JOSUA 11
11
Iziral tɩŋŋaa yuo dii Kɛnaŋ tinteeŋ wɩɩpɔsʋŋ nagʋa kuoroo
1Hazɔ kuoro Jabɩŋ fa sɩ nɩa dɩ Iziral tɩŋŋaa yuo didii tasɩŋ ŋɩɩ, ʋ tɩma pɩ Madɔŋ kuoro Jobab, a tɩma pɩ Sɩmɩrɔŋ kuoro arɩ Akɩsaf kuoro, 2arɩ kuorie-la kala sɩ hɛ wɩɩpɔsʋŋ nagʋa dɩɩrɩŋ tasɩ-la peelee sɩ yʋga lɛ, a hɛ lee-la ba sɩɩ yɩrɛ Araba, Galilii mʋgʋ-bal-la wɩɩpɔsʋŋ nadiiŋ, arɩ wɩɩjʋʋlʋŋ dundollu-la sɩ hɛ peelee bʋbʋɔŋ a kpagɛ taŋ-la ba sɩɩ yɩrɛ Nafɔf Dɔɔ a hɛ mʋgʋ-balɩŋ niiŋ. 3Ʋ fa bɩra bʋla pɩ Kɛnaŋ tɩŋŋaa sɩ hɛ wɩɩpɔsʋŋ arɩ wɩɩjʋʋlʋŋ arɩ Amɔrɩ tɩŋŋaa, Hiti tɩŋŋaa, Pɛrɛs tɩŋŋaa arɩ Jebus tɩŋŋaa sɩ hɛ tintee-la peelee sɩ yʋga lɛ, arɩ Hivi tɩmma-la sɩ hɔŋ peel-la ba sɩɩ yɩrɛ Hɛmɔŋ bʋbʋɔŋ, a hɛ Mɩzɩpa tinteeŋ lɛ. 4Ba kʋ lɩɩ arɩ ba laalɩyuoroo kala arɩ janɩŋ arɩ ba janɩŋ torukoba, a yʋgɛ woruŋ a nagɛ hagɩlɩ-biee sɩ pɩŋ fuoŋ niiŋ. 5Kuoroo deemba kala fa kʋ hɛ dɔŋɔ lɛ nɛ a ŋmoo buguŋ Mɛrɔm fuo-bie-la leriŋ, dɩ ba yuo Iziral tɩŋŋaa.
6Ŋɩɩ nɛ La TƖƖNA fa bʋla pɩ Josua, “Sɩ́ leŋe dɩ fawʋllʋŋ kɛnɩŋ a tɩŋ nɩalɩŋ wɩaa, bɛɛ wɩaa chie bʋa deeŋ lɛ mɩ jaŋ jomba hɛ Iziral laalɩyuoroo nɩsɩŋ lɛ dɩ ma kpʋba. Ŋ jaŋ gbɛrɩgɛ ba janɩŋ kala aŋ nyɩgɛ ba janɩŋ torukoba.”
7Ŋɩɩ nɛ Josua arɩ ʋ laalɩyuoroo kala guu mʋ a yuoba Mɛrɔm fuo-bie-la leriŋ, 8La TƖƖNA fa jomba a hɛ Iziral tɩŋŋaa laalɩyuoroo nɩsɩŋ lɛ. Ba kire kpʋba ŋɩɩ a mʋ yi tabal-la ba sɩɩ yɩrɛ Sɩdɔŋ, a joŋo mʋ Mɩsɩrɛfɔf Meem, a to ŋɩɩ mʋ Mɩzɩpa fuonaa-la sɩ hɛ wɩɩpɔsʋŋ, a kpʋ ba kala, nɩbala ma bɩ ka. 9Josua fa ŋaaba ŋɩɩ La TƖƖNA sɩ dagʋ nɛ. Ʋ fa gbɛrɩgɛ ba janɩŋ kala nɛ aŋ nyɩgɛ ba janɩŋ torukoba ma.
10Josua fa mɩɩrɛ bʋa-la tɩtɩa lɛ nɛ a mʋ taŋ-la ba sɩɩ yɩrɛ Hazɔ a yuo dii ʋ dɩ ʋ kuoro kala. (Bʋa-la lɛ Hazɔ nɛ fa ŋaa tasɩ-la kala tʋɔŋ kʋbalɩŋ.) 11Nʋʋ na-kala sɩ hɛ taŋ-la lɛ, ba kala nɛ ba fa kpʋ. Ba kʋŋkala bɩ ka, aŋ nyɩgɛ Hazɔ kala.
