Yohane 20
20
Yesu Kʋsʋ Tsu Afulitɔ
(Mateo 28:1-8; Marko 16:1-8; Luka 24:1-12)
1Ndawɔtswɩtɔ ɛkɛ gyankpapʋ, igyi Kwasieda bakɛ-bakɛ, brɛá nsaɩntɔ mɔkʋtɩtɩ a, Magdalayintse Maria lɔyɔ Yesu opulakpa ɩnʋ. Olenya wie ɩnʋ alɩ olowun ánɩ́ bamina ibwi amʋ lɛ ɔbɔ amʋ ɔnɔ. 2Mʋ́ sʋ oleyinki srɩ ba ɔkasɩpʋ amʋʋ Yesu tɛhɩɛ dwɛ mʋ amʋ mʋa Simon Petro wa, bɛbla amʋ́ ɔbɛɛ, “Balɛ Yesu ɔbɔ amʋtɔ. Anɩmeyin ɔtɩnɛá bapʋ mʋ yɛwa!”
3Mʋʋ Petro mʋa mʋnyɔ bɔpʋ ɔkpa bɔyɔ opulakpa ɩnʋ. 4Amʋ́ abanyɔ amʋ fɛ́ɛ́ betsii ɔsrɩ, tamɛ ɔlɛsrɩ si Petro gyankpa yowie opulakpa ɩnʋ. 5Brɛá olobun kɩ ntsan amʋtɔ a, olowun ánɩ́ ɔhrada amʋ kpan ɩda, tamɛ omebitiwie mʋ́tɔ. 6Simon Petro lɔbɔtʋ mʋ, ɔlɔtsʋn bitiwie ntsan amʋtɔ, olowun ɔhrada amʋ da. 7Olowun ɔhrada amʋʋ bɔpʋtɔ mʋ nwun amʋ ɛ, ilokunta ɩda ɩfʋntɔ. 8Ɔkasɩpʋ amʋʋ olegyankpa wie ɩnʋ amʋ ɛ lebitiwie mʋ́tɔ, wun ɔhrada amʋ pʋ́ mʋ́ amʋʋ bɔpʋtɔ mʋ nwun amʋ alɩ olohogyi. 9Brɛ amʋtɔ a, Bulu asʋn wanlɩnhɛ amʋʋ ɩlɛblɩ ɔbɛɛ, ilehian ánɩ́ Yesu ɔbɔ́kʋsʋ tsu afulitɔ amʋ mɔkʋnya wankɩ amʋ́. 10Beyinki yɔ woyi.
Yesu Ɩwɩɔwanlɛ Suna Magdalayintse Maria
(Mateo 28:9-10; Marko 16:9-11)
11Tamɛ Maria lesi ɔlɩɩ opulakpa ɩnʋ odesu. Brɛá odesu a, olobun kɩ ɔbɔ amʋtɔ. 12Ɩnʋ olowun Bulu-abɔpʋ abanyɔá bɔwa atadɩɛ fututuutu, bʋtsie ɔtɩnɛ amʋʋ bɔpʋ Yesu fuli tswɩ amʋ. Ɔkʋlɛ tsie mʋ adɩanwun, ɔkʋlɛ tsie mʋ ayabiasɩ. 13Bɛfɩtɛ mʋ bɛɛ, “Amʋ́ yin, nkalɩ igyi sʋ fʋdesu?”
Ɔlɛlɛ mʋ́ ɔnɔ ɔbɛɛ, “Balɛ mɩ Wie natɩ. Mmeyin ɔtɩnɛá bapʋ mʋ yɔtswɩ!”
14Ɔlɛblɩ ta a, ɔlɛdamli kɩ ɔma. Ɔkɩ a, Yesu lɩɩ mʋ ɔma, tamɛ ɔmɛbɩá Yesu nɩ. 15Yesu lɛfɩtɛ mʋ ɔbɛɛ, “Amʋ́ yin, nkalɩ igyi sʋ fʋdesu? Ma fʋdedunka?”
Mʋ mʋ́ ɔkɩá ndobi amʋtɔ agyʋma ɔyɔpʋ nɩ. Mʋ́ sʋ ɔlɛbla Yesu ɔbɛɛ, “Anɩ sɩ, nɩ fʋlatsu mʋ yɔtswɩ ɔtɩnɛkʋ a, suna mɩ, anyetsu mʋ natɩ.”
16Yesu lokpoli mʋ ɔbɛɛ, “Maria.”
Ɔlɛdamli kɩ, kpoli Yesu Hebri ɔblɩtɔ ɔbɛɛ, “Rabuni!” (Mʋ́ asɩ gyi, “Osunapʋ.”)
