Mateo 26
26
Yesu Nwunsʋ Kɩklɩ
(Marko 14:1-2; Luka 22:1-2; Yohane 11:45-53)
1Brɛá Yesu losuna atɔ anfɩ fɛ́ɛ́ ta a, ɔlɛbla mʋ akasɩpʋ amʋ ɔbɛɛ, 2“Mlɩyin ánɩ́ ɩlasi nkenyɔ bégyi Israelfɔsʋ Katsʋn Nkɛ. Nkɛ amʋtɔ a, ɔkʋ ɔbɔ́pʋ mɩ, Nyankpʋsa-Mʋ-Bi anfɩ wa mɩ alupʋ ɩbɩtɔ, bɛ́da mɩ manta oyikpalihɛsʋ.”
3-4Alɩ brɛ amʋtɔ a, Yudafɔ Bulu igyi ahapʋ dɛhɛn pʋ́ amʋ́ ahandɛ befia igyi ɔhapʋ dɛhɛn Kaiafa woyitɔ, kɩta agywɩɩn ɔkpa ánɩ́ bɔ́tsʋn mʋ́sʋ kɩta Yesu ŋaintɔ, mɔ mʋ. 5Tamɛ bɛblɩ bɛɛ, bʋmɔ́ɔbwɛ mʋ́ nkɛ amʋtɔ, mɛnɩ kpokiti mɛ́ɛda ɔmá amʋtɔ.
Ofobi Fanfaanfan Pʋwʋlɩ Yesu
(Marko 14:3-9; Yohane 12:1-8)
6Brɛá Yesu bʋ Betania wulutɔ, Simon ɔkʋá alalɔ ɩlɔ pɛpɛ kɩ woyitɔ ɔdɛ atɔ gyi a, 7ɔtsɩ ɔkʋ lɛba mʋ wa. Ɔdɛ prɛntʋa wanklaan kʋá ofobi fanfan ánɩ́ ɩbʋ bia bɔ mʋ́, ɔlɛtsɛɩ ofobi amʋ wʋlɩ Yesu nwuntɔ. 8Yesu akasɩpʋ amʋ benya ɔblɔ brɛá bowun ɩnɩ. Mʋ́ sʋ bɛfɩtɛ bɛɛ, “Ntogyi sʋ ɔtsɩ anfɩ layinta ofobi fanfan anfɩ? 9Abɛ́talɩ fɛ mʋ́ ibia kpekple, pʋ kɔba amʋ ha ahianfɔ.”
10Yesu lɛbɩá ɔblɔ lakɩta amʋ́. Mʋ́ sʋ ɔlɛbla amʋ́ ɔbɛɛ, “Ntogyi sʋ mlɩdɛ mʋ han? Ɩtɔ yile alabwɛ ha mɩ. 11Ahianfɔ bétsia mlɩtɔ ekekegyiɛkɛ, tamɛ mɩ mʋ́ mméetsia mlɩ wa yɔ. 12Alatsɛɩ ofobi fanfan anfɩ wʋlɩ mɩ, pʋla mɩ ɔyʋlʋ yaɩ ha mɩ opulakɛ. 13Ɔnɔkwalɩ ndɛ mlɩ bla. Ɔyɩtɔ ɔtɩnɛgyiɔtɩnɛá bɛ́da Bulu asʋn wanklaan amʋ ɔkan a, bɛ́blɩ tɔ anfɩ ɔtsɩ anfɩ labwɛ anfɩ pʋkaɩn mʋsʋ.”
Yuda Iskariot Lotsula Ánɩ́ Ɔbɛ́lɛ Yesu Ha
(Marko 14:10; Luka 22:3-6)
14Mʋ́ ɔma a, mʋ akasɩpʋ duanyɔ amʋtɔ ɔkʋá bʋtɛtɩ mʋ Yuda Iskariot lɔyɔ Bulu igyi ahapʋ dɛhɛn amʋ wa. 15Ɔlɛyɛfɩtɛ amʋ́ ɔbɛɛ, “Nɩ nɛlɛ Yesu ha mlɩ a, ntɔ mlɛha mɩ?” Mʋ́ sʋ bɛkla sika fututu adʋasa (30) wa mʋ ɩbɩtɔ. 16Tsu brɛ amʋtɔ ɔlɔwa ɔkpa dunka ánɩ́ ɔbɔ́tsʋn mʋ́sʋ lɛ Yesu ha amʋ́.
