Israelfɔ Ɩlʋ 68
68
Bulu Kʋsʋ, Fʋ Alupʋ Abʋdasaɩn
Dawid kanfʋ-ɩlʋ ha ɩlʋ osunapʋ.
1Bulu kʋsʋ, fʋ alupʋ abʋdasaɩn.
Ha fʋ alupʋ abʋsrɩ dalɩ fʋ ansɩtɔ.
2Fɛ alɩá afu tɔtsʋan ogyasi natɩ a, alɩ fʋgya amʋ́ nɩ.
Fɛ alɩá ogya tɛŋlaɩn okpin a,
alɩ aha lalahɛ bʋhɔ fʋ ansɩtɔ nɩ.
3Tamɛ ha aha yile abʋgyi ɔdwɛ.
Bʋfuli kpayi ansigyisʋ fʋ ansɩtɔ,
hɩɛ nya ansigyi.
4Mlɩwa ɩlʋ ha Bulu. Mlɩwa ɩlʋ kanfʋ mʋ ɩda.
Mlɩtswɩ ɩlʋ ha ɔha amʋʋ ɔna nwʋlʋtasʋ amʋ.
Mʋ ɩda gyi Nana Bulu.
Mlɩtswɩ ope mʋ ansɩtɔ.
5Bulu tsie mʋ onuto otsiakpa.
Mʋgyi awumbi ɔsɩ, otegyi bʋa asʋrapʋ.
6Ɔtɛha ɔha ánɩ́ ɔma ɔhaa tenya abusuan.
Ɔtɛlɛ obu adɩpʋ, ha bʋtegyi ɩwɩ.
Tamɛ ɔtɛha mʋsʋ akʋsʋlɩɩpʋ bʋtetsia ɔsʋlʋ wʋlɩhɛsʋ.
7Oo Bulu, brɛá fʋgya fʋ aha nkpa,
mlɩna ɔsʋlʋkpan amʋsʋ a, Ɩya.
8fɛha ɔsʋlʋ lɛkpɩnkɩ, nyankpʋ lotswie tsu ɔsʋsʋ,
Sinai Bulu ansɩtɔ,
Israel Bulu ansɩtɔ.
9Fɛha nyankpʋ lɛhɩɛ tswie,
latsinki fʋ siadɩɛá idewu.
10Fʋ aha bɔpʋ ɩnʋ bwɛ otsiakpa.
Oo Bulu, fʋ awɩtɔlɛ sʋ fɔbʋla ahianfɔ.
11Anɩ Wie lɛlɛ ɔnɔ,
atsɩ tsɔtsɔɔtsɔ bɛblɩ asʋn wanklaan amʋ.
12Bɛblɩ bɛɛ, “Ɩsa ɔnɔ alɩɩpʋ fɛ́ɛ́ bɛsrɩ!”
Atsɩá bʋbʋ ɩnʋ beye atɔá besi bun.
13Aha ánɩ́ bʋda akufa ɩbantɔ kʋraa
bʋgyi fɛ lɔpɔá sika fututu bun mʋ abambasʋ,
sika pɛpɛ ɩdɛ ogya kpa mʋ ɩwɩ.
14Brɛá Bulu Otumipʋ amʋ lɛda awie saɩn a,
Salmonbʋsʋ lofuli fɛ dantapu.
15Basanbʋ lɛhɩɛ fʋa,
ɩbʋ nsiebi tsɔtsɔɔtsɔ!
16Basanbʋá fʋbʋ nsiebi tsɔtsɔɔtsɔ,
ntogyi sʋ fʋdɛ Sionbʋá Bulu lalɛ, otsie mʋ́sʋ lu?
Kɩ, ɩnʋ Nana Bulu onuto obétsia brɛ fɛ́ɛ́ nɩ!
17Bulu akeke akinkin ɩdʋn mpɩm-du lafa.
Mʋ́ anɩ Wie lɔpʋtsua Sinai ba mʋ otsiakpa nɩ.
18Brɛá ɔlɔdʋ ɩbʋ fʋahɛ amʋ a, ɔlɛkpa ndoun buo ɩwɩ.
Aha bekie mʋ atɔ.
Mʋsʋ akʋsʋlɩɩpʋ kʋraa bekie mʋ atɔ.
