Marko 14
14
Bɛkɩklɩ Yesu Nwunsʋ
(Mateo 26:1-5; Luka 22:1-2; Yohane 11:45-53)
1Ilesi nkenyɔ Yudafɔ abʋgyi Israelfɔsʋ Katsʋn Nkɛ pʋ́ Bodobodo Mátuhɛ Nkɛ. Alɩ brɛ amʋtɔ Bulu igyi ahapʋ dɛhɛn pʋ́ Mose mbla asunapʋ bodunka ɔkpa ánɩ́ bɔ́tsʋn mʋ́sʋ kɩta Yesu ŋaintɔ, mɔ mʋ kokooko. 2Tamɛ bɛblɩ bɛɛ, “Megyi Katsʋn Nkɛ anfɩtɔ abɔ́mɔ mʋ, mɛnɩ kpokiti mɛ́ɛda ɔmá amʋtɔ.”
Ofobi Fanfaanfan Pʋwʋlɩ Yesu
(Mateo 26:6-13; Yohane 12:1-8)
3Brɛá Yesu bʋ Betania wulutɔ, Simon ɔkʋá alalɔ ɩlɔ pɛpɛ kɩ woyitɔ ɔdɛ atɔ gyi a, ɔtsɩ ɔkʋ lɛba ɩnʋ. Ɔdɛ prɛntʋa wanklaan kʋá ofobi fanfan ánɩ́ ɩbʋ ibia bʋ mʋ́tɔ. Oletii mʋ́ ɔnɔ, ɔlɛtsɛɩ ofobi amʋ wʋlɩ Yesu nwuntɔ. 4Akʋ bʋbʋ ɩnʋá ɩmɔwa amʋ́ ɔdwɛ. Bɛfɩtɛ aba bɛɛ, “Ntogyi sʋ ɔdɛ ofobi anfɩ yinta? 5Tɛkɩ abɛ́talɩ fɛ ofobi fanfan anfɩ mʋ́ ibia bɔ́dʋn ɔbakʋlɛ ofi ɔkʋlɛ ɩkɔka anfɩ, pʋha ahianfɔ.” Bɛhɩɛ wa ɩyɩn wa ɔtsɩ amʋ.
6Tamɛ Yesu lɛblɩ ɔbɛɛ, “Mlɩsi mʋ! Ntogyi sʋ mlɩdɛ mʋ han? Ɩtɔ yile alabwɛ ha mɩ. 7Ahianfɔ bétsia mlɩ wa ekekegyiɛkɛ. Bregyibrɛá mlɩdekle a, mlɛ́talɩ wa awɩtɔlɛ ha amʋ́, tamɛ mɩ mʋ́ mméetsia mlɩtɔ yɔ. 8Alabwɛ mʋ́á ɔbɛ́talɩ pʋla mɩ ɔyʋlʋ yaɩ ha mɩ opulakɛ. 9Ɔnɔkwalɩ ndɛ mlɩ bla. Ɔyɩtɔ ɔtɩnɛgyiɔtɩnɛá bɛ́da Bulu asʋn wanklaan amʋ ɔkan a, bɛ́blɩ tɔ anfɩ ɔtsɩ anfɩ labwɛ anfɩ pʋkaɩn mʋsʋ.”
Yuda Iskariot Lotsula Ánɩ́ Ɔbɛ́lɛ Yesu Ha
(Mateo 26:14-16; Luka 22:3-6)
10Mʋ́ ɔma a, mʋ akasɩpʋ duanyɔ amʋtɔ ɔkʋlɛá bʋtɛtɩ mʋ Yuda Iskariot loyowun Bulu igyi ahapʋ dɛhɛn amʋ, mɛnɩ ɔbɛ́lɛ Yesu ha amʋ́. 11Brɛá bonu asʋn anfɩ a, ɩlɛhɩɛ wa amʋ́ ɔdwɛ. Bɛhɩɛ mʋ asɩ ánɩ́ bɛ́ka mʋ ɩkɔ. Mʋ́ sʋ olodunka ɔkpa ánɩ́ ɔbɔ́tsʋn mʋ́sʋ lɛ Yesu ha amʋ́.