Katsʋn Atogyihɛ Gyi
(Marko 14:12-21; Luka 22:7-14, 21-23; Yohane 13:21-30)
17Israelfɔ Bodobodo Mátuhɛ Nkɛ amʋtɔ ɛkɛ gyankpapʋ a, akasɩpʋ amʋ bɛba Yesu wa bɛfɩtɛ mʋ bɛɛ, “Anɩ Wie, obu mɔmʋtɔ ayɛla ha fʋ, afʋgyi Israelfɔsʋ Katsʋn Nkɛ atogyihɛ amʋ?”
18Yesu lɛbla amʋ́ ɔbɛɛ, “Mlɩyɔ asimasi wa wulutɔ, amlɩyɛbla mʋ mlɩaa, ‘Osunapʋ amʋ ɔbɛɛ, mɩ brɛ lafʋn. Ɩnɩ sʋ mɩa mɩ akasɩpʋ aba begyi Israelfɔsʋ Katsʋn Nkɛ amʋ fʋ woyitɔ.> ”
19Mʋ́ sʋ akasɩpʋ amʋ bɔyɛbwɛ alɩ amʋʋ Yesu lɛbla amʋ́ amʋ pɛpɛɛpɛ. Bɛla obu amʋtɔ, bwɛ Katsʋn Nkɛtɔ atogyihɛ amʋ yaɩ ɩnʋ.
20Brɛá nsaɩntɔ deklun a, Yesu mʋa mʋ akasɩpʋ bɛba betsia ɔpʋnʋ amʋ asɩ. 21Atɔ amʋ ogyikpa a, Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla, mlɩtɔ ɔkʋlɛ ɔbɛ́lɛ mɩ ha.”
22Asʋn anfɩ lɛhɩɛ han akasɩpʋ amʋ. Mʋ́ sʋ befi asɩ bʋdɛ mʋ fɩtɛ ɩkʋlɛ-kʋlɛ bɛɛ, “Mɩ Wie, mɩ nɩ loo?”
23Yesu lɛbla amʋ́ ɔbɛɛ, “Ɔha amʋʋ mɩa mʋnyɔ anɩdɛ ɩbɩ wa ɔlɛpɛ ɔkʋlɛtɔ amʋ ɔbɛ́lɛ mɩ ha. 24Mɩ, Nyankpʋsa-Mʋ-Bi anfɩ nówu fɛ alɩá bɔwanlɩn tswɩ, tamɛ ɔha amʋʋ ɔbɛ́lɛ mɩ ha amʋ ɔgyɔwɩ nɩ. Nɩ bʋmetepi kwɩɩ mʋ kʋraa a, tɛkɩ ɩbʋ alɛ ha mʋ.”
25Yuda Iskariot amʋʋ ɔlɛlɛ mʋ ha amʋ ɛ lɛfɩtɛ mʋ ɔbɛɛ, “Osunapʋ, mɩ nɩ loo?” Mʋʋ Yesu lɛbla mʋ ɔbɛɛ, “Ee, fablɩ.”
Yesu Ntʋpwɛ Atogyihɛ Trahɛ
(Marko 14:22-26; Luka 22:14-20; 1 Korintofɔ 11:23-25)
26Brɛá bʋdɛ atɔ amʋ gyi a, Yesu lɛlɛ bodobodo ipin, ɔlɛda Bulu ɩpan, biabia mʋ́tɔ pʋha mʋ akasɩpʋ amʋ, blɩ ɔbɛɛ, “Mlɩhɔ amlɩgyi. Mɩ ɔyʋlʋ nɩ.”
