Israelfɔ Ɩlʋ 132
132
Nana Bulu Lalɛ Sion
Yerusalem-yɔ ɩlʋ.
1Oo Nana Bulu, kaɩn Dawid ipian fɛ́ɛ́sʋ,
afʋgyi mʋ bʋalɛ.
2Ɔlɛka ntam ha Nana Bulu,
olosuan suna Yakob Bulu Ɔwʋnlɩnpʋ amʋ ɔbɛɛ,
3“Mméebitiwie mɩ woyitɔ,
ntɛ klɛdɩ mɩ ɔklansʋ.
4Mmɛ́ɛha dɩdɩ ɩkɩta mɩ,
ntɛ kpa ɔsɩkɛtɛ bun, gyɔsɩ.
5Yɔfʋn brɛá nanya ɔtɩnɛkʋ ha Nana Bulu,
nya otsiakpa ha Yakob Bulu Ɔwʋnlɩnpʋ.”
6Anɩlonu Ntam-daka amʋ nka Efrata,#2 Br. 6:41-42
anɩlowun mʋ́ Yaar adɔbʋtɔ.
7Mlɩha ayɔ mʋ otsiakpa ɩnʋ,
ayɛwɔ awunu mʋ ansɩtɔ.
8Oo Nana Bulu, kʋsʋ, fʋa fʋ Ntam-daka,
igyi fʋ tumi osuna amʋ,
amlɩyɔ fʋ ɔkpʋnʋ ɔdakpa ɩnʋ.
9Ha fʋ igyi ahapʋ abʋdɩda yilebwɛ fɛ tati,
aha ánɩ́ bʋtamakpa fʋ ɔma abʋkplʋn wa ɩlʋ ansigyisʋ.
10Fʋ osumbi Dawid sʋ
makina ɔha amʋʋ fada mʋ ofuli amʋ.
11Nana Bulu lɛka ntam, dɩnka ibwi mʋ́sʋ ha Dawid. Ɔbɛɛ,
“Fʋ ɩwɩtɔ-obi nɔ́pʋyaɩ fʋ obiasʋ.
12Nɩ fʋ abi-aná begyi mɩ ntam
pʋ́ ɔnɔá nɛlɛsʋ a,
mʋmʋ amʋ́ abi obégyi obia amʋ brɛ fɛ́ɛ́.”
13Tsufɛ Nana Bulu lalɛ Sion.
Ɩnʋ olekleá ɩbwɛ mʋ woyi.
14Ɔbɛɛ, “Kɩ, nfɩ ɔbɔ́bwɛ mɩ ɔkpʋnʋ ɔdakpa brɛ fɛ́ɛ́ nɩ.
Nfɩ nétsia, tsufɛ nfɩ ndekle nɩ.
15Nɔ́pʋ atogyihɛ bʋla Sionfɔ,
amʋ́ aha ánɩ́ bʋma tɔtɔ bégyi mwɛ.
16Nɔ́pʋ nkpahɔ dɩda amʋ́ igyi ahapʋ, fɛ tati.
Mʋ́tɔ aha ánɩ́ bʋtamakpa Bulu ɔma
bɔ́kplʋn wa ɩlʋ ansigyisʋ.
17Nɛ́ha owie otumipʋ ɔbɛ́dalɩ tsu Dawid abusuantɔ.#1 Aw. 11:36
Nala ɔkandɩɛ yaɩ ha ɔha amʋʋ nɛda ofuli amʋ.
18Nɔ́pʋ pɛlɩ dɩda mʋ alupʋ,
tamɛ mʋ mʋ́ mʋ owiepa bɔ́wankɩ.”
Currently Selected:
Israelfɔ Ɩlʋ 132: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