Katsʋn Atogyihɛ Gyi
(Mateo 26:17-25; Luka 22:7-14, 21-23; Yohane 13:21-30)
12 Bodobodo Mátuhɛ Nkɛ amʋtɔ ɛkɛ gyankpapʋá bʋtɔmɔ Israelfɔsʋ Katsʋn Nkɛ akufa lɔfʋn. Yesu akasɩpʋ bɛfɩtɛ mʋ bɛɛ, “Osunapʋ, obu mɔmʋtɔ ayɛla ha fʋ, afʋgyi Katsʋn Nkɛtɔ atogyihɛ amʋ?”
13Mʋʋ ɔlɔwa amʋ́tɔ abanyɔ, bla amʋ́ ɔbɛɛ, “Mlɩyɔ Yerusalem wulutɔ. Mléfia oyin ɔkʋá ɔsʋ ntsu-ɔlɔ, mlɩbuo mʋ. 14Woyi oduatɔ obówie a, mlɩfɩtɛ woyi mʋ wie amʋ mlɩaa, ‘Nkʋnʋ afɔɔ ɔswɩɩkpa bʋ, mɩa mɩ akasɩpʋ aba begyi Israelfɔsʋ Katsʋn atogyihɛ amʋ ɩnʋ?> 15Obósuna mlɩ abansrʋ yile kʋá bala mʋ́tɔ yaɩ. Mlɩbwɛ atɔ amʋ yaɩ ɩnʋ.”
16Yesu akasɩpʋ amʋ bɔyɔ wulu amʋtɔ a, bowun togyitɔ alɩ amʋʋ Yesu lɛbla amʋ́ amʋ pɛpɛɛpɛ. Bɔbwɛ Israelfɔsʋ Katsʋn atogyihɛ amʋ yaɩ ɩnʋ.
17Brɛá nsaɩntɔ deklun a, Yesu mʋa mʋ akasɩpʋ bɛba ɩnʋ. 18Atɔ amʋ ogyikpa a, Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Mlɩtɔ ɔkʋlɛá mɩa mʋnyɔ ɩbɩ da ɔlɛpɛtɔ ɔbɛ́lɛ mɩ ha.”
19Asʋn anfɩ lɛhɩɛ han akasɩpʋ amʋ. Mʋ́ sʋ befi asɩ bʋdɛ mʋ fɩtɛ ɩkʋlɛ-kʋlɛ bɛɛ, “Mɩ nɩ loo?”
20Yesu lɛbla amʋ́ ɔbɛɛ, “Mlɩ aha duanyɔ anfɩtɔ ɔkʋlɛá mɩa mʋnyɔ ɩbɩ da ɔlɛpɛtɔ ɔbɛ́lɛ mɩ ha nɩ. 21Mɩ, Nyankpʋsa-Mʋ-Bi anfɩ nówu fɛ alɩá bɔwanlɩn tswɩ, tamɛ ɔha amʋʋ ɔbɛ́lɛ mɩ ha amʋ ɔgyɔwɩ nɩ. Nɩ bʋmetepi kwɩɩ mʋ kʋraa a, tɛkɩ ɩbʋ alɛ ha mʋ.”
Yesu Ntʋpwɛ Atogyihɛ Trahɛ
(Mateo 26:26-30; Luka 22:14-20; 1 Korintofɔ 11:23-25)
22Brɛá bʋdɛ atɔ amʋ gyi a, Yesu lɛlɛ bodobodo ipin. Ɔlɛda Bulu ɩpan, biabia mʋ́tɔ pʋha amʋ́, blɩ ɔbɛɛ, “Mlɩhɔ, mɩ ɔyʋlʋ nɩ.”
