Israelfɔ Ɩlʋ 62
62
Ɔdwɛá Ɩma Ɔka Igyi Bulu Klɛ
Dawid kanfʋ-ɩlʋ ha ɩlʋ osunapʋ Yedutun.
1Mɩ ɔkla labwɛ diin, ɔdɛ Bulu ansɩtɔ kɩ wʋlɛ,
tsufɛ mʋ ɩbɩtɔ nénya nkpahɔ tsu.
2Mʋ nkʋlɛ gyi mɩ ɩbʋta,
mɩ nkpa ɔhɔpʋ pʋ́ mɩ okpikplikpa.
Mʋ́ sʋ mmɛ́ɛdɩda ɛkɛkɛɛkɛ.
3Ɔmɛnkɛ mlési mɩ nkʋlɛ han?
Mlɩ fɛ́ɛ́ mlɩdekleá mlɛ́lɛ mɩ ɩnʋ,
fɛ bunti ntɛ ɩban bwiehɛ?
4Lɛlɛ, mlɩlabwɛ agywɩɩn kʋlɛ, mlɛ́kplɩ mɩ obiasʋ.
Afunuwa bʋ mlɩ ɔdwɛ.
Mlɩtɔpʋ ɔnɔ yula mɩ,
tamɛ mlɩ ɩklʋntɔ mʋ́ lwɩɩ mlɩdɛ mɩ. Ɩya.
5Mɩ ɔkla, tsia diin afʋkɩ Bulu ansɩtɔ;
tsufɛ mʋ ɔkpa ndɛkɩ.
6Mʋ nkʋlɛ gyi mɩ ɩbʋta,
mɩ nkpa ɔhɔpʋ pʋ́ mɩ ɔtanʋkpa kinkin.
Mʋ́ sʋ mmɛ́ɛdɩda.
7Mɩ nkpahɔ pʋ́ mɩ numnyam itsu Bulu wa.
Mʋgyi mɩ ɩbʋta kpekple pʋ́ mɩ okpikplikpa.
8Anyankpʋsa, mlɩpʋ ansɩ dɩnka mʋsʋ bregyibrɛ.
Mlɩlɛ mlɩ ɩkplan fɛ́ɛ́ bla mʋ,
tsufɛ mʋgyi anɩ okpikplikpa. Ɩya.
9Lɛlɛ, nyebi-ahandɛ bʋgyi fɛ afu.
Ɩwɩ anyapʋ ɛ bʋmegyi tɔtɔ.
Kali amʋ́ afʋkɩ.
Amʋ́ aku anyɔ anfɩ fɛ́ɛ́ bʋgyi fɛ dantapu.
10Mápʋ ansɩ dɩnka adufudɩɛ atɔsʋ.
Másusuá fénya tɔkʋ tsu owitɔ.
Nɩ fʋ atɔ ɩklɛɩ kʋraa a,
mápʋ ansɩ dɩnka mʋ́sʋ.
11Bulu latɔɩ,
nanu mʋ́ lanu ánɩ́ mʋbʋ tumi.
12Mɩ Wie, ɔdwɛá ɩma ɔka igyi fʋ klɛ,
tsufɛ fʋtɛka nyankpʋsa ɩkɔ mʋ bwɛhɛ ɔnɔ.
Currently Selected:
Israelfɔ Ɩlʋ 62: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
