Romafɔ 15
15
Aha Ansɩsʋ Atɔ Bwɛ
1Ilehian ánɩ́ anɩ aha ánɩ́ anɩ hogyi ɔnɔ bʋ ɔnlɩn abénya klʋn ha aha ánɩ́ amʋ́ hogyi ɔnɔ ɩma ɔnlɩn. Megyi tɔá iletsia anɩ wʋlɛ abɔ́bwɛ. 2Ilehian ánɩ́ anɩtɔ okugyiɔkʋ ɔbɔ́bwɛ tɔá ɩbʋ alɛ ha mʋ ba, mɛnɩ ɩbɛ́ha mʋ ɔbɛ́dan hogyitɔ. 3Tsufɛ Kristo kʋraa mɔbwɛ tɔá mʋ onuto otekle. Mʋ ɩwɩ asʋn bɔwanlɩn wa Bulu asʋn amʋtɔ bɛɛ, “Asiabi amʋʋ besia fʋ amʋ fɛ́ɛ́ ɩlɛbɛdɩnka mɩsʋ.” 4Asʋn kugyikʋá bɔwanlɩn wa Bulu asʋn wanlɩnhɛ amʋtɔ tsu tɩtɩɩtɩ a, bɔwanlɩn mʋ́ ánɩ́ ibósuna anɩ atɔ, wa anɩ atɛtɔ-ɔnlɩn, atomi lɩɩ kinkiinkin. Fówun abénya klʋn kɩ ɔkpa ha atɔ amʋʋ anɩ ansɩ dɩn mʋ́sʋ amʋ. 5Bulu tɛha aha bʋtenya klʋn. Mʋtɔwa aha atɛtɔ-ɔnlɩn. Ndɛ mʋ kʋlɩ mbɛɛ, ɔha amlɩbwɛ kʋlɛ, fɛ alɩá Kristo Yesu losuna anɩ. 6Ɩnɩ ɔbɛ́ha mlɩ fɛ́ɛ́ mlɔ́pʋ ɔmɛ kʋlɛ kanfʋ Bulu, ogyi anɩ Wie Yesu Kristo mʋ Sɩ amʋ nɩ.
Aha Ánɩ́ Bʋmegyi Yudafɔ Asʋn Wanklaan Bla
7Ɩnɩ sʋ mlɩhɔ aba atuu, fɛ alɩá Kristo lɔhɔ mlɩ, mɛnɩ ɩbɔ́wa Bulu numnyam. 8Tsufɛ ndɛ mlɩ bla mbɛɛ, Kristo labwɛ Yudafɔ osumpʋ, mɛnɩ ibósuna ánɩ́ Bulu obégyi mʋ tɔ amʋʋ ɔlɛhɩɛ amʋ́ anain amʋsʋ. 9Kristo lɛba, mɛnɩ aha ánɩ́ bʋmegyi Yudafɔ bɛ́tɩ Bulu ɩdayile, nwɛ amʋʋ olowun amʋ́ amʋ sʋ. Fɛ alɩá Bulu asʋn wanlɩnhɛ amʋ ɩlɛblɩ. Asʋn amʋ gyi,
“Anɩ Wie Bulu, ɩnɩ sʋ nɔ́wa fʋ numnyam aha ánɩ́ bʋmegyi Yudafɔ ansɩtɔ.
Nɔ́wa ɩlʋ kanfʋ fʋ.”
10Bulu asʋn amʋ lɛtra blɩ ɔbɛɛ,
“Mlɩ aha ánɩ́ mlɩmegyi Yudafɔ, mlɩa Bulu aha mlɩnya ansigyi!”
11Bɛtra wanlɩn bɛɛ,
“Aha ánɩ́ mlɩmegyi Yudafɔ fɛ́ɛ́, mlɩkanfʋ anɩ Wie Bulu.
Ɔmá fɛ́ɛ́ abi, mlɩkanfʋ mʋ.”
12Bulu ɔnɔsʋ ɔtɔɩpʋ Yesaia ɛ lɛblɩ tswɩ ɔbɛɛ,
“Ɔha ɔkʋ ɔbɛ́lɩn tsu anɩ nain Yisai#15:12 Yisai lɔkwɩɩ Owie Dawid ánɩ́ ogyi Yesu Kristo mʋ nain. abi-anátɔ.
Mʋ obébegyi iwie aha ánɩ́ bʋmegyi Yudafɔsʋ nɩ.
Mʋsʋ bɛ́dɩnka ansɩ nɩ.”
13Buluá bʋtɛkɩ ɔkpa ha ogyi. Ndɛ mʋ kokoli mbɛɛ, ɔha ɩwɩ ilwii mlɩ, ansɩ igyi mlɩ amlɩhɔ mʋ gyi. Mʋ Ɔŋɛ Wankɩhɛ ɔha mlɩ tumi, mɛnɩ mʋ ɔkpakɩ mɔ́ɔkpɔn mlɩ.