23Ɩnʋ olotsu nta-ɛwɛ, ɔlɛda Bulu ɩpan, pʋha amʋ́ fɛ́ɛ́ bonun. 24Mʋʋ ɔlɛbla amʋ́ ɔbɛɛ, “Mɩ obugya nɩ. Mʋ́ Bulu dɛpʋsi mʋ ntam#14:24 Ntam pɔpwɛ bʋ nwʋlʋ dada amʋ akʋtɔ. ánɩ́ alaka ha ahasʋ nɩ. Bɛ́tsɛɩ mʋ́ wʋlɩ asɩ aha tsɔtsɔɔtsɔ lakpan sʋ. 25Ɔnɔkwalɩ ndɛ mlɩ bla, mmɛ́ɛtra nun waɩn-abi nta anfɩ alɩɩ yɔfʋn ɛkɛá nónun mʋ́ pɔpwɛ Bulu iwiegyi amʋtɔ.”
26Benya wa ɩlʋ da Bulu ɩpan ta alɩ bɛnatɩ yɔ Olif ɩbʋ amʋsʋ.
Petro Ɔbɔ́swɩɩ Ɔbɛɛ Mʋmeyin Yesu
(Mateo 26:31-35; Luka 22:31-34; Yohane 13:36-38)
27Mʋʋ Yesu lɛbla amʋ́ ɔbɛɛ, “Mlɩ fɛ́ɛ́ mléyinki mɩ ɔma. Tsufɛ Bulu ɔnɔsʋ atɔɩpʋ amʋ bɔwanlɩn wa Bulu asʋn amʋtɔ bɛɛ, ‘Nɛ́da akufa ɔkpapʋ amʋ lɛda, mʋ akufa bɛdasaɩn.> 28Tamɛ nɩ Bulu ɔkʋsʋa mɩ tsu afulitɔ a, négya mlɩ nkpa yɔ Galilea ɔmátɔ.”
29Petro lɛbla mʋ ɔbɛɛ, “Nɩ amʋ́ fɛ́ɛ́ béyinki fʋ ɔma kʋraa a, mɩ mʋ́ mméeyinki ɛkɛkɛɛkɛ.”
30Yesu lɛbla mʋ ɔbɛɛ, “Ɔnɔkwalɩ ndɛ fʋ bla. Onyenɩ, asa batɛ ɔbɛ́lɛ ɔnɔ tse nyɔ a, fɔ́swɩɩ pʋ ɩbɩ wa ogya tse sa fɛɛ fʋmeyin mɩ.”
31Ɩnʋ Petro lɛfɩn yabi yi ɔbɛɛ, “Nɩ lowu igyi kʋraa a, mméekina fʋ ɛkɛkɛɛkɛ.”
Alɩ kɛn atrahɛ amʋ ɛ fɛ́ɛ́ bɛblɩ nɩ.
Mpaɩbɔ Getsemane
(Mateo 26:36-46; Luka 22:39-46)
32Boyowie ɔtɩnɛkʋá bʋtɛtɩ ɩnʋ Getsemane. Mʋʋ Yesu lɛbla mʋ akasɩpʋ amʋ ɔbɛɛ, “Mlɩtsia nfɩ, nɔ́yɔbɔ mpaɩ.” 33Ɔlɛkpa Petro mʋa Yakobo pʋ́ Yohane buo ɩwɩ. Ɩnʋ asʋn lɛhɩɛ han mʋ, mʋ ansɩ lɛpɛ. 34Mʋʋ ɔlɛbla amʋ́ ɔbɛɛ, “Asʋn ɩhɩɛ dɛ mɩ han. Idekle mɔ mɩ. Mlɩtsia nfɩ, amlɩgyo.”
35Ɩnʋ ɔlɛnatɩ yɔ nkpa kpalobi, ɔlɛda akpawunu kokoli Bulu ɔbɛɛ, “Nɩ ɩbɔ́wa alɛ a, ha brɛ anfɩ ɩtsʋn mɩsʋ.” 36Mʋʋ ɔlɛblɩ ɔbɛɛ, “Abba#14:36 ‘Abba!> asɩ gyi, ‘Mɩ Sɩ!> mɩ Sɩ, fʋtɛtalɩ bwɛ togyitɔ. Ha nta-ɛwɛ anfɩ#14:36 Nta-ɛwɛ anfɩ igyi ɩwɩɔsɩn ánɩ́ Yesu obówun. ɩtsʋn mɩsʋ! Tamɛ megyi tɔá ndekle, mboun mʋ́á fʋdekle ɩba mʋ́tɔ!”