17Yesu lɛbla mʋ ɔbɛɛ, “Mápʋ ɩbɩ da mɩ, tsufɛ mmɔkʋnya yɔ ɔsʋsʋ mɩ Sɩ wa. Mboun natɩ yɛbla mɩ apio amʋ fɛɛ, nɔyɔ mɩ Sɩá ogyi mlɩ Sɩ wa. Nɔyɔ mɩ Buluá ogyi mlɩ Bulu wa.”
18Magdalayintse Maria lɛyɛbla akasɩpʋ amʋ ɔbɛɛ, “Nawun anɩ Wie!” Ɔlɛbla amʋ́ asʋn ánɩ́ Yesu lɛbla mʋ.
Yesu Ɩwɩɔwanlɛ Suna Mʋ Akasɩpʋ
(Mateo 28:16-20; Marko 16:14-18; Luka 24:36-49)
19Kwasieda amʋ ntʋpwɛsʋ a, akasɩpʋ amʋ befia. Befin obu wa ɩwɩ, tsufɛ bʋdɛ Yudafɔ ahandɛ amʋ ifu nya. Ɩnʋ Yesu lɛbɛlɩɩ amʋ́ nsɩnɛ, ɔlɛbla amʋ́ ɔbɛɛ, “Ɩwɩ ilwii mlɩ.” 20Ɔlɛbla amʋ́ alɩ ta a, ɔlɔpʋ mʋ ɩbɩtɔ pʋ́ mʋ abɩntɔ suna amʋ́. Ansɩ legyi amʋ́, tsufɛ bawun amʋ́ Wie. 21Yesu lɛtra bla amʋ́ ɔbɛɛ, “Ɩwɩ ilwii mlɩ. Alɩ amʋʋ mɩ Sɩ lawa mɩ amʋ a, alɩ ndɛ mlɩ wa nɩ.” 22Ɩnʋ ɔlɔlʋn ɔŋɛ fʋ wʋlɩ amʋ́sʋ, bla amʋ́ ɔbɛɛ, “Mlɩhɔ Ɔŋɛ Wankɩhɛ amʋ. 23Nɩ mlesi aha lakpan kie amʋ́ a, Bulu lasikie amʋ́. Tamɛ nɩ mlɩmesikie amʋ́ a, Bulu méesikie amʋ́.”
Yesu Ɩwɩɔwanlɛ Suna Toma
24Brɛá Yesu lɛba a, amʋ́tɔ ɔkʋlɛá bʋtɛtɩ mʋ Toma, bʋtɛlatɩ mʋ Tabi má ɩnʋ. 25Mʋ́ sʋ akasɩpʋ atrahɛ amʋ bɛbla mʋ bɛɛ, “Anɩlawun anɩ Wie!”
Tamɛ Toma lɛbla amʋ́ ɔbɛɛ, “Nɩ mmɔkʋwun mʋ ɩbɩtɔ ndatobi nlɔ amʋ, kpie osrebi wa mʋ́tɔ, kpie ɩbɩ wa mʋ abɩntɔ ɔlɔ amʋtɔ a, mmóohogyi ɛkɛkɛɛkɛ.”
26Nkekwe ɔma a, akasɩpʋ amʋ bɛtra fia obu amʋtɔ. Alɩ ɛkɛ amʋ mʋ́ a, Toma bʋ amʋ́tɔ. Befin obu amʋ, tamɛ Yesu lɛbɛlɩɩ amʋ́ nsɩnɛ, bla amʋ́ ɔbɛɛ, “Ɩwɩ ilwii mlɩ.” 27Mʋʋ ɔlɛbla Toma ɔbɛɛ, “Kɩ mɩ ɩbɩtɔ, kpie osrebi wa nfɩ. Kpie fʋ ɩbɩ wa mɩ abɩntɔ. Si nwɛn gyi, afʋhogyi!”
28Toma lɛlɛ mʋ́ ɔnɔ ɔbɛɛ, “Mɩ Wie pʋ́ mɩ Bulu!”
29Yesu lɛbla mʋ ɔbɛɛ, “Alɩ amʋʋ fawun mɩ amʋ sʋ fahogyi loo? Ansɩ bégyi aha amʋʋ bʋmɔpʋ amʋ́ ansibi wun, asa bohogyi amʋ!”
Tɔá Sʋá Bɔwanlɩn Ɔwʋlʋ Anfɩ
30Yesu lɛtra bwɛ osuna tsɔtsɔɔtsɔ mʋ akasɩpʋ amʋ ansɩtɔá bʋmɔwanlɩn wa ɔwʋlʋ anfɩtɔ. 31Tamɛ bawanlɩn ɩnɩ, mɛnɩ mlóhogyiá Yesu gyi Bulu mʋ Bi Kristo amʋ. Asʋn anfɩsʋ hogyi ɔbɛ́ha mlénya nkpa ánɩ́ ɩtamata mʋ ɩdatɔ nɩ.
Currently Selected:
Yohane 20: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation