Yohane 5
5
Tsukʋlɛ Osinpʋ Ɔkʋ Ɩlɔ Tsa
1Asʋn anfɩ ɔma a, Yesu lɔdʋ yɔ Yudafɔ Bulusum nkɛ kʋ ogyikpa Yerusalem. 2Bɔpwɛ bunti wa wulu amʋ. Bokwi ibun kʋ manta bunti amʋ ɔkpa ɔnɔ kʋá bʋtɛtɩ mʋ́ Akufa Ɔtsʋnkpa. Bʋtɛtɩ ibun amʋ Betesda Hebri ɔblɩtɔ. eyi mbu anu bomli mʋ́. 3-4Alɔpʋ tsɔtsɔɔtsɔ bʋbun ibun amʋ asɩ mbu anfɩtɔ. Amʋ́tɔ akʋ bʋgyi ansibi abwiepʋ, abɔ pʋ́ tsukʋlɛ asinpʋ.#5:4 Mʋ́tɔ ye 4 bʋ nwʋlʋ dada amʋ akʋtɔ: Ɩbʋ nʋ bʋ ɩnʋ a, Bulu-ɔbɔpʋ tobowuli ntsu amʋtɔ. Ɩnɩ sʋ bʋtsie ɩnʋ bʋgyo mʋ. Tsufɛ nɩ ɔba bowuli mʋ́ a, fʋá fegyankpa wie mʋ́tɔ a, fʋtenya ɩlɔtsa. 5Oyin ɔkʋá alasin tsukʋlɛ nfi adʋasa-kwe (38) kɛkɛ da ɩnʋ. 6Brɛá Yesu lowun mʋ a, olowun ánɩ́ alalɔ, dɩ ɩnʋ wa ɔpá. Mʋ́ sʋ ɔlɛfɩtɛ mʋ ɔbɛɛ, “Fʋdekle fɛɛ, ɩwɩ ɩwa fʋ ɔnlɩn?”
7Tsukʋlɛ osinpʋ amʋ lɛlɛ mʋ́ ɔnɔ ɔbɛɛ, “Owie, nɩ bowuli ntsu amʋtɔ a, mma ɔha ánɩ́ obótsu mɩ wa mʋ́tɔ. Nótsutsua ambɔbwɛ a, ɔkʋ lagyankpa wie mʋ́tɔ dodo.”
8Yesu lɛbla mʋ ɔbɛɛ, “Kʋsʋ! Tsu fʋ ɔklan, afʋnatɩ!” 9Ɩnʋnʋʋnʋ oyin amʋ ɩwɩ lɔwa mʋ ɔnlɩn, ɔlɔkʋsʋ tsu mʋ ɔklan, wa natɩ bɩ.
Alɩ ɛkɛ amʋ igyi Yudafɔ Ɔkpʋnʋ Ɔdakɛ. 10Mʋ́ sʋ Yudafɔ ahandɛ bɛka oyin amʋʋ Yesu latsa mʋ ɩlɔ amʋ ansɩtɔ, blɩ bɛɛ, “Ndɛ igyi Ɔkpʋnʋ Ɔdakɛ. Anɩ mbla mɛha ɔkpa ánɩ́ fɔ́sʋra fʋ ɔklan.”
11Ɔlɛbla amʋ́ ɔbɛɛ, “Ɔha amʋʋ ɔlɛtsa mɩ ɩlɔ amʋ lɛbla mɩ ɔbɛɛ, ‘Tsu fʋ ɔklan, afʋnatɩ.> ”
12Mʋ́ sʋ bɛfɩtɛ mʋ bɛɛ, “Ma lɛbla fʋ ɔbɛɛ, fʋtsu fʋ ɔklan afʋnatɩ?”
13Oyin amʋ mɛbɩ ɔha ánɩ́ ɔlɛtsa mʋ ɩlɔ, tsufɛ aha bʋhɩɛ bʋtsɔ ɩnʋ, Yesu lɔfwɩ wa amʋ́tɔ.
14Ɔma a, Yesu loyowun mʋ Bulu ɔtswɛkpa ɩnʋ. Mʋʋ ɔlɛbla mʋ ɔbɛɛ, “Yɛɛ fawun ánɩ́ ɩwɩ lawa fʋ ɔnlɩn. Mátra bwɛ lakpan, mɛnɩ mʋ́á ɩdʋn ɩnɩ mɛ́ɛba fʋsʋ.”
15Oyin amʋ lɛyɛbla Yudafɔ ahandɛ amʋ ɔbɛɛ, Yesu lɛtsa mʋ ɩlɔ. 16Ɩnɩá Yesu dɛ ntobi anfɩ odu bwɛ ɔkpʋnʋ ɔdakɛ sʋ a, Yudafɔ ahandɛ amʋ bɔwa mʋ kpɛkpɛ bɩ. 17Tamɛ Yesu lɛbla amʋ́ ɔbɛɛ, “Mɩ Sɩ mɔkʋsi agyʋma yɔ. Mʋ́ sʋ mɩ ɛ mmɔkʋsi.”
18Mʋ asʋn blɩhɛ anfɩ sʋ a, Yudafɔ ahandɛ amʋ bekleá bɔ́mɔ mʋ ɔkpagyiɔkpasʋ. Tsufɛ megyi ɔkpʋnʋ ɔdakɛ mbla amʋ nkʋlɛ tʋn sʋ. Mboun ɔlɛblɩ ɔbɛɛ, mʋ sɩ gyi Bulu, ilosuna ánɩ́ mʋa Bulunyɔ bʋgyi kɛkɛ.
Bulu Tɛha Mʋ Bi Amʋ Tumi
19Yesu lɛlɛ mʋ́ ɔnɔ ɔbɛɛ, “Ɔnɔkwalɩ ndɛ mlɩ bla. Mɩ Bulu mʋ Bi anfɩ onuto mmɛ́ɛtalɩ bwɛ tɔtɔ mɩ ɩwɩsʋ. Tɔá nowun ánɩ́ mɩ Sɩ dɛbwɛ a, mʋ́ ntɔbwɛ. 20Tsufɛ mɩ Sɩ tɔdwɛ mɩ, otosuna mɩ tɔá mʋ onuto ɔdɛbwɛ fɛ́ɛ́. Iin! Ɩbɔ́wa mlɩ wanwan ánɩ́ obósuna mɩ mʋ́á ɩdʋn alɩ. 21Alɩ amʋʋ mɩ Sɩ tɔkʋsʋa aha tsu afulitɔ, ha amʋ́ nkpa amʋ a, alɩ mɩ ɛ ntɛha aha ánɩ́ ndekle nkpa nɩ. 22Mɩ Sɩ tamagyi asʋn ha ɩpɔn, tamɛ alapʋ asʋngyi fɛ́ɛ́ wa mɩ ɩbɩtɔ, 23mɛnɩ ɔhagyiɔha obóbu mɩ fɛ alɩá otobu mɩ Sɩ amʋ. Ɔha ánɩ́ ɔtamabu mɩ tamabu mɩ Sɩ amʋʋ ɔlɔpʋ mɩ sɩsɩ amʋ ɛ.
24“Ɔnɔkwalɩ ndɛ mlɩ bla mbɛɛ, ɔhagyiɔha ánɩ́ otonu mɩ asʋn, ɔtɔhɔ ɔha amʋʋ ɔlɔwa mɩ sɩsɩ amʋ gyi, bʋ nkpa ánɩ́ ɩtamata. Bulu méegyi mʋ asʋn, ha mʋ ɩpɔn, tsufɛ aladalɩ lowutɔ ba nkpatɔ dodo. 25Ɔnɔkwalɩ ndɛ mlɩ bla. Brɛ kʋ ɩba. Brɛ amʋ ɩlawuna fʋn ánɩ́ aha ánɩ́ bʋgyi fɛ aha wuhɛ#5:25 Aha ánɩ́ bawu ɔŋɛtɔ. bónu Bulu mʋ Bi amʋ ɔmɛ. Amʋ́á bonu mʋ́ bénya nkpa. 26Tsufɛ mɩ Sɩ bʋ tumi, ɔtɛha nkpa. Alɩ kɛn alaha mɩ anfɩ ngyi mʋ Bi anfɩ tumi, ɔbɛɛ nha aha nkpa nɩ. 27Alaha mɩ tumi ɔbɛɛ, ngyi aha asʋn, tsufɛ mɩgyi Nyankpʋsa-Mʋ-Bi amʋ nɩ. 28Asʋn anfɩ máwa mlɩ wanwan. Brɛ kʋ ɩba, afuli fɛ́ɛ́ bónu mɩ ɔmɛ, 29kʋsʋ. Amʋ́á bɔbwɛ yile bɛ́lakʋsʋ, nya nkpa ánɩ́ ɩtamata. Amʋ́á bɔbwɛ lalahɛ a, négyi amʋ́ asʋn, ha amʋ́ ɩpɔn.”
30“Mmɛ́ɛtalɩ bwɛ tɔtɔɔtɔ mɩ ɩwɩsʋ. Asʋn ánɩ́ nonu tsu mɩ Sɩ wa ntɔpʋgyi asʋn. Mʋ́ sʋ ntegyi asʋn ɔnɔkwalɩsʋ nɩ. Tsufɛ ntamabwɛ tɔá mɩ onuto ndekle, mboun tɔá ɔha amʋʋ ɔlɔwa mɩ sɩsɩ amʋ tekle.”