37Oleyinki ba akasɩpʋ amʋ wa bowun ánɩ́ bʋdɛdɩdɩ. Ɩnɩ sʋ ɔlɛfɩtɛ Petro ɔbɛɛ, “Simon, fʋdɛdɩdɩ? Fʋmɛtalɩ gyo dɔnhwɩrɩ kʋlɛ kpan? 38Mlɩgyo amlɩkokoli Bulu, mɛnɩ mlɩmóowie ɩsɔkɩtɔ. Tsufɛ ɔŋɛ amʋ dekle, tamɛ nyankpʋsa lɔpɔn.”
39Ɔlɛtra yɔbɔ mpaɩ, bla Bulu asʋn kuakʋlɛ amʋ kɛn. 40Ɔlɛtra yinki ba bowun ánɩ́ akasɩpʋ amʋ bʋtra bʋdɛdɩdɩ, tsufɛ dɩdɩ dɛ amʋ́ bʋ. Bʋmɛtalɩ bla mʋ asʋansʋ.
41Brɛá ɔlɛba otse sasɩ a, ɔlɛfɩtɛ amʋ́ ɔbɛɛ, “Mlɩlatra si mlɩda mlɩdɛ ɔkpʋnʋ da? Itsia alɩ ngya! Brɛ amʋ lafʋn ánɩ́ bɔ́pʋ mɩ, Nyankpʋsa-Mʋ-Bi anfɩ wa lakpan abwɛpʋ ɩbɩtɔ. 42Mlɩkʋsʋ ayɔ. Mlɩkɩ, ɔha amʋʋ ɔdɛ mɩ lɛ ha amʋ na a!”
Yesu Kɩta
(Mateo 26:47-56; Luka 22:47-53; Yohane 18:3-12)
43Yesu ɔnɔ mesi asa akasɩpʋ duanyɔ amʋtɔ ɔkʋlɛá bʋtɛtɩ mʋ Yuda lobowie ɩnʋ. Ɔdɔm ánɩ́ bʋdɛ ndayi pʋ́ nkpoti bʋbuo mʋ. Bulu igyi ahapʋ dɛhɛn, Mose mbla asunapʋ pʋ́ Yudafɔ ahandɛ amʋ lɔwa amʋ́. 44Yuda amʋʋ ɔlɛlɛ Yesu ha amʋ lɛbla ɔdɔm amʋ yaɩ ɔbɛɛ, “Ɔha amʋʋ nɛ́lata puta amʋ gyi ɔha amʋ nɩ. Mlɩkɩta mʋ kinkiinkin, amlɩkpa mʋ natɩ.”
45Ɩnʋ ɔlɛnatɩ laa yɔ Yesu wa, yokpoli mʋ ɔbɛɛ, “Osunapʋ!” Ɔlɛlata mʋ puta. 46Ɩnʋ aha amʋ bɛnatɩ tʋ Yesu, kɩta mʋ kinkiinkin. 47Tamɛ ɩnʋ alɩɩpʋ amʋtɔ ɔkʋlɛ lɔtswɩ mʋ ɔdayi kpa Bulu igyi ɔhapʋ dɛhɛn osumbi ɔkʋ ɩsʋ lɛ. 48Ɩnʋ Yesu lɛfɩtɛ amʋ́ ɔbɛɛ, “Ogyo otswapʋ ngyi, sʋ mlɩlatsu nkpoti pʋ́ ndayi mlɛba mɩ ɔkɩtakpa? 49Ntsie mlɩ wa Bulu ɔtswɛkpa wunsɩnɛsʋ ɩnʋ ekekegyiɛkɛ ndɛ mlɩ atɔ suna, mlɩmɛkɩta mɩ ɛkɛkɛɛkɛ. Ɩnɩ laha Bulu asʋn wanlɩnhɛ amʋ ɩlaba mʋ́tɔ.”
50Ɩnʋ mʋ akasɩpʋ amʋ fɛ́ɛ́ bɛsrɩ si mʋ.
51Ilesi ɔyasubi ɔkʋá ɔlɔwa liga nkʋlɛ. Bɛkɩta mʋ, 52tamɛ ɔlɔkɔlɩ si mʋ liga amʋ wa amʋ́ ɩbɩtɔ, pʋ yaya srɩ.
Yudafɔ Ahandɛ Ansɩtɔ Lɩɩ
(Mateo 26:57-68; Luka 22:54-55, 63-71; Yohane 18:13-14, 19-24)
53Bɛkpa Yesu ya Bulu igyi ɔhapʋ dɛhɛn woyi. Igyi ahapʋ dɛhɛn, Mose mbla asunapʋ pʋ́ Yudafɔ ahandɛ amʋ fɛ́ɛ́ bafia ɩnʋ. 54Petro lɛpɛtɩ buo amʋ́ ɔma tsutsuutsu, alɩɩ yowie-woyitɔ ɩnʋ. Ɩnʋ oleyetsia ɩnʋ asumpʋ wa, ɔdɛ ogya nun. 55Ɩnʋ Bulu igyi ahapʋ dɛhɛn pʋ́ Yudafɔ asʋn agyipʋ#14:55 Yudafɔ asʋn agyipʋ anfɩ bʋtɛtɩ Sanhedrin Griki ɔblɩtɔ. atrahɛ fɛ́ɛ́ bodunka aha ánɩ́ bɛ́ka asʋn dɩnka Yesusʋ, mɛnɩ bɛ́lɩɩ amʋ́ asʋn blɩhɛsʋ mɔ mʋ, tamɛ bʋmenya. 56Tsufɛ aha tsɔtsɔɔtsɔ bɔwa afunu dɩnka mʋsʋ, tamɛ amʋ́ fɛ́ɛ́ ɔnɔ lɔtsʋn ɔtsan.
57Ɩnʋ akʋ bɔkʋsʋ ka asʋn dɩnka mʋsʋ bɛɛ, 58“Anɩlonuá ɔlɛblɩ ɔbɛɛ, ‘Nóbwie Bulu ɔtswɛkpa anfɩ bapʋ ɩbɩ yi anfɩ, tamɛ nkɛnsa ɔma a, nɛ́layi pɔpwɛá megyi nyankpʋsa ɔbɔ́pʋ ɩbɩ yi mʋ́.> ” 59Tamɛ amʋ́ ɛ amʋ́ ɔnɔ mɔbwɛ kʋlɛ.
60Ɩnʋ Bulu igyi ɔhapʋ dɛhɛn amʋ lɔkʋsʋ lɩɩ amʋ́ fɛ́ɛ́ ansɩtɔ, ɔlɛfɩtɛ Yesu ɔbɛɛ, “Fʋma ɔnɔ lɛ? Fʋma asʋansʋ blɩ pʋlɛ fʋ ɩwɩ?”
61Tamɛ Yesu mɛlɛ asʋansʋ ɔnɔ. Mʋʋ Bulu igyi ɔhapʋ dɛhɛn amʋ lɛtra fɩtɛ mʋ ɔbɛɛ, “Bulu amʋʋ bʋtɛkanfʋ amʋ mʋ Bi gyi fʋ? Fʋgyi Kristo (ɔha amʋʋ Bulu lɛda mʋ ofuli amʋ) nɩ?”
62Yesu lɛlɛ mʋ́ ɔnɔ ɔbɛɛ, “Ee! Mɩ nɩ! Mlowun ánɩ́ mɩ, Nyankpʋsa-Mʋ-Bi anfɩ ntsie Bulu Otumipʋ gyɔpɩsʋ anfɩ ndɩn nwʋlʋtasʋ tsu ɔsʋsʋ nɛba.”
63Bulu igyi ɔhapʋ dɛhɛn amʋ lɛkɩta mʋ atadɩɛ balɩ mʋ́ kɩaan.#14:63 Ilosuna ánɩ́ asʋn amʋ lawie mʋ ɩwɩtɔ dʋbɩ. Mʋʋ ɔlɛblɩ ɔbɛɛ, “Adansɩɛ mɔmʋ anɩtra anɩgyo? 64Mlɩlanu abususʋá alablɩ. Nkalɩ gyi mlɩ agywɩɩn?”
Amʋ́ fɛ́ɛ́ botsula ánɩ́ olegyi pɔn, bʋmɔ mʋ.
65Amʋ́tɔ akʋ bɔwa atsʋnɔ tutu wʋlɩ mʋ bɩ. Bɔpʋ atɔ tin mʋ ansibi, bɔfʋlɩ mʋ atswɛ, bla mʋ bɛɛ, “Bulu ɔnɔsʋ ɔtɔɩpʋ, suna anɩ ɔha ánɩ́ ɔlɔfʋlɩ fʋ ɩtswɛ!” Ɩnʋ agyopʋ amʋ ɛ bɛdada mʋ asʋtɔ.
Petro Lɔswɩɩ Ɔbɛɛ Mʋmeyin Yesu
(Mateo 26:69-75; Luka 22:56-62; Yohane 18:15-18, 25-27)
66Petro lesi otsie wunsɩnɛsʋ ɩnʋ, Bulu igyi ɔhapʋ dɛhɛn amʋ osumbi tsɩhɛ ɔkʋ lɛba. 67Brɛá olowun Petro tsie ɔdɛ ogya nun a, ɔlɛkɩ mʋ diin. Mʋʋ ɔlɛfɩtɛ Petro ɔbɛɛ, “Fʋa Yesu Nasaretyin amʋ nyɔ na.”
68Tamɛ Petro lɔswɩɩ blɩ ɔbɛɛ, “Mmeyin tɔtɔ tsu asʋn anfɩ fʋdɛblɩ anfɩ ɩwɩ!” Ɔlɛnatɩ yɛlɩɩ ɔkpa ɔnɔ, ɩnʋ batɛ lɔbɔn.#14:68 Ɩnʋ batɛ lɔbɔn ɩma nwʋlʋ dada amʋ akʋtɔ.
69Osumbi tsɩhɛ amʋ lɛtra yɔtʋ mʋ ɩnʋ, ɔlɔwa aha amʋʋ bʋlɩɩ ɩnʋ amʋ bla bɩ ɔbɛɛ, “Amʋ́tɔ ɔkʋlɛ gyi oyin anfɩ.” 70Tamɛ Petro lɛtra swɩɩ pʋ ɩbɩ wa ogya.
Ɩlɔbwɛ kpalobi a, aha amʋʋ bʋlɩɩ ɩnʋ amʋ bɛbla Petro bɛɛ, “Lɛlɛ mʋ́ a, amʋ́tɔ ɔkʋlɛ fʋgyi, tsufɛ Galileayin fʋ ɛ fʋgyi?”
71Ɩnʋ Petro lɔwa ntam kaka bɩ ɔbɛɛ, “Nɛka togyitɔ, mmeyin oyin anfɩ mlɩdɛ mʋ ɩwɩ asʋn blɩ anfɩ.”
72Ɩnʋ batɛ lɔbɔn otse nyɔsɩ. Mʋʋ Petro lɛkaɩn asʋn amʋʋ Yesu lɛbla mʋ ɔbɛɛ, “Fɔ́swɩɩ tse sa fɛɛ fʋmeyin mɩ asa batɛ ɔbɛ́lɛ ɔnɔ tse nyɔ.” amʋsʋ. Mʋʋ ɔlɛkpa isu yi, hɩɛ su woo.
Currently Selected:
Marko 14: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation