Mateo 17
17
Yesu Ɩwɩtsɛ
(Marko 9:2-13; Luka 9:28-36)
1Nkensie ɔma a, Yesu lɛkpa Petro mʋa Yakobo pʋ́ mʋ pio Yohane, bɔdʋ yɔ ɩbʋ kʋsʋ. 2Amʋ́ ansɩtɔ ɩnʋ a, Yesu ɩwɩ lɛtsɛ. Mʋ ansɩtɔ lɔwankɩ fɛ owi, mʋ atadɩɛ ɛ lɛdamli fututuutu. 3Ɩnʋnʋ mʋ akasɩpʋ abasa amʋ bowun ánɩ́ Mose mʋa Elia bɛlɛ ɩwɩ ɔwan, amʋ́a Yesu bʋdɛtɔɩ. 4Mʋʋ Petro lɛbla Yesu ɔbɛɛ, “Mɩ Wie, ɩbʋ alɛá abétsia nfɩ. Nɩ fótsula a, ha ada abu asa. Fʋ klɛ kʋlɛ, Mose klɛ kʋlɛ, Elia ɛ klɛ kʋlɛ.”
5Brɛá ɔdɛ asʋn anfɩ blɩ a, agyinde wankɩhɛ kʋ lobobun amʋ́sʋ. Ɩnʋ ɔmɛ kʋ lɛdalɩ tsu agyinde amʋtɔ ɔbɛɛ, “Ɔ́nɩ gyi mɩ Bi ɔdwɛpʋá olegyi mɩ ansɩ nɩ. Mlɩnu mʋ ɔmɛ.”
6Ifu lɛhɩɛ kɩta amʋ́ brɛá bonu asʋn anfɩ. Mʋ́ sʋ bɔwa ɔsa mli bun ɔsʋlʋtɔ. 7Mʋʋ Yesu lɛba bɔpʋ ɩbɩ dada amʋ́, bla amʋ́ ɔbɛɛ, “Mlɩkʋsʋ, mlɩmánya ifu.” 8Ɩnʋ bɔwa ansɩ kɩ a, bʋmɛtra wun ɔhaa dʋn Yesu nkʋlɛ.
9Brɛá bʋdɛ ɩbʋ amʋ kplɩ a, Yesu lɛda amʋ́ ɔla ɔbɛɛ, bʋmábla ɔhaa tɔá bayowun, yɔfʋn ɛkɛá Bulu ɔbɔ́kʋsʋa Nyankpʋsa-Mʋ-Bi amʋ tsu afulitɔ.
10Mʋ akasɩpʋ amʋ bɛfɩtɛ mʋ bɛɛ, “Ntogyi sʋ Mose mbla asunapʋ amʋ bɛɛ, ilehian ánɩ́ Elia obéyinki ba asa Kristo amʋ ɔbɛ́ba?”
11Ɔlɛlɛ mʋ́ ɔnɔ ɔbɛɛ, “Ɔnɔkwalɩ igyi. Elia obégyankpa ba bɛla togyitɔ yaɩ wanklaan. 12Ndɛ mlɩ bla mbɛɛ, Elia layinki ba dodoodo, tamɛ ɔhaa mɛbɩ mʋ. Bɔwa mʋ amʋmʋyɔ. Alɩ kɛn mɩ, Nyankpʋsa-Mʋ-Bi anfɩ ɛ nówun ɩwɩɔsɩn amʋ́ ɩbɩtɔ nɩ.”
13Ɩnʋ a, ɩlɔwankɩ akasɩpʋ amʋ ánɩ́ Asu Ɔbɔpʋ Yohane ɩwɩ asʋn ɔdɛblɩ.
Ɩlɔ Dɩdahɛ Ɔlɔpʋ Tsa
(Marko 9:14-29; Luka 9:37-43a)
14Brɛá beyinki kplɩ bowie ɔdɔm amʋ wa a, oyin ɔkʋ lɛba bɛda akpawunu Yesu ayabitɔ, bla mʋ ɔbɛɛ, 15“Mɩ Wie, wun mɩ bi anfɩ nwɛ, tsufɛ ɩlɔ dɩdahɛ dɛ mʋ han. Otetsia dɩda wie ntsu mʋ́a ogyatɔ. 16Nɔpʋ mʋ ba fʋ akasɩpʋ amʋ, tamɛ bʋmɛtalɩ tsa mʋ ɩlɔ.”