12Josua fa yuo dii tabalaa deemba kala nɛ a kpʋ ba kuoroo arɩ ba nɩaa kala arɩ La TƖƖNA tɩntɩnna Mosis fa sɩ dagɛ ŋɩɩ. 13Ama tasɩ-la ba sɩ saa dundol-biisiŋ nyuŋ, Iziral laalɩyuoroo bɩ ba-na nyɩga. Hazɔ dʋndʋŋa nɛ Josua nyɩgɛ. 14Kɩalɩŋ kala fa sɩ hɛ tasɩŋ deemba lɛ nɛ Iziral laalɩyuoroo paa, a kɛsɛ ba pʋsʋŋ ma pɛ. Ama ba kpʋ nʋʋkala sɩ hɛ tasɩ-la lɛ nɛ, ba bɩ kʋŋ ka. 15La TƖƖNA fa sɩ dagɛ ʋ tɩntɩnna Mosis ŋɩɩ, ŋɩɩ tɩtɩa nɛ Mosis ma dagɛ Josua ʋ ŋaa. Wɩalɩŋ kala La TƖƖNA fa sɩ dagɛ Mosis, ba kala nɛ Josua fa ŋaa, ʋ bɩ ba kʋŋkala kere ta.
16Josua fa yuo a laa tinteeŋ deeŋ kala nɛ, tintee-la peelee sɩ yʋga, Nɛgɛf, Goseŋ tinteeŋ kala, dundollu-la sɩ hɛ peelee bʋbʋɔŋ wɩɩjʋʋlʋŋ dɩɩrɩŋ, Araba arɩ Iziral peelee arɩ ba dundolluŋ kala, 17a chɩŋ peel-la ba sɩɩ yɩrɛ Halak, sɩ hɛ Sɛɛ dɩɩrɩŋ, a kaa mʋ Baal Gad sɩ hɛ Lɛbanɔŋ fuonaa-la sɩ kpagɛ peel-la ba sɩɩ yɩrɛ Hɛmɔŋ. Leree deemba kuoroo kala nɛ ʋ fa yuo kɛsɛ, a kpʋ ba kala. 18Josua fa yuo kuoroo deemba a dieni nɛ woruŋ. 19Hivi tɩmma-la sɩ hɛ Gibioŋ lɛ dʋndʋŋa nɛ fa leŋe ba dɩ Iziral tɩŋŋaa pɛ niiŋ. Ama Iziral tɩŋŋaa fa bɩ leŋe ba dɩ tasɩ-la kʋŋkala pɛ nii, ba kala nɛ ba yuo dii. 20La TƖƖNA nɛ fa ŋaa tasɩ-la kɛŋ nyuduoŋ a yuyuo Iziral tɩŋŋaa ŋɩɩ, dɩ ʋ to ŋɩɩ lɛ a chaasa cheiba, a kpʋ ba kala aŋ sɩ́ ba nenige fá, arɩ La TƖƖNA fa sɩ bʋl ŋɩɩ pɩ Mosis.
21Bʋa-la lɛ nɛ Josua fa bɩra mʋ a chei Anakɩ tɩmma-la sɩ hɛ tintee-la peelee sɩ yʋga lɛ, a chɩŋ Hɛbʋrɔŋ, Dɛbɩ arɩ Anab, a kɛŋ ŋɩɩ mʋ Juda tintee-la peelee sɩ yʋga, arɩ Iziral tintee-la peelee sɩ yʋga. Josua fa chei lere-la arɩ tasɩ-la kala sɩ hɛ nɩmɛ nɛ. 22Anakɩ doho nʋʋkala fa bɩra tuo tinteeŋ lɛ, see tasɩŋ deemba: Gaza, Gaf arɩ Asɩdɔd dʋndʋŋa lɛ nɛ Anakɩ nɩaa mʋa ka. 23Josua laa tintee-la kala nɛ, arɩ La TƖƖNA fa sɩ dagɛ Mosis ŋɩɩ, a kaa kpaa a pɩ Iziral tɩŋŋaa doho doho-la ʋ ŋaa ba kʋŋ. Ŋɩɩ nɛ tintee-la nɩaa saa wiesi laalɩŋ lɛ.