Tɔá Sʋa Paulo Lɛlɛ Ɩwɩtɔ Wanlɩn Atɔ Alɩ
14Mɩ apio Akristofɔ, mɩ onuto nhɩɛ nyin ánɩ́ aha wanklaan mlɩgyi. Mlɩlabɩ asʋn tsɔtsɔɔtsɔ, mlɛtalɩ tɔɩ kpla aba. 15Tamɛ nawa klʋn nhɩɛ ndɛ mlɩ asʋn bla ɔwʋlʋ anfɩtɔ pʋkaɩn mlɩ. Tsufɛ Bulu lawa awɩtɔlɛ pʋ agyʋma anfɩ wa mɩ ɩbɩtɔ ɔbɛɛ mbwɛ. 16Mʋ́gyi, mba bɔbwɛ Kristo Yesu osumbi aha ánɩ́ bʋmegyi Yudafɔtɔ. Mʋ́ sʋ ndɛ osum agyʋma anfɩ yɔ fɛ Bulu igyi ɔhapʋ. Ndɛ aha amʋʋ bʋmegyi Yudafɔ amʋ Bulu asʋn wanklaan amʋ bla, mɛnɩ bémli igyi ahatɔá Ɔŋɛ Wankɩhɛ latɩn mʋ́ ɩwɩ, ilegyi Bulu ansɩ. 17Ɩnɩá mɩa Kristo Yesunyɔ anɩlabwɛ kʋlɛ sʋ a, mbʋ ɔkpa tsu ɩwɩ agyʋma anfɩ ndɛyɔ ha Bulu anfɩ sʋ. 18Tsufɛ mmɛ́ɛtalɩ blɩ asʋansʋ tsɩa atɔá Kristo latsʋn mɩ asʋn blɩhɛ pʋ́ mɩ bwɛhɛsʋ bwɛ aha ánɩ́ bʋmegyi Yudafɔtɔ, mɛnɩ bóbu Bulu. 19Ɩna ofula mʋ́a osuna amʋʋ nɔbwɛ Bulu Ɔŋɛ amʋ tumitɔ amʋsʋ nɛtalɩ da Kristo asʋn wanklaan amʋ fɛ́ɛ́ ɔkan, tsu Yerusalem alɩɩ yɛdalɩ Iliriko ɔsʋlʋsʋ. 20Tɔá ɩdɩn mɩ klʋnsʋ brɛ fɛ́ɛ́, ndekleá nɔ́bwɛ gyi, nɛ́natɩ da Bulu asʋn wanklaan amʋ ɔkan ntɩnɛá bʋmɔkʋnya nu Kristo asʋn kɩ. Mmedekleá nɔ́tʋa ɔkʋ gyumagyihɛsʋ. 21Tsufɛ bɔwanlɩn wa Bulu asʋn amʋtɔ bɛɛ,
“Aha ánɩ́ bʋmɔkʋnu mʋ nka kɩ bówun mʋ.
Aha ánɩ́ bʋmɔkʋnu mʋ asʋn kɩ ɛ bónu mʋ́ asɩ.”
Paulo Roma Ɔpasua Yɛsɩna
22Ɩnɩ laha mmɔkʋnya ɔkpa ba mlɩ wa bɔtʋ ndɛ nɩ. 23Tamɛ sei mʋ́ a, mɩ agyʋma lamɔ ɔnɔ nfɩ fʋnsʋ. Nfi tsɔtsɔɔtsɔ nɩ ndekleá nɛ́ba mlɩ wa bɛkɩ mlɩ. 24Mʋ́ sʋ nabwɛ agywɩɩn ánɩ́ nɩ ndɛtsʋn nɔyɔ Spania a, nɔ́tsʋn kɩ mlɩ. Agyi ɔdwɛ kpalobi a, mlɩlasi mɩ ɔkpa nayɔ ɩnʋ. 25Sei a, nabwɛ agywɩɩn ánɩ́ négyankpa yɔ Yerusalem, yɔbʋa Bulu aha ánɩ́ bʋbʋ ɩnʋ. 26Tsufɛ Akristofɔá bʋbʋ Makedonia pʋ́ Akaia ɔsʋlʋsʋ bapʋ ɔdwɛ dunka atɔ bʋdɛpʋsɩsɩ Bulu aha ánɩ́ bʋgyi ahianfɔ Yerusalem. 27Ɩbʋ amʋ́ ɔdwɛá bɔ́bʋa ahianfɔ. Bawun ánɩ́ ilehian ánɩ́ bɔ́bʋa Yudafɔ ɛ ka ɩkɔ. Tsufɛ banya Ɔŋɛtɔ atɔ, nu nkpahɔ asʋn amʋ tsu amʋ́ wa. Mʋ́ sʋ ilehian ánɩ́ bódunka ɔyɩtɔ atɔ kʋ ha amʋ́ ɛ. 28Nɩ nɔpʋ kɔba ánɩ́ bɔtswɩtswɩ ha mɩ fɛ́ɛ́ wa amʋ́ ɩbɩtɔ a, nɔ́bɔtsʋn mlɩ wa yɔ Spania. 29Nyin ánɩ́ nɩ nɛba a, nɔ́pʋ Kristo oyula kpɔnkpɔɔnkpɔntɩ ba mlɩ.
30Mɩ apio adwɛpʋ, ndɛpʋ anɩ Wie Yesu Kristo pʋ́ ɔdwɛá Bulu Ɔŋɛ laha mlɩ, ha mlɩ aba kokoli mlɩ mbɛɛ, mlɩlɩɩ mɩ ɔma, amlɩbɔ mpaɩ ha mɩ kinkiinkin. 31Mlɩbɔ mpaɩ mlɩaa, Bulu ɔlɛ mɩ tsu Yudafɔ amʋʋ bʋmɔhɔ mʋ gyi amʋ ɩbɩtɔ. Mlɩbɔ ha mɩ, mɛnɩ Bulu aha ánɩ́ bʋbʋ Yerusalem ɩnʋ bɔ́hɔ atɔ amʋʋ napʋ nɛya amʋ́ amʋ. 32Fówun nɩ Bulu lotsula a, nɛ́ba mlɩ wa ansigyi kpɔnkpɔɔnkpɔntɩtɔ, bɛda ɔkpʋnʋ. 33Buluá ɔtɛha iwilwii, otsia mlɩ fɛ́ɛ́ wa. Amen!
Currently Selected:
Romafɔ 15: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
