Israelfɔ Ɩlʋ 147
147
Bulu Lala Ɔdɛ Yerusalem Wulu Da
1Mlɩkanfʋ Nana Bulu!
Ɩbʋ alɛá abɔ́wa ɩlʋ kanfʋ anɩ Bulu.
tsufɛ ɩbʋ ɔdwɛ, iletsia mʋ.
2Nana Bulu lala ɔdɛ Yerusalem wulu da.
Ɔdɛ Israelfɔá olegya wa aputu kpa ba.
3Ɔtɛtsa aha ánɩ́ asʋn ladʋn amʋ́,
yia amʋ́ ɔlɔ, wa mʋ́ afa.
4Oyin ntsrakpabi ɔdʋdʋɔ,
ɔlɛha okugyiɔkʋ ɩda.
5Anɩ Wie lomoni, ɔhɩɛ ɔbʋ tumi!
Mʋ asʋn-asɩnu ɩma ɔka.
6Ɔtɛkpa ahianfɔ,
ɔtɛfɩn awuntɔlɩnpʋ da ɔsʋlʋtɔ.
7Mlɩwa ansigyi ɩlʋ da Nana Bulu ɩpan.
Mlɩda nsankuo ha anɩ Bulu amʋ.
8Ɔtɔpʋ agyinde tin nwʋlʋta,
ha nyankpʋ totswie wʋlɩ ɔsʋlʋsʋ,
ɔtɛha ɩfa tɔkwɛ abʋsʋ.
9Ɔtɛha mbwɩ atogyihɛ,
ha klankpa-abi atɔ bʋtegyi nɩ bʋdesu.
10Mʋ ansɩ tamagyi ɔpɔnkɔá ɔbʋ ɔwʋnlɩnsʋ,
ɔsrɩpʋ ayabi ɔsa tamagyi mʋ ansɩ.
11Aha ánɩ́ bʋtenya Nana Bulu ifu,
bʋtɔpʋ ansɩ dɩnka mʋ ɔdwɛá ɩma ɔkasʋ
mboun ɩwɩ tegyi mʋ ansɩ.
12Oo Yerusalemfɔ, mlɩkanfʋ Nana Bulu.
Sionfɔ, mlɩkanfʋ mlɩ Bulu!
13Tsufɛ mʋtɛha mlɩ wulu ɔnɔ aklʋn tɔwa ɔnlɩn,
otoyula wulu amʋtɔ abi.
14Mʋtɛha mlɩ ɔmátɔ tolwii,
ɔtɔpʋ atogyihɛ wanklaan bʋla mlɩ.
15Mʋ ɔlɛ ɔnɔ,
ɩtɔkɔsɩ ba mʋ́tɔ ɔsʋlʋsʋ.
16Ɔtɛha atsufɔlɩ#147:16 Atsufɔlɩ igyi snoo. tesin ɔsʋlʋsʋ fɛ opuli-mputɔ.
Ɔtɛda obétsu saɩn fɛ nsuo.
17Mʋtɛha atsufolibi tɛkpa tsu ɔsʋsʋ.
Ma ɔbɛ́talɩ lɩɩ mʋ atsalɩ ɔnɔ?
18Ɔlɛ ɔnɔ ɩtɛyɛ.
Ɔha afu tsʋn a, ɩlamli ntsu tsʋnhɛ.
19Ɔlɔpʋ mʋ asʋn ha Yakob abi-aná,
pʋ mʋ mbla mʋ́a mʋ amandɩɛ ha Israelfɔ.
20Ɔmɔkʋbwɛ mʋ́ odu ha ɔmá bamba kʋkʋ kɩ.
Mʋ́ sʋ bʋmeyin mʋ amandɩɛ.
Mlɩkanfʋ Nana Bulu!
Currently Selected:
Israelfɔ Ɩlʋ 147: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