Currently Selected:
JOSUA 11: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
JOSUA 11
11
Iziral tɩŋŋaa yuo dii Kɛnaŋ tinteeŋ wɩɩpɔsʋŋ nagʋa kuoroo
1Hazɔ kuoro Jabɩŋ fa sɩ nɩa dɩ Iziral tɩŋŋaa yuo didii tasɩŋ ŋɩɩ, ʋ tɩma pɩ Madɔŋ kuoro Jobab, a tɩma pɩ Sɩmɩrɔŋ kuoro arɩ Akɩsaf kuoro, 2arɩ kuorie-la kala sɩ hɛ wɩɩpɔsʋŋ nagʋa dɩɩrɩŋ tasɩ-la peelee sɩ yʋga lɛ, a hɛ lee-la ba sɩɩ yɩrɛ Araba, Galilii mʋgʋ-bal-la wɩɩpɔsʋŋ nadiiŋ, arɩ wɩɩjʋʋlʋŋ dundollu-la sɩ hɛ peelee bʋbʋɔŋ a kpagɛ taŋ-la ba sɩɩ yɩrɛ Nafɔf Dɔɔ a hɛ mʋgʋ-balɩŋ niiŋ. 3Ʋ fa bɩra bʋla pɩ Kɛnaŋ tɩŋŋaa sɩ hɛ wɩɩpɔsʋŋ arɩ wɩɩjʋʋlʋŋ arɩ Amɔrɩ tɩŋŋaa, Hiti tɩŋŋaa, Pɛrɛs tɩŋŋaa arɩ Jebus tɩŋŋaa sɩ hɛ tintee-la peelee sɩ yʋga lɛ, arɩ Hivi tɩmma-la sɩ hɔŋ peel-la ba sɩɩ yɩrɛ Hɛmɔŋ bʋbʋɔŋ, a hɛ Mɩzɩpa tinteeŋ lɛ. 4Ba kʋ lɩɩ arɩ ba laalɩyuoroo kala arɩ janɩŋ arɩ ba janɩŋ torukoba, a yʋgɛ woruŋ a nagɛ hagɩlɩ-biee sɩ pɩŋ fuoŋ niiŋ. 5Kuoroo deemba kala fa kʋ hɛ dɔŋɔ lɛ nɛ a ŋmoo buguŋ Mɛrɔm fuo-bie-la leriŋ, dɩ ba yuo Iziral tɩŋŋaa.
6Ŋɩɩ nɛ La TƖƖNA fa bʋla pɩ Josua, “Sɩ́ leŋe dɩ fawʋllʋŋ kɛnɩŋ a tɩŋ nɩalɩŋ wɩaa, bɛɛ wɩaa chie bʋa deeŋ lɛ mɩ jaŋ jomba hɛ Iziral laalɩyuoroo nɩsɩŋ lɛ dɩ ma kpʋba. Ŋ jaŋ gbɛrɩgɛ ba janɩŋ kala aŋ nyɩgɛ ba janɩŋ torukoba.”
7Ŋɩɩ nɛ Josua arɩ ʋ laalɩyuoroo kala guu mʋ a yuoba Mɛrɔm fuo-bie-la leriŋ, 8La TƖƖNA fa jomba a hɛ Iziral tɩŋŋaa laalɩyuoroo nɩsɩŋ lɛ. Ba kire kpʋba ŋɩɩ a mʋ yi tabal-la ba sɩɩ yɩrɛ Sɩdɔŋ, a joŋo mʋ Mɩsɩrɛfɔf Meem, a to ŋɩɩ mʋ Mɩzɩpa fuonaa-la sɩ hɛ wɩɩpɔsʋŋ, a kpʋ ba kala, nɩbala ma bɩ ka. 9Josua fa ŋaaba ŋɩɩ La TƖƖNA sɩ dagʋ nɛ. Ʋ fa gbɛrɩgɛ ba janɩŋ kala nɛ aŋ nyɩgɛ ba janɩŋ torukoba ma.
10Josua fa mɩɩrɛ bʋa-la tɩtɩa lɛ nɛ a mʋ taŋ-la ba sɩɩ yɩrɛ Hazɔ a yuo dii ʋ dɩ ʋ kuoro kala. (Bʋa-la lɛ Hazɔ nɛ fa ŋaa tasɩ-la kala tʋɔŋ kʋbalɩŋ.) 11Nʋʋ na-kala sɩ hɛ taŋ-la lɛ, ba kala nɛ ba fa kpʋ. Ba kʋŋkala bɩ ka, aŋ nyɩgɛ Hazɔ kala.
