Israelfɔ Ɩlʋ 116
116
Mméesi Su Kpoli Bulu Mɩ Nkpatɔ
1Ntɔdwɛ Nana Bulu,
tsufɛ alanu mɩ ɔmɛ pʋ́ mɩ atɔ kʋlɩhɛ.
2Ɔtɛyaa asʋ ha mɩ.
Mʋ́ sʋ mméesi su kpoli mʋ mɩ nkpatɔ fɛ́ɛ́.
3Lowu lɛfɩnɩ ayibi bomli mɩ,
afulitɔyɔ lɔwa mɩ ifu.
Ɩkplan mʋ́a ahʋmɩtɩ lɔdʋn mɩ.
4Ɩnʋ nosu kpoli Nana Bulu mbɛɛ,
“Ao Nana Bulu, kokoli lɛ mɩ!”
5Awɩtɔlɛpʋ pʋ́ yile ɔbwɛpʋ Nana Bulu gyi.
Nwɛ owunpʋ anɩ Bulu gyi.
6Otegyi ɩban wa aha ánɩ́ bʋmeyin ɔlala.
Ɩlɔdʋn mɩ, ɔlɔhɔ mɩ nkpa.
7Mɩ ɔkla, yinki yɛda ɔkpʋnʋ,
tsufɛ Nana Bulu lahɩɛ wa awɩtɔlɛ ha mɩ,
8tsufɛ alalɛ mɩ tsu lowutɔ,
Alatsitsi mɩ ntsú,
kɩta mɩ lɩɩ, mmɛdɩda.
9Mɛnɩ nétsia nkpa wanklaan ha Nana Bulu,
akɩankpapʋ ɔsʋlʋ anfɩsʋ.
10Brɛá nɛblɩ mbɛɛ, “Nhɩɛ ndɛ ipian wun”
kʋraa nɔhɔ fʋ gyi nɩ.
11Brɛá ɔkla lɛsrɩ mɩ a, nɛblɩ mbɛɛ,
“Afunupʋ anyankpʋsa fɛ́ɛ́ bʋgyi.”
12Ntɔ nɛ́talɩ pʋda Nana Bulu ɩpan,
mʋ awɩtɔlɛ kpɔnkpɔntɩ anfɩ fɛ́ɛ́ sʋ?
13Nótsu nkpahɔ-ɛwɛ fʋa,
su kpoli mʋ, pʋda mʋ ɩpan.#Eks. 29:40
14Nɛ́ka ɩkɔá notsula ha Nana Bulu,
mʋ aha fɛ́ɛ́ ansɩtɔ.
15Aha ánɩ́ bʋtamakpa Nana Bulu ɔma
lowu ɩhɩɛ bʋ bia mʋ ansɩtɔ.
16Oo Nana Bulu, fʋ osumbi ngyi.
Fʋ osumbi tsɩhɛ mʋ bi ngyi,
falɛ mɩ lɛ ɩkantɔ.
17Oo Nana Bulu, nósu kpoli fʋ,
pʋ ɩpan bɔ afɔdɩɛ ha fʋ.
18Nɛ́ka ɩkɔá notsula ha Nana Bulu,
mʋ aha fɛ́ɛ́ ansɩtɔ,
19mʋ ɔtswɛkpa nwunsɩnɛsʋ Yerusalem wulu nsɩnɛ.
Mlɩkanfʋ Nana Bulu!
Currently Selected:
Israelfɔ Ɩlʋ 116: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