Yesu Ɩwɩ Adansɩɛ Wanklaan Agyipʋ
31Yesu lɔyɔ mʋ́sʋ blɩ ɔbɛɛ, “Nɩ mɩ onuto negyi mɩ ɩwɩ adansɩɛ a, mlɩmɔ́ɔhɔ mʋ́ ánɩ́ ɔnɔkwalɩ igyi.#5:31 Mose mbla losuna ánɩ́ aha abanyɔ ogyi adansɩɛ. 32Bulu ɛ tegyi mɩ ɩwɩ adansɩɛ. Nyin ánɩ́ mɩ ɩwɩ adansɩɛ amʋʋ odegyi amʋ igyi ɔnɔkwalɩ. 33Mlɩlawa abi sɩsɩ Yohane. Alabla mlɩ ɔnɔkwalɩ amʋ. 34Mɩ mʋ́ a, mmehian anyankpʋsa adansɩɛ. Mboun ndɛ mlɩ asʋn anfɩ bla, mɛnɩ Bulu ɔbɔ́hɔ mlɩ nkpa. 35Yohane asʋn blɩhɛ lɔbwɛ fɛ ɔkandɩɛá ɩdɛwankɩ. Mʋ́ sʋ mlɩlotsula gyi mʋ́ ɔdwɛ kpalobi. 36Mbʋ tɔá itegyi mɩ ɩwɩ adansɩɛ, ɩdʋn Yohane klɛ amʋ. Agyʋma amʋʋ mɩ Sɩ lawa ɔbɛɛ, mbwɛ mɔ mʋ́ ɔnɔ, ndɛ mʋ́ bwɛ amʋ dɛ adansɩɛ gyi ánɩ́ mʋlɔwa mɩ sɩsɩ. 37Mɩ Sɩ amʋʋ ɔlɔwa mɩ amʋ onuto lagyi mɩ ɩwɩ adansɩɛ. Mlɩmɔkʋnu mʋ ɔmɛ, mlɩmɔkʋwun mʋ ɛ kɩ. 38Mlɩmɔhɔ mʋ asʋn wa mlɩ klʋntɔ, tsufɛ mlɩmɔhɔ mɩ amʋʋ ɔlɔwa sɩsɩ amʋ gyi. 39Mlɩkɩá mlénya nkpa ánɩ́ ɩtamata tsu Bulu asʋn wanlɩnhɛ amʋtɔ. Mʋ́ sʋ mlɩ ansɩ lapɛ, mlɩdɛ mʋ́ kasɩ nɩ. Mɩ ɩwɩ adansɩɛ Bulu asʋn wanlɩnhɛ amʋ idegyi. 40Tamɛ mlɩlakina mɩ wa ba, mɛnɩ mlénya nkpa amʋ.
41“Mmededunka mbɛɛ, aha bʋkanfʋ mɩ, 42tsufɛ nyin mlɩ dodo. Nyin ánɩ́ mlɩtamadwɛ Bulu tsu mlɩ klʋntɔ. 43Naba mɩ Sɩ ɩdatɔ, mlɩmɔhɔ mɩ. Tamɛ nɩ ɔha bamba ɔba mʋ onuto ɩwɩsʋ a, mlɔ́hɔ mʋ. 44Mlɩtekleá mlɛ́kanfʋ aba, tamɛ mlɩtamabɔ mbɔdɩá Bulu ɔkʋlɛ pɛ amʋ ɔkanfʋ mlɩ. Nkalɩ ɩbɔ́bwɛ mlɔ́hɔ mɩ gyi? 45Mlɩmákɩ mlɩaa, nɛ́lɛ mlɩ ɩla mɩ Sɩ ansɩtɔ. Mose amʋʋ mlɩ ansɩ ɩdɩn mʋsʋ mlɩaa, ɔbɔ́hɔ mlɩ nkpa amʋ mboun ɔbɛ́lɛ mlɩ ɩla Bulu ansɩtɔ nɩ. 46Nɩ lɛlɛ mlɩlɔhɔ Mose asʋnsʋ gyi a, tɛkɩ mlɔ́hɔ mɩ asʋnsʋ gyi, tsufɛ mɩ ɩwɩ asʋn ɔlɔwanlɩn tswɩ. 47Tamɛ ɩnɩá mlɩmɔhɔ tɔá ɔlɔwanlɩn tswɩsʋ gyi a, nkalɩ ɩbɔ́bwɛ mlɔ́hɔ mɩ asʋn blɩhɛsʋ gyi?”
Currently Selected:
Yohane 5: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation