Roma 10
10
Ayuda dœ angbɨ azu sœ dœ Gbozu bale
1Aaya, œrœ á mœ yindœ nœ dœ lɔsu mœ bale, yé á sœ kœza avwala nœ mœ fœ Ndjaba tœnœ kœdœ adœke tshe she Ayuda. 2Gbambanœ nene, mœ wusœ nœ adœke endje sœ dœ egerœ ogo kœmbœrœ akwa nœ Ndjaba kashe endje wuwusœ awa kœmbœrœ tœnœ dœ ɔtshɔnœ nene. 3Endje wuwusœ mara á Ndjaba mbœrœ adœke uzu wuta ndjii tœ ala ye nene. Endje para kœwuta ndjii dœ awa nœ endje dœ tœ endje. Mbœrœ tœnœ atamœ, endje zazatœ endje fœ Ndjaba yeka á tshe kœmbœrœ adœke endje wuta ndjii nene. 4Gbambanœ nene, Kristu mbœrœ œneke kɔ á li má adœke awa akwa mbœrœ yekane á endjeneke kɔ á endje sœ dœ kœyindœrœ ga ndœ ye kœwuta ndjii tœ ala Ndjaba.
Uzu kɔ á tshe sœ dœ kœyindœrœ ga ndœ Yisu, tshe she
5'E dji o'o á Moyize sú tœ upu nœ kœsœ ndjii á to lœ awa akwa: uzu kœro manda awa akwa, œ sœ dœ soro lœ awa nœ awa akwa. 6Kashe tœ kœwuta ndjii dœ awa nœ kœyindœrœ, tshe pa lima adœke: «Yuyutœ zœ nene adœke: œɗe dá ɔ ga lafo a?» Œ sœ ɓata kœza Yisu jerœ tœnœ ga atɨ. 7'E yuyu ndje tœ 'e nene adœke: «Œɗe dá jerœ ga lœ ogo nœ akuzu a?» Œ sœ ɓata 'e kpa yindœ kœmbœrœ adœke Yisu kpa she lœ akuzu. 8Kashe Moyize pa lima kotoo? Tshe pa lima atake: «O'o ama Ndjaba sœ ndoo dœ ɓœ, œ sœ lœ ama zœ; œ sœ ndje tœ lɔsu zœ.» O'onœ asœmœ kœdœ o'o nœ kœyindœrœ á a sœ kœmɨndœ nœ. 9Œdœ ɓœ kœpa dœ ama zœ adœke Yisu kœdœ Gbozu, á yindœ nœ dœ lɔsu zœ adœke Ndjaba she she lœ akuzu ye, ɓœ she bala ye. 10Mbœrœ kœyindœ nœ dœ lɔsu zœ dá Ndjaba œ mbœrœ adœke ɓœ sœ ndjii, yé ɓœ kœpandœ nœ dœ ama zœ dá Ndjaba œ she ɓœ. 11Gbambanœ nene, endje sú ɓala Bukunœ adœke:
«Uzu kɔ á tshe sœ dœ kœyindœrœ ga ndœ Yisu,
tshe gbɔ tshula nene.»
12Ádánœ á Ayuda dœ angbɨ azu sœsœ kpi nene. Gbozu nœ endje kœdœ Yisu Kristu á tshe to ɔtshɔrœ nœ ye fœ azu para kɔkɔ á endje e ɨ'ɨrɨ ye. 13Mbœrœ á endje sú ɓala Buku nœ Ndjaba adœke:
«Uzu kɔ á tshe e ɨ'ɨrɨ Gbozu,
tshe she.»
14Kashe endje e ɨ'ɨrɨ ye kotoo œdœ endje kœsœ dœ kœyindœrœ ga ndœ ye nene a? Yé endje sœ dœ kœyindœrœ ga ndœ ye kotoo œdœ endje kœdjidji damba o'o nœ ye nene a? Endje dji o'o nœ ye kotoo œdœ a kœmɨmɨndœ nœ nene a? 15Endje mɨndœ o'onœ kotoo œdœ endje kœvwavwa azu nene a? Endje su ɓala Buku nœ Ndjaba adœke:
«Yanga waa kœwu azu á endje na
dœ Ɔtshɔ O'o fœ azu.»
16Kashe azu para kɔkɔ dá yindœ Ɔtshɔ O'onœ nene. Isaya pa lima tœ upunœ adœke:
«Gbozu, œɗe dá yindœ o'onœ
á 'a sœ kœmɨndœ nœ a?»
17Ataa, kœyindœrœ to lœ kœmɨndœ o'o ama Ndjaba yé kœmɨndœ o'o ama Ndjaba kœdœ kœmɨndœ Ɔtshɔ O'o nœ Kristu.
18Mœ sœ kœyu adœke: ataa azu Israyele djidji lima o'onœ asœke nene a? Adjapu, endje dji lima kɔ. Mbœrœ Buku nœ Ndjaba pa adœke:
«Endje dji tshama endje na tœnœ pa ɔshɔ djigi,
yé o'o ama endje œ na rotœnœ tœ osho kɔ pa ɔshɔnœ asœke.»
19Mœ sœ kpa kœyu adœke: Ataa azu Israyele djidji lima dœ ɔtshɔnœ nene a? Ndjaba pa lima ndœ nœ lœ ama Moyize adœke:
«Mœ mbœrœ adœke 'e sœ dœ úkú ga tœ azu á endje dœ́dœ́ azu nœ mœ nene.
Mœ mbœrœ adœke 'e sœ dœ ókó ga tœ angbɨ
azu á endje gugu dœ kœwusœrœ nene.»
20Isaya kpa na œrrr kœpa adœke:
«Azu á endje sœsœ lima kœpara mœ nene, gbɔ mœ,
mœ matœ mœ fœ azu neke á endje sœsœ
lima kœyu mœ tœ œrœ nene.»
21Yé mbœrœ azu Israyele, tshe pa lima adœke:
«Ɔlɔ kɔ, mœ yi lima kane mœ mbœrœ kœ'e endje
kashe endje djidji lima o'o ama mœ nene.
Endje kœdœ aayi gbɔkumu œdœ adjipudji.»
Currently Selected:
Roma 10: mnh
Highlight
Share
Compare
Copy
Want to have your highlights saved across all your devices? Sign up or sign in
© 2020 ACOTBA-SUBO
