Mateo 2
2
Anyansapʋ Akʋ Ba
1Brɛá Owie Herode dɛ iwie gyi Yudea ɔmátɔ bɔkwɩɩ Yesu wulu kʋá bʋtɛtɩ mʋ́ Betlehem, ɩbʋ Yudea ɔmátɔ ɩnʋ. Mʋ́ ɔma a, anyansapʋ akʋá bʋtowun atɔ ntsrakpabitɔ botsu owi ɔdalɩkpa ɔmá kʋtɔ ba Yerusalem wulutɔ. 2Bɛfɩtɛ bɛɛ, “Nkʋnʋ bakwɩɩ Yudafɔ owie amʋ? Anɩlowun mʋ osuna ánɩ́ igyi ɔtsrakpabi owi ɔdalɩkpa ɩnʋ. Mʋ́ sʋ aba bosum mʋ.”
3Owie Herode lonu asʋn anfɩ a, opuni letsii mʋa Yerusalemfɔ fɛ́ɛ́. 4Mʋ́ sʋ ɔlɛtɩ Yudafɔ Bulu igyi ahapʋ dɛhɛn pʋ́ Mose mbla asunapʋ fɛ́ɛ́ fia, fɩtɛ amʋ́ ɔtɩnɛá bɔ́kwɩɩ Kristo, (ɔha amʋʋ Bulu lada mʋ ofuli amʋ).
5Bɛbla mʋ bɛɛ “Betlehem wuluá ɩbʋ Yudea ɔmátɔ. Alɩ Bulu ɔnɔsʋ ɔtɔɩpʋ ɔkʋ lɔwanlɩn tswɩ nɩ. 6Ɔbɛɛ,
‘Fʋ Betlehem, Yudea wulu,
fʋmegyi wulu tukuriibi ɔkpagyiɔkpasʋ Yudea awulu yile amʋtɔ.
Tsufɛ ɔmásʋ ogyipʋ ɔkʋ ɔbɛ́dalɩ tsu fʋtɔá
ɔbɛ́kpa Bulu aha Israelfɔ.> ”
7Mʋ́ sʋ Owie Herode lɛtɩ anyansapʋ amʋ nkʋlɛ, fɩtɛ amʋ́ brɛá bowun osuna ɔtsrakpabi amʋ, bɛbla mʋ. 8Mʋʋ ɔlɔwa amʋ́ Betlehem ɔbɛɛ, bʋyodunka kebi amʋ wanklaan. Nɩ bowun mʋ a, bʋyinki bɛbla mʋ, mɛnɩ mʋ ɛ moyesum mʋ.
9Olenya bla amʋ́ ta alɩ bɛnatɩ. Ɔtsrakpabi amʋʋ bowun owi ɔdalɩkpa amʋ, lɛkpa amʋ́ alɩɩ yɛlɩɩ ɔtɩnɛá kebi amʋ bʋ. 10Brɛá bowun ɔtsrakpabi amʋ a, ansɩ lɛhɩɛ gyi amʋ́. 11Bowie-woyitɔ ɩnʋ a, bowun kebi amʋ mʋa mʋ yin Maria, bɛda akpawunu sum kebi amʋ. Bɛsankɩ amʋ́ akentebi, bekie mʋ sika pɛpɛ, ɔhɩɛn pʋ́ ohuam.
12Mʋ́ ɔma a, Bulu lɔwa mbla ha amʋ́ okudetɔ ɔbɛɛ, bʋmáyinki yɔtsʋn Herode wa. Mʋ́ sʋ bɔtsʋn ɔkpa bambasʋ yɔ amʋ́ wulutɔ.