27Ɩnʋ olotsu nta-ɛwɛ, ɔlɛda Bulu ɩpan, pʋha amʋ́ ɔbɛɛ, “Mlɩ fɛ́ɛ́ mlɩhɔ amlɩnun. 28Mɩ obugya nɩ. Mʋ́ Bulu dɛpʋsi mʋ ntam#26:28 Ntam pɔpwɛ bʋ nwʋlʋ dada amʋ akʋtɔ. ánɩ́ alaka ha ahasʋ nɩ. Bɛ́tsɛɩ mʋ́ wʋlɩ asɩ, mɛnɩ obési aha tsɔtsɔɔtsɔ lakpan kie amʋ́. 29Ndɛ mlɩ bla mbɛɛ, mmɛ́ɛtra nun waɩn-abi nta anfɩ alɩɩ yɔfʋn ɛkɛá mɩa mlɩnyɔ abɛ́lanun mʋ́ pɔpwɛ mɩ Sɩ iwiegyi amʋtɔ.”
30Benya wa ɩlʋ da Bulu ɩpan ta alɩ, bɛnatɩ yɔ Olif ɩbʋ amʋsʋ.
Petro Ɔbɔ́swɩɩ Ɔbɛɛ, Mʋmeyin Yesu
(Marko 14:27-31; Luka 22:31-34; Yohane 13:36-38)
31Brɛá bowie Nfɔ-nyibʋ amʋsʋ a, Yesu lɛbla amʋ́ ɔbɛɛ “Mlɩ fɛ́ɛ́ mléyinki mɩ ɔma onyenɩ. Tsufɛ bɔwanlɩn wa Bulu asʋn amʋtɔ bɛɛ, ‘Nɛ́da akufa ɔkpapʋ amʋ lɛda, mʋ akufa bɛ́dasaɩn.> ” 32Mʋʋ ɔlɛtra blɩ ɔbɛɛ, “Tamɛ nɩ Bulu ɔkʋsʋa mɩ tsu afulitɔ a, négya mlɩ nkpa yɔ Galilea ɔmátɔ. Ɩnʋ mlɔ́bɔtʋ mɩ nɩ.”
33Petro lɛbla mʋ ɔbɛɛ, “Nɩ amʋ́ fɛ́ɛ́ beyinki fʋ ɔma kʋraa a, mɩ mʋ́ mméeyinki ɛkɛkɛɛkɛ.”
34Yesu lɛbla mʋ ɔbɛɛ, “Ɔnɔkwalɩ ndɛ fʋ bla. Onyenɩ, asa batɛ ɔbɛ́lɛ ɔnɔ a, fɔ́swɩɩ pʋ ɩbɩ wa ogya tse sa fɛɛ fʋmeyin mɩ.”
35Ɩnʋ Petro lɛbla mʋ ɔbɛɛ, “Nɩ lowu igyi kʋraa a, mméekina fʋ ɛkɛkɛɛkɛ.” Alɩ kɛn akasɩpʋ atrahɛ amʋ ɛ bɛblɩ nɩ.
Mpaɩbɔ Getsemane
(Marko 14:32-42; Luka 22:39-46)
36Yesu mʋa mʋ akasɩpʋ bɔyɔ ɔtɩnɛkʋá bʋtɛtɩ ɩnʋ Getsemane. Brɛá bowie ɩnʋ a, ɔlɛbla amʋ́ ɔbɛɛ, “Mlɩtsia nfɩ, nɔyɔ nkpa yɔbɔ mpaɩ.” 37Ɔlɛkpa Sebedeo abi anyɔ, bʋgyi Yakobo mʋa mʋ pio Yohane pʋ́ Petro ya. Ɩnʋ asʋn lɛhɩɛ han mʋ, mʋ ansɩ lɛpɛ. 38Mʋʋ ɔlɛbla amʋ́ ɔbɛɛ, “Asʋn ɩhɩɛ dɛ mɩ han, idekle ɩmɔ mɩ. Mlɩtsia nfɩ, mɩa mlɩnyɔ agyo.”
