Kolosefɔ 3
3
Nkpa Pɔpwɛ Tsia
1Mʋ́ sʋ nɩ Bulu lakʋsʋa mlɩa Kristonyɔ ba nkpa pɔpwɛtɔ a, mlɩdunka atɔá ɩbʋ ɔsʋsʋ, ɔtɩnɛ amʋʋ Kristo tsie Bulu gyɔpɩsʋ amʋ. 2Mlɩha agywɩɩn ɩnʋ atɔ ɩwɩ, megyi ɔsʋlʋsʋ klɛ. 3Tsufɛ mlɩlawu, Bulu lapʋ mlɩa Kristonyɔ nkpa onuto ŋain mʋtɔ. 4Ɛkɛá ɔbɛ́lɛ Kristo amʋʋ ogyi mlɩ nkpa onuto amʋ ɔwan suna ɔyɩ a, ɛkɛ amʋ kɛn ɔbɛ́lɛ mlɩa mʋnyɔ ɔwan mʋ numnyamtɔ nɩ.
Tsiatɔ Dada Mʋ́a Pɔpwɛ
5Mʋ́ sʋ mlɩmɔ tsiatɔ dada amʋʋ ɩbʋ mlɩtɔ amʋ. Mʋ́gyi; atsɩ mʋa ayin asʋnwa, ifintotsia, ɔwɔlɩ lalahɛ mʋ́a pɛlɩla. Ɔyɩ anfɩtɔ atɔ wanklaan ɩmápɛ mlɩ ansɩ, tsufɛ ɔnsɩpɛ igyi fɛ ɔkpɩsum. 6Ntobi anfɩ odu abwɛpʋsʋ Bulu tɛhɩɛ nya ɔblɔ nɩ. 7Mʋ́ aná mlɩtɔbwɛ brɛá mlɩgyi ɔmátɔfɔ nɩ.
8Sei gyi brɛá mlɛ́lɛ ɔblɔ, ɔblɔkpan, olu, abakpɔɩ, asʋkpan blɩ aná lɛ mlɩtɔ nɩ. 9Mlɩmáwa afunu suna aba, tsufɛ mlɩlasi mlɩ tsiatɔ dada amʋ pʋ́ mʋ́ bwɛhɛ fɛ́ɛ́. 10Mlɩlalatsu tsiatɔ pɔpwɛ. Bulu gyi mʋ́ Ɔbwɛpʋ, ɔdɛ mʋ́ bwɛ pɔpwɛ lɩan mʋ ɩwɩ brɛ anfɩ mlɩdɛ mʋ bɩ anfɩ. 11Tsiatɔ pɔpwɛ anfɩ mʋ́ a, ɩmɛfahʋn ánɩ́ Grikiyin ntɛ Yudayin fʋgyi. Fɛtɩn kete ntɛ fʋmɛtɩn, ɔkpʋtɔpʋ ntɛ okudasɩyin, ɔkpábi ntɛ ɔdɩhɩɛ fʋgyi. Kristo gyi togyitɔ, ɔbʋ amʋ́ fɛ́ɛ́tɔ.
12Mʋ́ sʋ ɩnɩá Bulu lalɛ mlɩ pʋbwɛ mʋ aha ánɩ́ amʋ́ ɩwɩ latɩn pʋ́ mʋ adwɛpʋ a, mlɩha nwewun, awɩtɔlɛwa, ɩwɩasɩba, ilwii pʋ klʋnya itsia mlɩtɔ. 13Mlɩnya ɩklʋn ha aba. Nɩ ɔkʋ mʋa mʋ ba benya a, mlɩsikie aba fɛ alɩá Kristo lesi mlɩ klɛ kie mlɩ. 14Mʋ́á ɩdʋn a, ɔdwɛ tɔbwɛ anɩ fɛ́ɛ́ ɩkʋlɛ. Ɩbwɛ mlɩ tati dɩdahɛ. 15Mlɩha Kristo iwilwii igyi mlɩ klʋnsʋ, tsufɛ mʋ́tɔ Bulu latɩ mlɩ bɔwa; mlɩa mʋ nyankpʋsa-oyi amʋ mlɩlabwɛ kʋlɛ nɩ. Mlɩda mʋ ɩpan ɛ bregyibrɛ. 16Mlɩha Kristo asʋn amʋ ɩhɩɛ bʋla mlɩ klʋntɔ, ɩha mlɩ nyansa. Mlɩpʋtɔɩ kpla aba, suna aba atɔ. Mlɩwa Israelfɔ ɩlʋ, ɔsankuosʋ ɩlʋ pʋ́ ɔŋɛtɔ ɩlʋ mlɩ klʋntɔ pʋtsu Bulu fʋa, pʋda anɩ Sɩ Bulu ɩpan. 17Mlɩ atɔ bwɛhɛ pʋ́ mlɩ asʋn blɩhɛ fɛ́ɛ́ ɩbwɛ anɩ Wie Yesu ɩdatɔ, amlɩpʋ ɩpan ha anɩ Sɩ Bulu tsʋn mʋsʋ.
Akristofɔ Tsiatɔ
18Aka, mlɩba ɩwɩasɩ ha mlɩ aklu alɩá ɩlɛkana ha aha ánɩ́ bʋgyi Kristo klɛ.
19Aklu, mlɩ ɛ mlɩdwɛ mlɩ aka. Mlɩmábwɛ amʋ́ kpounkpoun.
20Abi, mlɩbu mlɩ akwɩɩpʋ, tsufɛ mʋ́ Bulu tekle nɩ.
21Akwɩɩpʋ, mlɩmáwa mlɩ abi ɔblɔ, mɛnɩ ɩwɩ móowu amʋ́.
22Nkpábi, mlɩbu mlɩ ɔsʋlʋsʋ awie togyitɔá mlɔ́bwɛtɔ. Mlɩha amʋ́ ansɩ igyi mlɩ ɩwɩ bregyibrɛ, megyi amʋ́ ansɩtɔ wʋlɛ. Mlɩbwɛ mʋ́ tsu klʋntɔ, tsufɛ mlɩtobu anɩ Wie. 23Mlɩbwɛ togyitɔ tsu mlɩ klʋntɔ, fɛ anɩ Wie mlɩdɛ mʋ́ bwɛ ha, megyi anyankpʋsa. 24Mlɩkaɩn ánɩ́ anɩ Wie ɩbɩtɔ mlénya mlɩ ɩkɔka ánɩ́ alala yaɩ mʋ abi. Tsufɛ Kristo gyi Owieá mlɩdesum. 25Tamɛ nɩ fɔbwɛ tɔá ɩma alɛ a, ɔbɛ́ka fʋ ɩkɔ, tsufɛ ɔtamakɩ ɔhaa ansɩtɔ.
Currently Selected:
Kolosefɔ 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation