Romafɔ 13
13
Ɩwɩasɩba Ha Ɔmá Akpapʋ
1Ilehian ánɩ́ ɔhagyiɔha ɔbɛ́ba ɩwɩasɩ ha ɔmá akpapʋ. Tsufɛ Bulu tɛha ɔmá akpapʋ tumi. Ɔmá ɔkpapʋ ɔkʋkʋ má ɩnʋá megyi Bulu lɛyaɩ mʋ. 2Ɩnɩ sʋ nɩ ɔkʋ ɔkʋsʋ lɩɩ ɔmá ɔkpapʋ ɔkʋsʋ a, alakʋsʋ lɩɩ Bulu tumisʋ. Mʋ́ sʋ ɔha amʋ dɛ ɩsʋbɩtɩ kle ha ɩwɩ. 3Tsufɛ ɔmá akpapʋ bʋmegya yile abwɛpʋ, lalahɛ abwɛpʋ bʋgya. Mʋ́ sʋ nɩ fʋmedekleá fʋnya ɔmá akpapʋ ifu a, mʋmʋ bwɛ yile abʋkanfʋ fʋ. 4Bulu osumbi ɔhagyiɔha ánɩ́ bapʋ mʋ yaɩ ɔmá ɔnɔ gyi. Mlɩ yile sʋ bʋdɛ agyʋma yɔ. Tamɛ nɩ ɔkʋ dɛ lalahɛ bwɛ a, mʋmʋ obénya amʋ́ ifu, tsufɛ bʋbʋ ɔkpa bɩtɩ aha ɩsʋ. Bulu asumbi bʋgyi. Ɔlɛha amʋ́ ɔkpa ánɩ́ bʋbɩtɩ lalahɛ abwɛpʋ ɩsʋ ha mʋ. 5Ɩnɩ sʋ ɔhagyiɔha ɔba ɩwɩasɩ ha ɔmá akpapʋ. Megyi bɛɛ, bʋdɛ ifu nya ánɩ́ bɛ́bɩtɩ amʋ́ ɩsʋ nkʋlɛ sʋ. Mboun amʋ́ klʋn dɛ amʋ́ bla ɔbɛɛ, ilehian ánɩ́ bóbu amʋ́.
6Ɩnɩ kɛn sʋ ilehian ánɩ́ mlɛ́ka tswɩtswɩ ɛ nɩ. Bulu asumbi ɔmá akpapʋ bʋgyi. Bapʋ amʋ́ brɛ fɛ́ɛ́ bʋdɛ ɔmásʋ kɩ. 7Mlɩka ɩkɔ kugyikʋá ɩdɩn mlɩsʋ. Mlɩka tswɩtswɩ mʋ́a lampoo. Obú ɔkpasʋ a, mlɩbu amʋ́ fɛ́ɛ́. Nɩ igyi kanfʋ ɛ a, mlɩkanfʋ amʋ́ fɛ́ɛ́.
Abadwɛ
8Mlɩmákɩta ɔhaa ɩkɔ dʋn mlɩ abadwɛ. Nɩ ɔkʋ dɛ mʋ aba dwɛ a, ɔdɛ mbla amʋ fɛ́ɛ́sʋ gyi. 9Mose Mbla amʋ lɛblɩ ɔbɛɛ, “Mátɔ mbʋa.” “Mámɔ ɔha.” “Máwi atɔ.” “Mápɛ ansɩ fʋ ba atɔsʋ.” Ɩnɩ pʋ́ mbla trahɛ amʋ fɛ́ɛ́ nwun gyi mbla kʋlɛ amʋʋ ɩlɛblɩ ɔbɛɛ, “Dwɛ fʋ ba fɛ fʋ ɩwɩ” amʋ. 10Nɩ ɔkʋ dɛ mʋ ba dwɛ a, ɔmɔ́ɔpʋ lalahɛ gyi mʋ ɛkɛkɛɛkɛ. Ɩnɩ sʋ ɔha ánɩ́ ɔtɔdwɛ mʋ aba lagyi mbla amʋ fɛ́ɛ́sʋ.
11Mlɩ onuto mlɩyin brɛ oduatɔ anɩbʋ. Brɛ lafʋn ánɩ́ mlétsinki, tsufɛ anɩ nkpahɔ lafʋn ta dʋn brɛ amʋʋ anɩlegyankpa hɔ Kristo gyi amʋ. 12Onye dɛtsʋn, ɔyɩ lakɛ ta. Mʋ́ sʋ mlɩha asi okluntɔ bwɛhɛ fɛ́ɛ́ bwɛ, atsu anɩ ɔyɩkɛhɛtɔ akɔtɔ tsan. 13Mlɩha anɩ tsiatɔ ɩbwɛ fɛ aha ánɩ́ bʋtsie wankɩtɔ. Mlɩmáha ayinta anɩ brɛ yetsia ɔdwɛ ogyikpa, anɩdɛ atɔ dɛdɛ gyi, anɩdɛ nta nun bʋ. Anɩmáwa atsɩ mʋ́a ayin asʋn. Anɩmáwa ɔnsɩpɛ, anɩmátrɛ kɔ. 14Mboun mlɩpʋ anɩ Wie Yesu Kristo tin mlɩ ɩwɩ. Mlɩmátra tsia tsiatɔ dada amʋʋ mlɩ ɔwɔlɩ lalahɛ tekle amʋ.
Currently Selected:
Romafɔ 13: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