39Ɩnʋ ɔlɛnatɩ yɔ nkpa kpalobi, ɔlɛda akpawunu pʋ ansɩtɔ bun ɔsʋlʋtɔ, kokoli Bulu ɔbɛɛ, “Mɩ Sɩ, nɩ bɔ́wa alɛ a, ha nta-ɛwɛ anfɩ#26:39 Nta-ɛwɛ anfɩ igyi ɩwɩɔsɩn ánɩ́ Yesu obówun. ɩtsʋn mɩsʋ. Tamɛ megyi tɔá ndekle, mboun mʋ́á fʋdekle ɩba mʋ́tɔ.”
40Mʋʋ oleyinki ba akasɩpʋ amʋ wa bowun ánɩ́ bʋdɛdɩdɩ. Ɩnɩ sʋ ɔlɛfɩtɛ Petro ɔbɛɛ, “Mʋ́ sʋ mlɩmɛtalɩ tsia, mɩa mlɩnyɔ agyo dɔnhwɩrɩ kʋlɛ kpan? 41Mlɩgyo amlɩkokoli Bulu, mɛnɩ mlɩmóowie ɩsɔkɩtɔ, tsufɛ mlɩ ɔŋɛ dekle, tamɛ nyankpʋsa-oyi lɔpɔn.”
42Yesu lɛtra yokokoli Bulu ɔbɛɛ, “Mɩ Sɩ, nɩ nta-ɛwɛ anfɩ mɔ́ɔtsʋn mɩsʋ, ɩbwɛ alɩágyialɩá nónun mʋ́ a, mʋmʋ tɔá fʋdekle ɩba mʋ́tɔ.” 43Ɔlɛtra yinki ba bowun ánɩ́ akasɩpʋ amʋ bʋtra bʋdɛdɩdɩ, tsufɛ dɩdɩ dɛ amʋ́ bʋ.
44Mʋ́ sʋ ɔlɛnatɩ si amʋ́, tra yokokoli Bulu otse sasɩ, blɩ asʋn amʋ kɛn. 45Oleyinki ba akasɩpʋ amʋ wa, bɛfɩtɛ amʋ́ ɔbɛɛ, “Mlɩlatra si mlɩda mlɩdɛ ɔkpʋnʋ da? Mlɩkɩ, brɛ amʋ lafʋn ánɩ́ bɔ́pʋ mɩ, Nyankpʋsa-Mʋ-Bi anfɩ wa lakpan abwɛpʋ ɩbɩtɔ. 46Mlɩkʋsʋ ayɔ. Mlɩkɩ, ɔha amʋʋ ɔdɛ mɩ lɛ ha amʋ na a.”
Yesu Kɩta
(Marko 14:43-50; Luka 22:47-53; Yohane 18:3-12)
47Yesu ɔnɔ mesi asa akasɩpʋ duanyɔ amʋtɔ ɔkʋlɛ bʋtɛtɩ mʋ Yuda lobowie ɩnʋ. Ɔdɔm kpɔnkpɔɔnkpɔntɩá bʋdɛ ndayi pʋ́ nkpoti bʋbuo mʋ. Bulu igyi ahapʋ dɛhɛn pʋ́ Yudafɔ ahandɛ amʋ lɔwa amʋ́. 48Yuda amʋʋ ɔbɛ́lɛ Yesu ha amʋ lɛbla ɔdɔm amʋ yaɩ ɔbɛɛ, “Ɔha amʋʋ nɛ́lata puta amʋ gyi ɔha amʋ nɩ. Mlɩkɩta mʋ.”
49Ɩnɩ sʋ ɔlɛnatɩ laa yɛha Yesu itsia ɔbɛɛ, “Osunapʋ, tsia nɩ!” Ɔlɛlata mʋ puta.
50Mʋʋ Yesu lɛbla mʋ ɔbɛɛ, “Agya, bwɛ tɔá ɔbwɛkpa fɛba.”
