ZƐKARƖYA 7
7
Má kɛŋ wʋtɩtɩɩ aa fá nɩaa nenige, nii-vɔbʋŋ dee
1Daarus sɩ dii kuoruŋ ʋ jɩ-nɛsɛ lɛ nɛ La TƖƖNA bʋl wɩaa pɩ Zɛkarɩya chɛŋ-nibi tʋɔŋ tapʋlaa banɛsɛ chɛɛŋ, chɛnɛ-la ba sɩɩ yɩrɛ Kɩsɩlɛf nɛ ŋɩɩ. 2Bɛtɛl nɩaa fa tɩŋ Sarɛza arɩ Regem-Mɛlɛk nɛ, a pɛ ba nɩaa dɔnsʋŋ lɛ dɩ ba mʋ chɛ na wɩɩ-la La TƖƖNA sɩɩ chɛ. 3Dɩ ba pɩɛsɛ Wɩɩsʋllɩ sɩpaalaaraa sɩ hɛ La TƖƖNA doluŋ kala Tɩɩna dɩa lɛ arɩ Wɩa wʋlaabʋllaa wɩɩŋ deeŋ, “Ʋ maga dɩ la ha yel aŋ vɔɔ niiŋ chɛŋ-nɔŋ lɛ arɩ ŋɩɩ la sɩ vɛnɛɛ ŋaa jɩ-daŋ-la sɩ bala lɛ nɛɛ?”
4Ŋɩɩ nɛ La TƖƖNA doluŋ kala Tɩɩna bʋla pɩmɛ: 5“Pɩɛsɛ tintee-la nɩaa arɩ Wɩɩsʋllɩ sɩpaalaaraa kala: Ma sɩ vɔɔ niiŋ a yel chɛŋ-nɔŋ arɩ chɛŋ-pɛɩ tʋɔŋ jɩsɩŋ mahɩŋ batori arɩ fii-la kala sɩ bala lɛ, mɩ wɩaa nɛ ma sɛnɛ vɔɔ nii-la? 6Ma fa sɩ yie gbiele dii kɩaa aŋ nyʋnyʋa kɩaa, ma tɩtɩa dee ma ŋaa wɩaa deemba a pɩpaa? 7Wɩɩ-la tɩtɩa mɩ-na ma TƖƖNA sɩ to mɩ wʋlaabʋlla-la sɩ laa sɩpaaŋ kɔ, bʋa-la lɛ Jerusalɛm arɩ ʋ tasɩ-la sɩ gollu fa sɩ kɛŋ nɩaa yʋgɛ ba hɔŋ sɔm a kɛŋ dʋa, a pɛ wɩɩpɔsʋŋ nadiiŋ dɩɩrɩŋ arɩ wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ a bʋl nɛ ŋɩɩ.”
8La TƖƖNA bɩra bʋl wɩaa a pɩ Zɛkarɩya: 9Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Má leŋ dɩ wʋtɩtɩɩ chaasa chɩŋ ʋ bʋa lɛ. Má fɩfá nɩaa nenige, a fɩfá dɔŋɔba nisusuŋ. 10Má sɩ́ yo-haalaa, biisinsiŋ, nʋhʋɔraa arɩ summoo nyaga bil. Má sɩ́ wʋbɔŋŋɔɔ bɩɩnʋ a mʋʋ tɩgɛ dɔŋɔba lɛ.
11Ama ba vɩa dɩ ba jegile nɩɩ nɛ. Ba kɛŋ nyuduoŋ nɛ a joŋ harɩŋ yɩa wɩalɩŋ a bɩ chɛ ba jʋʋ ba dɩgɩlaa. 12Ba leŋe ba tʋɔŋ dol nɛ a nagɛ tabɩɩ-naŋkpachɩla a bɩ chɛ ba jegile nɩɩ wombie-la mɩ-na ba TƖƖNA sɩ bile dɩ ba tuto koo wɩalɩŋ mɩ-na ba TƖƖNA doluŋ kala Tɩɩna sɩ to mɩ Dɩma lɛ a bʋla pɩ mɩ wʋlaabʋlla-la sɩ laa sɩpaaŋ kɔ. Ŋɩɩ nɛ mɩ-na ba TƖƖNA doluŋ kala Tɩɩna faasa na baanɩŋ ba nyuŋ.
13Mɩ fa sɩ bʋl wɩaa pɩba, ba bɩ jegile nɩɩ, ŋɩɩ wɩaa ba ma sɩ yɩrɛmɛ, mɩ bɩ jegile nɩɩ.
Mɩ-na ma TƖƖNA doluŋ kala Tɩɩna nɛ bʋla. 14Mɩ leŋe pel-duo nɛ kɛmba pɩsa hɛ tinteyee lɛ, ba ŋaa nʋhʋɔra. Tintee-la fa pɩŋ hoi nɛ, nʋʋkala bɩ nɩmɛ ka mʋ koo a lɩɩ nɩmɛ kʋkɔ. Wɩalɩŋ ba sɩ ŋaa a leŋ tintee-zɔŋ-la pɩŋ hoi nɛ ŋɩɩ.”