17Yesu lɛlɛ mʋ́ ɔnɔ ɔbɛɛ, “Ndɛmba-abiá mlɩmá hogyi, mlɩ tsiatɔ ma alɛ. Alɩ nétsia mlɩ wa yɔ ekekegyiɛkɛ nɩ? Nnya klʋn ha mlɩ yɔfʋn ɔmɛnkɛ? Mlɩkpa kebi amʋ ba mɩ!” 18Ɩnʋ ɔlɔkplʋn gya ɔŋɛ lalahɛ amʋ. Ɩlɛdalɩ kebi amʋtɔ, ɩwɩ lɔwa mʋ ɔnlɩn.
19Mʋ́ ɔma a, akasɩpʋ amʋ bɛfɩtɛ Yesu ɩtsɛtɔ bɛɛ, “Ntogyi sʋ anɩ mʋ́ anɩmɛtalɩ gya ɔŋɛ lalahɛ amʋ dalɩ kebi amʋtɔ?”
20-21Mʋʋ ɔlɛbla amʋ́ ɔbɛɛ, “Mlɩ hogyi mɔtsɔ kʋraa. Mbla mlɩ ɔnɔkwalɩ. Nɩ mlɩ hogyi lomoni fɛ takyi-akpin ibi a, tɛkɩ mlɛtalɩ bla ɩbʋ anfɩ mlɩaa ipuli. Lɛlɛ ibópuli, tɔtɔɔtɔ mɔ́ɔdʋn mlɩ bwɛ.”#17:21 Mʋ́tɔ ye 21 bʋ nwʋlʋ dada amʋ akʋtɔ: Tamɛ ɩnɩ odu mʋ́ a, nkɛtɩ mpaɩ mʋ́a ɔnɔklɩ pɛ mlɛ́talɩ pʋgya mʋ́.
Yesu Lowu Ɩwɩ Asʋn Blɩ Otse Nyɔsɩ
(Marko 9:30-32; Luka 9:43b-45)
22-23Brɛá akasɩpʋ amʋ fɛ́ɛ́ bɛba befia Galilea ɔmátɔ a, Yesu lɛbla amʋ́ ɔbɛɛ, “Bɛ́lɛ mɩ, Nyankpʋsa-Mʋ-Bi anfɩ ha adʋn bɔ́mɔ mɩ, tamɛ Bulu ɔbɔ́kʋsʋa mɩ ɛkɛ sasɩ.”
Asʋn anfɩ lɛhɩɛ han akasɩpʋ amʋ.
Bulu Ɔtswɛkpa Ofi Ɩkɔka
24Yesu mʋa mʋ akasɩpʋ bɛba Kapernaum wulutɔ. Ɩnʋ Bulu ɔtswɛkpa ofikɔ ahɔpʋ akʋ bɛba bɛfɩtɛ Petro bɛɛ, “Fʋ wie tɛka Bulu ɔtswɛkpa ofi ɩkɔ?”
25Petro lɛbla amʋ́ ɔbɛɛ, “Ɔtɛka.”
Brɛá Petro lɔyɔ woyitɔ a, Yesu legyankpa fɩtɛ mʋ ɔbɛɛ, “Simon, nkalɩ gyi fʋ agywɩɩn? Amɛndɩ tɛka dutɛ mʋ́a lampoo ha awie? Afɔɔ ntɛ wulu awie?”
26Petro lɛbla mʋ ɔbɛɛ, “Afɔɔ tɛka.”
Mʋʋ Yesu lɛbla mʋ ɔbɛɛ, “Yɛ mʋmʋ wulu awie bagyi ɩwɩ nɩ? 27Tamɛ mmedekle mbɛɛ, abɔ́kʋsʋ lɩɩ amʋ́sʋ sʋ a, tsu ɔdadʋwa afʋyɔ ɔpʋ ɔnɔ yɔtswɩ. Kɩ klɛmɛtɩ gyankpapʋá fɛ́lɛ ɔnɔtɔ. Fénya kɔba ánɩ́ ɩbɔ́fʋn anɩ abanyɔ ofikɔ amʋ ka. Lɛ mʋ́, afʋyɛka ha amʋ́.”
Currently Selected:
Mateo 17: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