Ɩnʋ aha amʋ bɛnatɩ tʋ Yesu, kɩta mʋ kinkiinkin. 51Ɩnʋ Yesu akasɩpʋ amʋtɔ ɔkʋlɛ lɔtswɩ mʋ ɔdayi, kpa Bulu igyi ɔhapʋ dɛhɛn osumbi ɔkʋ ɩsʋ lɛ. 52Mʋʋ Yesu lɛbla mʋ ɔbɛɛ, “Yinkia fʋ ɔdayi wa mʋ́ ɔflɛtɔ. Tsufɛ ɔha ánɩ́ ɔtɛnatɩ kɩta ɔdayi a, ɔdayi ɔnɔ otesin. 53Fʋmeyin fɛɛ, nɛ́talɩ kokoli mɩ Sɩ ɔbɛ́ha mʋ abɔpʋ tsɔtsɔɔtsɔ aku duanyɔ bɛ́ba bɔkɔ hɔ mɩ? 54Tamɛ nɩ ɩba alɩ a, nkalɩ ɩbɔ́bwɛ asa Bulu asʋn wanlɩnhɛ amʋ ɩbɛ́ba mʋ́tɔ?”
55Ɩnʋ Yesu lɛfɩtɛ amʋ́ ɔbɛɛ, “Ogyo otswapʋ ngyi, sʋ mlɩlatsu nkpoti pʋ́ ndayi mlɛba mɩ ɔkɩtakpa? Ntsie mlɩ wa Bulu ɔtswɛkpa ɩnʋ ekekegyiɛkɛ ndɛ mlɩ atɔ suna, mlɩmɛkɩta mɩ ɛkɛkɛɛkɛ. 56Tamɛ ɩnɩ fɛ́ɛ́ laba mʋ́tɔ, mɛnɩ Bulu ɔnɔsʋ atɔɩpʋ asʋn wanlɩnhɛ amʋ ɩbɛ́ba mʋ́tɔ.”
Ɩnʋ akasɩpʋ amʋ fɛ́ɛ́ bɛsrɩ si mʋ.
Yudafɔ Ahandɛ Ansɩtɔ Lɩɩ
(Marko 14:53-65; Luka 22:54-55, 63-71; Yohane 18:13-14, 19-24)
57Mʋʋ Yesu akɩtapʋ amʋ bɛkpa mʋ ya Bulu igyi ɔhapʋ dɛhɛn Kaiafa. Ɩnʋ mʋa Mose mbla asunapʋ pʋ́ Yudafɔ ahandɛ amʋ befia nɩ. 58Tamɛ Petro lɛpɛtɩ obuo amʋ́ ɔma tsutsuutsu alɩɩ bowie igyi ɔhapʋ dɛhɛn woyitɔ ɩnʋ. Oleyetsia amʋ́ agyopʋ wa, mɛnɩ obówun alɩá asʋn amʋ ɩbɔ́mɔ ɔnɔ. 59Ɩnʋ Bulu igyi ɔhapʋ dɛhɛn amʋ mʋa Yudafɔ asʋn agyipʋ amʋ fɛ́ɛ́ bodunka aha ánɩ́ bɛka asʋn dɩnka Yesusʋ, mɛnɩ bɛ́lɩɩ mʋ́sʋ mɔ mʋ. 60Afunupʋ tsɔtsɔɔtsɔ bɛdalɩ ba, tamɛ amʋ́ fɛ́ɛ́ ɔnɔ lɔtsʋn ɔtsan. Mʋ́ ɔma a, aha abanyɔ bɛdalɩ bɛlɩɩ ahandɛ amʋ ansɩtɔ, 61blɩ bɛɛ, “Oyin anfɩ lɛblɩ ɔbɛɛ, ‘Nɛ́talɩ bwie Bulu ɔtswɛkpa amʋ, lapʋ nkɛnsa yi mʋ́.> ”
62Mʋʋ Bulu igyi ɔhapʋ dɛhɛn amʋ lɔkʋsʋ lɩɩ fɩtɛ Yesu ɔbɛɛ, “Fʋma ɔnɔ lɛ? Fʋma asʋansʋ blɩ pʋlɛ fʋ ɩwɩ?” 63Tamɛ Yesu mobwii ɔnɔ. Bulu igyi ɔhapʋ dɛhɛn amʋ lɛla bla Yesu ɔbɛɛ, “Nɛka Bulu Ɔkɩankpapʋ amʋ, nɩ fʋgyi Kristo, (ɔha amʋʋ Bulu lada mʋ ofuli), ogyi Bulu mʋ Bi amʋ a, bla anɩ.”
