Israelfɔ Ɩlʋ 135
135
Nana Bulu Asumpʋ, Mlɩkanfʋ Mʋ
1Mlɩkanfʋ Nana Bulu!
Mlɩkanfʋ mʋ ɩda.
Nana Bulu asumpʋ, mlɩkanfʋ mʋ.
2Mlɩ aha ánɩ́ mlɩtosum Nana Bulu woyitɔ,
anɩ Bulu amʋ wunsɩnɛsʋ,
3mlɩkanfʋ Nana Bulu, tsufɛ ɔbʋ alɛ.
Mlɩwa ɩlʋ kanfʋ mʋ ɩda, tsufɛ ɩbʋ ɔdwɛ,
4tsufɛ alalɛ Yakob abusuan ha mʋ ɩwɩ.
Alapʋ Israel bwɛ mʋ siadɩɛ.
5Nyin ánɩ́ Nana Bulu lomoni.
Anɩ Wie dʋn ɩkpɩ fɛ́ɛ́.
6Tɔá odekle ɔtɔbwɛ ɔsʋ mʋ́a asɩ,
ɔpʋ pʋ́ mʋ́ abuntɔ fɛ́ɛ́.
7Mʋtɛha agyinde tɔkʋsʋ tsu ɔyɩ ɔka,
ɔtɛha nyankpʋ tɔfwɩ ɩbɩ tswie,
ɔtɛlɛ afu tsu mʋ atɔ ɔyaɩkpa.
8Ɔlɔmɔ Egyiptefɔ abitɩ,
pʋ́ amʋ́ mbwɩ tsɔkwɩɩ fɛ́ɛ́.
9O Egyipte, ɔlɔwa osuna mʋ́a ofula, ɩlɛba mlɩsʋ,
owie mʋa mʋ asumpʋ fɛ́ɛ́.
10Ɔlɛda ɔmá-ɔmá bwie,
mɔ awie atumipʋ:
11Amorifɔ owie Sihon, Basanfɔ owie Og
pʋ́ Kanaan ɔsʋlʋsʋ awie fɛ́ɛ́.
12Ɔlɔpʋ amʋ́ ɔsʋlʋ bwɛ siadɩɛ
ha mʋ aha Israelfɔ.
13Oo Nana Bulu, fʋ ɩda bétsia brɛ fɛ́ɛ́.
Bɛ́kaɩn fʋsʋ amʋ́ otuntufla fɛ́ɛ́.
14Nana Bulu obówun mʋ asumpʋ nwɛ,
ha mʋ aha asʋ.
15Ɔmá bambasʋfɔ bʋtɔpʋ sika pɛpɛ mʋ́a fututu bwɛ atunku.
Anyankpʋsa ɩbɩ ɔnɔ gyumagyihɛ igyi.
16Atunku amʋ bʋbʋ ɔnɔ, bʋtamatɔɩ;
bʋbʋ ansibi, bʋtamawun atɔ.
17Bʋbʋ asʋ, bʋtamanu asʋn;
bʋtamafʋ ɔŋɛ.
18Atunku amʋ apwɛpʋ pʋ́ aha ánɩ́ bʋtɔpʋ ansɩ dɩnka mʋ́sʋ fɛ́ɛ́
bɔ́bwɛ fɛ atunku amʋ.
19Israel woyi, mlɩkanfʋ Nana Bulu!
Aaron woyi, mlɩkanfʋ Nana Bulu!
20Lewi woyi, mlɩkanfʋ Nana Bulu!
Mlɩá mlɩtenya Nana Bulu ifu, mlɩkanfʋ mʋ.
21Mlɩkanfʋ Nana Bulu Sion wulutɔ.
Mʋá otsie Yerusalem.
Mlɩkanfʋ Nana Bulu!
Currently Selected:
Israelfɔ Ɩlʋ 135: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