Yesu Mʋa Mʋ Akwɩɩpʋ Egyipte Ɔmátɔ Yɔ
13Brɛá anyansapʋ amʋ bɛnatɩ a, Bulu-ɔbɔpʋ lɛlɛ ɩwɩ ɔwan suna Yosef okudetɔ, bla mʋ ɔbɛɛ, “Kʋsʋ, afʋkpa kebi amʋ mʋa mʋ yin srɩ ya Egyipte ɔmátɔ. Mlɩtsia ɩnʋ yɔfʋn brɛá nɛ́bla fʋ mbɛɛ mlɩyinki ba, tsufɛ Owie Herode obódunka kebi amʋ, mɔ mʋ.”
14Mʋ́ sʋ Yosef lɔkʋsʋ onye-onye amʋ, kpa Maria mʋa kebi amʋ srɩ ya Egyipte ɔmátɔ. 15Betsia ɩnʋ yɔfʋn brɛá Herode lowu. Ɩnɩ lɛha Bulu asʋn ánɩ́ ɔlɛblɩ tsʋn mʋ ɔnɔsʋ ɔtɔɩpʋ ɔkʋsʋ lɛba mʋ́tɔ. Ɔbɛɛ, “Nɛtɩ mɩ bi amʋ tsu Egyipte ɔmátɔ.”
Betlehemfɔ Abi Mɔ
16Brɛá Owie Herode lowun ánɩ́ anyansapʋ amʋ bamlɛ mʋ a, ɔblɔ lɛhɩɛ kɩta mʋ. Ɔlɔwa mʋ ɩsa akɔpʋ ɔbɛɛ, bʋyɔ Betlehem wulutɔ pʋ́ mʋ́ nkudasɩ, abʋyɛmɔ abi yinhɛá bahɔ tsu nfinyɔ ba ayasɩ fɛ́ɛ́. Tsufɛ anyansapʋ amʋ bɛbla mʋ bɛɛ, begyankpa wun ɔtsrakpabi amʋ nfinyɔ nɩ.
17Ɩnɩ lɛha Bulu asʋn ánɩ́ ɔlɛblɩ tsʋn mʋ ɔnɔsʋ ɔtɔɩpʋ Yeremiasʋ lɛba mʋ́tɔ. 18Ɔbɛɛ,
“Bonu isu mʋ́a olu kʋá ɩmɛka tin Rama wulutɔ.
Rahel dɛ mʋ abi su. Omotsula ánɩ́ bʋkpata mʋ,
tsufɛ bʋtra bʋma ɩnʋ.”
Yesu Mʋa Mʋ Akwɩɩpʋ Yinki Tsu Egyipte
19Owie Herode lowu ɔma a, Bulu-ɔbɔpʋ lɛlɛ ɩwɩ ɔwan suna Yosef okudetɔ Egyipte ɩnʋ, bla mʋ ɔbɛɛ, 20“Kʋsʋ, afʋkpa kebi amʋ mʋa mʋ yin, amlɩyinki yɔ Israel ɔmátɔ. Tsufɛ aha amʋʋ bodunka ánɩ́ bɔ́mɔ kebi amʋ bawu.” 21Mʋ́ sʋ Yosef lɔkʋsʋ kpa kebi amʋ mʋa mʋ yin, beyinki yɔ Israel ɔmátɔ.
22Tamɛ brɛá bowie ɩnʋ a, olonu ánɩ́ Arkelao latsia mʋ sɩ Herode obiasʋ, ɔdɛ Yudea ɔmásʋ gyi. Mʋ́ sʋ olenya ifuá ɔbɔ́pʋ kebi amʋ ya ɩnʋ. Bulu lɛlawa mbla ha mʋ okudetɔ ɔbɛɛ, ɔpʋ mʋ ya Galilea ɔmátɔ. 23Mʋ́ sʋ bɔyɔ yetsia Nasaret wulutɔ. Ɩnɩ lɛha Bulu asʋn amʋʋ ɔlɛblɩ tsʋn mʋ ɔnɔsʋ atɔɩpʋsʋ ɔbɛɛ, “Bɛ́tɩ mʋ Nasaretyin” amʋ ɩlɛba mʋ́tɔ nɩ.
Currently Selected:
Mateo 2: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation