе Хԝә нишани Мәрйәма Мәждәлани кьр, йа кӧ һʼәфт щьн же дәрхьстьбу#16:9 Нав һьнәк дәстньвисар у ԝәлгәрʼандьнед кәвьнда жь рʼеза 9-а һʼәта йа 20-и тʼӧнәйә. . 10Әԝе жи чу әԝ йәк гиһандә әԝед кӧ тʼәви Иса гәрʼийабун, кӧ шин дькьрьн у дьгьрийан. 11Ле гава ԝана бьһист кӧ Иса сах ә у Хԝә нишани Мәрйәме кьрийә, баԝәр нәкьрьн.

Иса Хԝә нишани дӧ шагьртед Хԝә дькә

(Луԛа 24:13-35)

12Пәй ван йәкарʼа Әԝи Хԝә дьлԛәки дьнда нишани жь ԝан дӧда кьр, йед кӧ дьчунә кʼәԝшен. 13Әԝана жи чун әԝ хәбәр гиһандьнә йед майин. Ле готьна ԝан жи баԝәр нәкьрьн.

Иса Хԝә нишани йанздәһ шагьрта дькә

(Мәтта 28:16-20; Луԛа 24:36-49; Йуһʼәнна 20:19-23; Кʼаред Шандийа 1:6-8)

14Пәй ве йәкерʼа Иса Хԝә нишани йанздәһа кьр, гава әԝ ль сәр сьфре рʼуньштьбун. Әԝи ль ԝан һьлат бона нәбаԝәри у сәрһʼьшкийа ԝан, чьмки ԝана йед кӧ Әԝ жь мьрьне рʼабуйи дитьбун баԝәр нәкьрьн. 15У ԝанрʼа гот: «Һәрʼьнә һәр чар алийед дьнйайе у Мьзгинийе бьдьнә һәр мәрьви. 16Әԝе кӧ баԝәр бькә у бе ньхӧмандьне ԝе хьлаз бә, ле әԝе кӧ баԝәр нәкә диԝана ԝи ԝе бьбә. 17Әԝе кӧ баԝәр дькьн, әв нишане ԝанрʼа дийар бьн: Бь наве Мьн ԝе щьна дәрхьн, бь зьманед ну ԝе хәбәр дьн, 18ԝе мәʼра бь дәсте хԝә бьгьрьн у һәгәр әԝ тьштәки жәʼр жи вәхԝьн, тʼӧ зьраре ль ԝан нәбә. Әԝе дәстед хԝә дайньнә сәр нәхԝәша у нәхԝәше ԛәнщ бьн».

Жорһьлатьна Иса

(Луԛа 24:50-53; Кʼаред Шандийа 1:9-11)

19Аԝа Хӧдан Иса пәй ԝе хәбәрдана тʼәви ԝанрʼа һьлкʼьшийа әʼзмен у ль мьле Хԝәдейи рʼасте рʼуньшт. 20Шагьрт жи чун, ль һәр щийи даннасин кьрьн. Хӧдан пьштоване ԝан бу у бь ван нишана хәбәра Хԝә дьда избаткьрьне, кʼижанед кӧ бь дәсте ԝан дьбун.

Currently Selected:

Марԛос 16: KmrNTC

Highlight

Copy

Compare