Nana Bulu obétsia ɩnʋ.
19Mlɩkanfʋ anɩ Wie.
Mʋtɔsʋra anɩ atɔ sʋrahɛ ekekegyiɛkɛ.
Bulu gyi anɩ nkpa ɔhɔpʋ. Ɩya.
20Nkpa ɔhɔpʋ anɩ Bulu gyi.
Anɩ Wie Nana Bulu tɛlɛ anɩ tsu lowutɔ.
21Tamɛ obésisri mʋ alupʋ nwun.
Amʋ́ na bʋdɛ ɩpɔngyila bwɛ nɩ.
22Anɩ Wie ɔbɛɛ,
“Nɛ́lakpa mlɩ alupʋ tsu Basan ba.
Nɛ́lɛ amʋ́ tsu ɔpʋ-ibuntɔ ba.
23Mɛnɩ mlɛ́tsatsa mlɩ alupʋ amʋ obugyatɔ,
mlɩ akɩaɩ ɛ béyinta amʋ́ obugya.”
24Oo Bulu, bawun fʋa fʋ ɔdɔm amʋ ɔnatɩ.
Alɩá mɩ Bulu pʋ́ mɩ Wie, fɔpʋ fʋna fɔyɔ fʋ otsiakpa ɩnʋ.
25Ɩlʋ awapʋ bʋgyankpa, nkpɛ afʋlɩpʋ bʋgya ɔma,
mbitebi bʋbʋ amʋ́ nsɩnɛ bʋdɛ akatsa kpɩnkɩ.
26Bʋdɛ ɩlʋ wa bɛɛ, “Mlɩkanfʋ Bulu mʋ ɔmá amʋ fɛ́ɛ́ ofiakpa.
Mlɩ Israel abi-aná, mlɩkanfʋ Nana Bulu!”
27Amʋ́tɔ ɔtrahɛ Benyamin abusuan igyankpa,
Yuda abusuan ahandɛ pʋ́ amʋ́ aha tsɔtsɔɔtsɔ bʋbuo,
Sebulon mʋa Naftali abusuan ahandɛ ɛ bʋgya ɔma.
28Oo Bulu, suna fʋ ɔwʋnlɩn.
Suna fʋ ɔwʋnlɩn, fɛ alɩá fɔbwɛ ha anɩ brɛ amʋ.
29Fʋ ɔtswɛkpa ánɩ́ ɩbʋ Yerusalem sʋ
awie bʋtekie fʋ atɔ.
30Wa ɩyɩn wa Egyipte, ogyi fɛ ntsu-ɔnɔ ɔbwɩ
mʋ́a ɔmá-ɔmá ánɩ́ bʋgyi fɛ nnantswie yinhɛá bʋbʋ amʋ́ abitɔ anfɩ.
Tsatsa aha anfɩ bʋtekle dutɛ hɔ anfɩsʋ,
afʋda ɔmá anfɩ bʋtekle ɩsa kɔ anfɩ saɩn.
31Ha abʋpʋ kɔɔbrɩ tsua Egyipte ba.
Etiopiafɔ#Hes. 29:10 abʋba ɩwɩasɩ ha fʋ Bulu.
32Mlɩ ɔsʋlʋsʋ iwie ogyikpa, mlɩwa ɩlʋ ha Bulu.
Mlɩwa ɩlʋ kanfʋ anɩ Wie, Ɩya.
33bɩmbɩ ɔpá ɔsʋsʋsʋ ɔdɩnkapʋ amʋ.
Kɩ, mʋ ɔmɛ lalɩn. Mʋ ɔmɛ kpɔnkpɔntɩ amʋ lalɩn.
34Mlɩbla aha alɩá Bulu tumi gyi.
Mʋ numnyam ibun Israelsʋ,
mʋ ɔwʋnlɩn ɩlɛlɩn ɔwan nwʋlʋtatɔ.
35Bulu ɩwɩ bʋ ifu mʋ otsiakpa ɩnʋ.
Israel Bulu tɔpʋ mʋ tumi mʋ́a ɔwʋnlɩn ha amʋ́.
Mlɩkanfʋ Bulu!
Currently Selected:
Israelfɔ Ɩlʋ 68: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