12Josua fa yuo dii tabalaa deemba kala nɛ a kpʋ ba kuoroo arɩ ba nɩaa kala arɩ La TƖƖNA tɩntɩnna Mosis fa sɩ dagɛ ŋɩɩ. 13Ama tasɩ-la ba sɩ saa dundol-biisiŋ nyuŋ, Iziral laalɩyuoroo bɩ ba-na nyɩga. Hazɔ dʋndʋŋa nɛ Josua nyɩgɛ. 14Kɩalɩŋ kala fa sɩ hɛ tasɩŋ deemba lɛ nɛ Iziral laalɩyuoroo paa, a kɛsɛ ba pʋsʋŋ ma pɛ. Ama ba kpʋ nʋʋkala sɩ hɛ tasɩ-la lɛ nɛ, ba bɩ kʋŋ ka. 15La TƖƖNA fa sɩ dagɛ ʋ tɩntɩnna Mosis ŋɩɩ, ŋɩɩ tɩtɩa nɛ Mosis ma dagɛ Josua ʋ ŋaa. Wɩalɩŋ kala La TƖƖNA fa sɩ dagɛ Mosis, ba kala nɛ Josua fa ŋaa, ʋ bɩ ba kʋŋkala kere ta.
16Josua fa yuo a laa tinteeŋ deeŋ kala nɛ, tintee-la peelee sɩ yʋga, Nɛgɛf, Goseŋ tinteeŋ kala, dundollu-la sɩ hɛ peelee bʋbʋɔŋ wɩɩjʋʋlʋŋ dɩɩrɩŋ, Araba arɩ Iziral peelee arɩ ba dundolluŋ kala, 17a chɩŋ peel-la ba sɩɩ yɩrɛ Halak, sɩ hɛ Sɛɛ dɩɩrɩŋ, a kaa mʋ Baal Gad sɩ hɛ Lɛbanɔŋ fuonaa-la sɩ kpagɛ peel-la ba sɩɩ yɩrɛ Hɛmɔŋ. Leree deemba kuoroo kala nɛ ʋ fa yuo kɛsɛ, a kpʋ ba kala. 18Josua fa yuo kuoroo deemba a dieni nɛ woruŋ. 19Hivi tɩmma-la sɩ hɛ Gibioŋ lɛ dʋndʋŋa nɛ fa leŋe ba dɩ Iziral tɩŋŋaa pɛ niiŋ. Ama Iziral tɩŋŋaa fa bɩ leŋe ba dɩ tasɩ-la kʋŋkala pɛ nii, ba kala nɛ ba yuo dii. 20La TƖƖNA nɛ fa ŋaa tasɩ-la kɛŋ nyuduoŋ a yuyuo Iziral tɩŋŋaa ŋɩɩ, dɩ ʋ to ŋɩɩ lɛ a chaasa cheiba, a kpʋ ba kala aŋ sɩ́ ba nenige fá, arɩ La TƖƖNA fa sɩ bʋl ŋɩɩ pɩ Mosis.
21Bʋa-la lɛ nɛ Josua fa bɩra mʋ a chei Anakɩ tɩmma-la sɩ hɛ tintee-la peelee sɩ yʋga lɛ, a chɩŋ Hɛbʋrɔŋ, Dɛbɩ arɩ Anab, a kɛŋ ŋɩɩ mʋ Juda tintee-la peelee sɩ yʋga, arɩ Iziral tintee-la peelee sɩ yʋga. Josua fa chei lere-la arɩ tasɩ-la kala sɩ hɛ nɩmɛ nɛ. 22Anakɩ doho nʋʋkala fa bɩra tuo tinteeŋ lɛ, see tasɩŋ deemba: Gaza, Gaf arɩ Asɩdɔd dʋndʋŋa lɛ nɛ Anakɩ nɩaa mʋa ka. 23Josua laa tintee-la kala nɛ, arɩ La TƖƖNA fa sɩ dagɛ Mosis ŋɩɩ, a kaa kpaa a pɩ Iziral tɩŋŋaa doho doho-la ʋ ŋaa ba kʋŋ. Ŋɩɩ nɛ tintee-la nɩaa saa wiesi laalɩŋ lɛ.
©Ghana Institute of Linguistics Literacy and Bible Translation 1984, 2014