64Mʋʋ Yesu lɛbla mʋ ɔbɛɛ, “Mʋ́ fablɩ a. Tamɛ mlɩbɩá tsu ndɛ pʋya a, mlówun mɩ, Nyankpʋsa-Mʋ-Bi anfɩ ntsie Bulu Otumipʋ gyɔpɩsʋ anfɩ ndɩn ɔsʋsʋ nwʋlʋtasʋ nɛba.”
65Mʋʋ Bulu igyi ɔhapʋ dɛhɛn amʋ lɛkɩta mʋ atadɩɛ balɩ mʋ́ kɩaan,#26:65 Ilosuna ánɩ́ asʋn amʋ lawie mʋ ɩwɩtɔ dʋbɩ. blɩ ɔbɛɛ “Alabɔ mbusuo! Adansɩɛ mɔmʋ anɩtra anɩgyo? Yɛ mlɩlanu abususʋ ánɩ́ alablɩ. 66Nkalɩ gyi mlɩ agywɩɩn?”
Bɛbla mʋ bɛɛ, “Ilehian ánɩ́ obówu!”
67Ɩnʋ botutu atsʋnɔ wʋlɩ mʋ ansɩtɔ, wɔwɔ mʋ atswɛ. Akʋ ɛ bɛdada mʋ asʋtɔ, 68fɩtɛ mʋ bɛɛ, “Bulu ɔnɔsʋ ɔtɔɩpʋ Kristo, ma lada fʋ? Bla anɩ.”
Petro Lɔswɩɩ Ɔbɛɛ Mʋmeyin Yesu
(Marko 14:66-72; Luka 22:56-62; Yohane 18:15-18, 25-27)
69Petro tsie wunsɩnɛsʋ ɩnʋ, otsibi ɔkʋ lɔbɔtʋ mʋ bla mʋ ɔbɛɛ, “Fʋa Yesu Galileayin amʋ nyɔ na.”
70Tamɛ Petro lɔwa ɔnɔlɩ aha amʋ fɛ́ɛ́ ansɩtɔ ɔbɛɛ, “Mmeyin asʋn anfɩ fʋdɛblɩ anfɩ ɩwɩ kʋkʋʋkʋ.” 71Mʋ́ ɔma woyi-ɔnɔ ɩnʋ ɛ a, otsibi ɔkʋ ɛ lɛbɩ Petro. Mʋ́ sʋ ɔlɛbla aha ánɩ́ bʋlɩɩ ɩnʋ ɔbɛɛ, “Oyin anfɩ mʋa Yesu Nasaretyin amʋ nyɔ tɛnatɩ.”
72Ɩnʋ Petro lɔpʋ ɔnɔlɩ ka ntam, blɩ ɔbɛɛ, “Mmeyin mʋ.”
73Mʋ́ ɔma a, aha amʋʋ bʋlɩɩ ɩnʋ amʋtɔ akʋ bɛba bɛbla Petro bɛɛ, “Lɛlɛ mʋ́ a, anɩyin ánɩ́ fʋa Yesunyɔ na, tsufɛ fʋ tɔɩtɔ dɛ anɩ suna alɩ.”
74Ɩnʋ Petro lɔwa ntam kaka bɩ ɔbɛɛ, “Nɛka togyitɔ, mmeyin oyin amʋʋ mlɩdɛ mʋ ɩwɩ asʋn blɩ amʋ!”
Ɩnʋnʋ batɛ lɔbɔn. 75Petro lɛkaɩn ánɩ́ Yesu lɛbla mʋ ɔbɛɛ, “Fɔ́swɩɩ tse sa fɛɛ fʋmeyin mɩ asa batɛ ɔbɛ́lɛ ɔnɔ.” Ɩnʋ ɔlɛdalɩ hɩɛ yesu.
Currently Selected:
Mateo 26: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