Currently Selected:
ZƐKARƖYA 7: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
ZƐKARƖYA 7
7
Má kɛŋ wʋtɩtɩɩ aa fá nɩaa nenige, nii-vɔbʋŋ dee
1Daarus sɩ dii kuoruŋ ʋ jɩ-nɛsɛ lɛ nɛ La TƖƖNA bʋl wɩaa pɩ Zɛkarɩya chɛŋ-nibi tʋɔŋ tapʋlaa banɛsɛ chɛɛŋ, chɛnɛ-la ba sɩɩ yɩrɛ Kɩsɩlɛf nɛ ŋɩɩ. 2Bɛtɛl nɩaa fa tɩŋ Sarɛza arɩ Regem-Mɛlɛk nɛ, a pɛ ba nɩaa dɔnsʋŋ lɛ dɩ ba mʋ chɛ na wɩɩ-la La TƖƖNA sɩɩ chɛ. 3Dɩ ba pɩɛsɛ Wɩɩsʋllɩ sɩpaalaaraa sɩ hɛ La TƖƖNA doluŋ kala Tɩɩna dɩa lɛ arɩ Wɩa wʋlaabʋllaa wɩɩŋ deeŋ, “Ʋ maga dɩ la ha yel aŋ vɔɔ niiŋ chɛŋ-nɔŋ lɛ arɩ ŋɩɩ la sɩ vɛnɛɛ ŋaa jɩ-daŋ-la sɩ bala lɛ nɛɛ?”
4Ŋɩɩ nɛ La TƖƖNA doluŋ kala Tɩɩna bʋla pɩmɛ: 5“Pɩɛsɛ tintee-la nɩaa arɩ Wɩɩsʋllɩ sɩpaalaaraa kala: Ma sɩ vɔɔ niiŋ a yel chɛŋ-nɔŋ arɩ chɛŋ-pɛɩ tʋɔŋ jɩsɩŋ mahɩŋ batori arɩ fii-la kala sɩ bala lɛ, mɩ wɩaa nɛ ma sɛnɛ vɔɔ nii-la? 6Ma fa sɩ yie gbiele dii kɩaa aŋ nyʋnyʋa kɩaa, ma tɩtɩa dee ma ŋaa wɩaa deemba a pɩpaa? 7Wɩɩ-la tɩtɩa mɩ-na ma TƖƖNA sɩ to mɩ wʋlaabʋlla-la sɩ laa sɩpaaŋ kɔ, bʋa-la lɛ Jerusalɛm arɩ ʋ tasɩ-la sɩ gollu fa sɩ kɛŋ nɩaa yʋgɛ ba hɔŋ sɔm a kɛŋ dʋa, a pɛ wɩɩpɔsʋŋ nadiiŋ dɩɩrɩŋ arɩ wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ a bʋl nɛ ŋɩɩ.”
8La TƖƖNA bɩra bʋl wɩaa a pɩ Zɛkarɩya: 9Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Má leŋ dɩ wʋtɩtɩɩ chaasa chɩŋ ʋ bʋa lɛ. Má fɩfá nɩaa nenige, a fɩfá dɔŋɔba nisusuŋ. 10Má sɩ́ yo-haalaa, biisinsiŋ, nʋhʋɔraa arɩ summoo nyaga bil. Má sɩ́ wʋbɔŋŋɔɔ bɩɩnʋ a mʋʋ tɩgɛ dɔŋɔba lɛ.
11Ama ba vɩa dɩ ba jegile nɩɩ nɛ. Ba kɛŋ nyuduoŋ nɛ a joŋ harɩŋ yɩa wɩalɩŋ a bɩ chɛ ba jʋʋ ba dɩgɩlaa. 12Ba leŋe ba tʋɔŋ dol nɛ a nagɛ tabɩɩ-naŋkpachɩla a bɩ chɛ ba jegile nɩɩ wombie-la mɩ-na ba TƖƖNA sɩ bile dɩ ba tuto koo wɩalɩŋ mɩ-na ba TƖƖNA doluŋ kala Tɩɩna sɩ to mɩ Dɩma lɛ a bʋla pɩ mɩ wʋlaabʋlla-la sɩ laa sɩpaaŋ kɔ. Ŋɩɩ nɛ mɩ-na ba TƖƖNA doluŋ kala Tɩɩna faasa na baanɩŋ ba nyuŋ.
13Mɩ fa sɩ bʋl wɩaa pɩba, ba bɩ jegile nɩɩ, ŋɩɩ wɩaa ba ma sɩ yɩrɛmɛ, mɩ bɩ jegile nɩɩ.
Mɩ-na ma TƖƖNA doluŋ kala Tɩɩna nɛ bʋla. 14Mɩ leŋe pel-duo nɛ kɛmba pɩsa hɛ tinteyee lɛ, ba ŋaa nʋhʋɔra. Tintee-la fa pɩŋ hoi nɛ, nʋʋkala bɩ nɩmɛ ka mʋ koo a lɩɩ nɩmɛ kʋkɔ. Wɩalɩŋ ba sɩ ŋaa a leŋ tintee-zɔŋ-la pɩŋ hoi nɛ ŋɩɩ.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014