Yohane 16
16
1“Nabla mlɩ asʋn anfɩ fɛ́ɛ́, mɛnɩ mlɩmɛ́ɛdɩda hogyitɔ. 2Yudafɔ ahandɛ bégya mlɩ lɛ amʋ́ ofiakpa. Brɛ kʋ kʋraa ɩbɛ́ba ánɩ́ aha bɔ́mɔ mlɩ, susu bɛɛ Bulu agyʋma bʋdɛyɔ. 3Bɔ́pʋ ɩnɩ gyi mlɩ, tsufɛ bʋmɔkʋbɩ mɩ ntɛ mɩ Sɩ amʋ. 4Tamɛ nabla mlɩ asʋn anfɩ, mɛnɩ nɩ ɩba a, mlɛ́kaɩn ánɩ́ nɛbla mlɩ yaɩ.
Ɔŋɛ Wankɩhɛ Gyumagyihɛ
“Mmɔkɔsɩ bla mlɩ asʋn anfɩ, tsufɛ mbʋ mlɩ wa. 5Tamɛ sei ndɛ mlɩ bla, tsufɛ nɔyɔ ɔha amʋʋ ɔlɔwa mɩ sɩsɩ amʋ wa. Tamɛ mlɩtɔ ɔkʋkʋ mɛfɩtɛ mɩ ɔbɛɛ, ‘Nkʋnʋ fɔyɔ.> 6Ɩnɩá nabla mlɩ asʋn anfɩ sʋ a, awɩrɛhɔ lahɩɛ kɩta mlɩ. 7Tamɛ ndɛ mlɩ ɔnɔkwalɩ bla. Ɔkla lawa mlɩ ogya ánɩ́ nɔyɔ. Tsufɛ nɩ mmɔyɔ a, Ɔma Ɔlɩɩpʋ amʋ ɔmɛ́ɛba mlɩ wa. Tamɛ nɩ nɔyɔ a, nɔ́pʋ mʋ sɩsɩ mlɩ. 8Nɩ ɔba a, ɔbɛ́lɛ suna ɔyɩtɔ aha ánɩ́ lakpanbwɛ sʋ bafwɩ. Ɔbɛ́lɛ tɔá igyi Bulu yilebwɛ pʋ́ mʋ asʋngyi ɛ suna amʋ́. 9Bɛ́bɩá mɩsʋ máhogyi igyi lakpan. 10Bɛ́bɩ tɔá igyi Bulu yilebwɛ, tsufɛ nɔyɔ mɩ Sɩ wa, mlɩmɛ́ɛtra wun mɩ ɛkɛkɛɛkɛ. 11Bɛ́bɩ tɔá igyi Bulu asʋngyi, tsufɛ Bulu laha ɔbʋnsam, ogyi ɔyɩsʋ ogyipʋ amʋ ɩpɔn dodo.
12“Mbʋ asʋn tsɔtsɔɔtsɔá nɛ́bla mlɩ, tamɛ mlɩmɛ́ɛtalɩ nu mʋ́ fɛ́ɛ́ asɩ sei. 13Ɔŋɛ Wankɩhɛ amʋ tosuna ɔnɔkwalɩá ɩbʋ Bulutɔ. Nɩ ɔba a, ɔbɛ́lɛ asʋn ánɩ́ igyi ɔnɔkwalɩ fɛ́ɛ́ suna mlɩ. Tsufɛ megyi mʋ onuto tumitɔ ɔbɔ́tɔɩ, mboun ɔbɛ́blɩ asʋn kugyikʋá olonu. Ɔbɛ́bla mlɩ mʋ́á ɩbɛ́ba ɛ. 14Ɔŋɛ amʋ ɔbɔ́wa mɩ numnyam, tsufɛ ɔbɛ́bla mlɩ asʋn ánɩ́ ntɛblɩ. 15Togyitɔá mɩ Sɩ bʋ a, mɩ bʋ. Mʋ́ sʋ nabla mlɩ mbɛɛ, Ɔŋɛ amʋ ɔbɛ́bla mlɩ asʋn ánɩ́ ntɛblɩ nɩ.
Akasɩpʋ Amʋ Awɩrɛhɔ Pʋ́ Ansigyi
16“Ɩlasi kpalobi mlɩmɛ́ɛtra wun mɩ, tamɛ ɩmɔ́ɔwa ɔpá kʋkʋ mlɛ́lawun mɩ.”
17Akasɩpʋ amʋtɔ akʋ bɛfɩtɛ aba bɛɛ, “Ngya ntɔ asʋn nɩ? Ɔbɛɛ, Ɩlasi kpalobi, anɩmɛ́ɛtra wun mʋ, tamɛ ɩmɔ́ɔwa ɔpá kʋkʋ, abɛ́lawun mʋ. Ɔdɛblɩ ɛ ɔbɛɛ, ‘Nɔyɔ mɩ Sɩ wa.> 18‘Ɩlasi kpalobi> anfɩ asɩ mɛ? Anɩmɛdɛ asʋn anfɩ ɔdɛblɩ anfɩ asɩ nu.”
19Yesu lɛbɩá akasɩpʋ amʋ bʋdekle abʋfɩtɛ mʋ asʋn amʋtɔ. Mʋ́ sʋ ɔlɛbla amʋ́ ɔbɛɛ, “Blɩ ndɛblɩ mbɛɛ, ɩlasi kpalobi mlɩmɛ́ɛtra wun mɩ. Tamɛ ɩmɔ́ɔwa ɔpá kʋkʋ mlɛ́lawun mɩ. Ɩnɩ mlɩdɛ aba fɩtɛ nɩ? 20Ɔnɔkwalɩ ndɛ mlɩ bla. Mlósu kpisi, tamɛ ɔyɩtɔ aha mʋ́ bénya ansigyi. Mlégyi awɩrɛhɔ, tamɛ mlɩ awɩrɛhɔgyi amʋ ɩbɛ́ba bemli ansigyi. 21Nɩ ɩkwɩɩ dɛ ɔtsɩ dwiin a, ahʋmɩtɩ tɛkɩta mʋ, tsufɛ mʋ ɩwɩɔsɩn wunbɩ lafʋn. Tamɛ onya kwɩɩ ta pɛ ɔtɛtan mʋ ɩwɩɔsɩn amʋsʋ, tsufɛ ansɩ dɛ mʋ gyi ánɩ́ makwɩɩ obi wa ɔyɩtɔ. 22Alɩ kɛn igyi ha mlɩ nɩ. Ahʋmɩtɩ dɛ mlɩ sei, tamɛ nɛ́lawun mlɩ. Mʋ́ sʋ mlɛ́hɩɛ nya ansigyiá ɔhaa mɛ́ɛtalɩ ka mlɩ itin.
23“Alɩ ɛkɛ amʋ a, mlɩmɛ́ɛtra kʋlɩ mɩ tɔtɔɔtɔ. Ɔnɔkwalɩ ndɛ mlɩ bla. Togyitɔá mlɔ́kʋlɩ mɩ Sɩ mɩ ɩdatɔ a, ɔbɛ́ha mlɩ. 24Bɔtʋ ndɛ mlɩmɔkʋfɩtɛ tɔtɔɔtɔ mɩ ɩdatɔ. Mlɩfɩtɛ, ɔbɛ́ha mlɩ, mɛnɩ ɩbɛ́hɩɛ wa mlɩ ansigyi.
Yesu Ɔyɩsʋ Gyi
25“Ndɛ mlɩ asʋn anfɩ bla ayebisʋ, tamɛ brɛ kʋ bɛ́ba, mmɛ́ɛtra tɔɩ ayebisʋ. Nówuna kpa mɩ Sɩ asʋn tati suna mlɩ. 26Tsu brɛ amʋsʋ pʋya a, mlɔ́kʋlɩ mɩ Sɩ amʋ atɔ mɩ ɩdatɔ. Mmɛdɛblɩ mbɛɛ, mɩ ɔbɔ́kʋlɩ mʋ atɔ ha mlɩ. 27Tsufɛ mɩ Sɩ amʋ onuto tɔdwɛ mlɩ. Ɔtɔdwɛ mlɩ, tsufɛ mlɩtɔdwɛ mɩ, mlɩlahogyi ánɩ́ notsu mʋ wa. 28Mɩ Sɩ wa notsu ba ɔyɩtɔ. Sei a, ndeyinki tsu ɔyɩtɔ nɔyɔ mɩ Sɩ amʋ wa.”
29Ɩnʋ akasɩpʋ amʋ bɛbla mʋ bɛɛ, “Ɛhɛɛn! Sei mʋ́ a, fʋtra fʋmɛdɛtɔɩ ayebisʋ. 30Sei mʋ́ anɩlabɩá fʋyin togyitɔ. Mʋ́ sʋ mehian ánɩ́ ɔhaa ɔbɛ́tra fɩtɛ fʋ asʋansʋ. Ɩnɩ laha anɩlahogyi ánɩ́ lɛlɛ fotsu Bulu wa.”
31Yesu lɛfɩtɛ amʋ́ ɔbɛɛ, “Sei mʋ́ mlɩlahogyi? 32Brɛ kʋ ɩba. Ɩlafʋn ta, mlɛ́dasaɩn. Mlɩtɔ okugyiɔkʋ ɔbɔ́yɔ mʋ otsukpa si mɩ. Tamɛ iméesi mɩ nkʋlɛ, tsufɛ mɩ Sɩ amʋ bʋ mɩ wa. 33Nabla mlɩ asʋn anfɩ fɛ́ɛ́, mɛnɩ mlɔ́tsʋn mɩsʋ nya iwilwii. Mlówun ɩwɩɔsɩn ɔyɩ anfɩtɔ, tamɛ mlɩwa klʋn, tsufɛ nagyi ɔyɩsʋ dodo!”
Currently Selected:
Yohane 16: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation