Gyumagyihɛ 28
28
Malta Wulutɔ Asʋn
1Anɩ fɛ́ɛ́ anɩlɛdɩnka ogbemgbe amʋsʋ. Ɔma asa anɩlɛbɩá ɔpʋ nsɩnɛ ɔsʋlʋ kʋá bʋtɛtɩ mʋ́ Malta nɩ. 2Nyankpʋ detswie, sʋ atsalɩ bʋ ɩnʋ. Tamɛ ɩnʋ atsiapʋ begyi anɩ bʋalɛ dʋda ogya ɔpʋ ɔnɔ ɩnʋ ha anɩ, anɩ fɛ́ɛ́ anɩletsia mʋ́ asɩ. 3Paulo lɛkpa ngyayibi ɔbɛɛ, amʋpʋwa ogya amʋtɔ. Saa ɩbɛ bʋ mʋ́tɔ. Ogya amʋ okunku sʋ ɩbɛ amʋ lɔtswɩ yi Paulo ɔbɩwɛtɔ. 4Brɛá ɩnʋ atsiapʋ amʋ bowun ánɩ́ ɩwɔ amʋ yi mʋ a, bɛbla aba bɛɛ, “Aha ɔmɔpʋ oyin anfɩ gyi. Ɩbʋ mʋ́tɔá aladalɩ ɔpʋ amʋtɔ, tamɛ anɩ ɔkpɩ amʋʋ ɔtɛbɩtɩ ɩsʋ amʋ medekleá otsia nkpa.” 5Ɩnʋ Paulo lɔwʋna ɩbɩ, ɩwɔ amʋ lɛkpa wie ogya, tamɛ tɔtɔ mɔbwɛ mʋ. 6Amʋ́ fɛ́ɛ́ besi bʋlɩɩ bʋdɛkɩ. Bʋkɩ bɛɛ Paulo obópunya, ntɛ ɔbɛ́tɩn wu. Tamɛ brɛá bɛlɩɩ wa ɔpá tɔtɔ mɛba a, bɛladamli amʋ́ agywɩɩn blɩ bɛɛ, “Ɔkpɩ ɔkʋ ɔha anfɩ gyi.”
7Ɔhandɛ ɔkʋ bʋ ɔsʋlʋ kʋ ɔpʋ nsɩnɛ ɩnʋ. Mʋ ɩda gyi Publio. Ɔlɔhɔ anɩ atuu, kpa anɩ ya mʋ woyitɔ, anɩletsia mʋ wa nkɛnsa kɛkɛ. 8Alɩ brɛ amʋtɔ a, owisʋ lakɩta ɔhandɛ amʋ mʋ sɩ, mʋ ɩwɩtɔ latu; ɔda. Paulo lɛyɛkɩ mʋ, ɔlɔpʋ ɩbɩ dɩnka mʋsʋ bɔ mpaɩ ha mʋ, ɩwɩ lɔwa mʋ ɔnlɩn. 9Mʋ́ ɔma a, bɔpʋ alɔpʋá bʋbʋ ɔsʋlʋ amʋsʋ fɛ́ɛ́ ba, Paulo lɛtsa amʋ́ ɩlɔ. 10Anɩletsia ɩnʋ tsra asa, ɩnʋfɔ amʋ bɔwa anɩ numnyam, kie anɩ atɔ tsɔtsɔɔtsɔ. Brɛá anɩdɛnatɩ a, bɔpʋ atɔá ibéhian anɩ ɔkpatɔ fɛ́ɛ́ si anɩ ɔkpa.
Roma Wulutɔ Yɔ
11Anɩlɔyɔ ɔpʋ ɔnɔ yotsu ntsusʋ-yibi kʋá ɩlatsia ɩnʋ nyankpʋtswiebɩ amʋ fɛ́ɛ́. Itsu Aleksandria wulutɔ. Besre atabi akʋá bʋgyi ɩkpɩ yi ntsusʋ-yibi amʋ ansɩtɔ. 12Anɩlɛyɛlɩɩ ɔpʋ nsɩnɛ ɔsʋlʋ kʋ otsubunɔ. Bʋtɛtɩ mʋ́ Sirakus, anɩletsia ɩnʋ nkɛnsa. 13Tsu ɩnʋ a, anɩlobomli tsʋn bowie wulu yile kʋá bʋtɛtɩ mʋ́ Regiosʋ. Mʋ́ ɔyɩkɛhɛ a, afu kʋ lɔwa tsʋn bɩ tsu ayasɩ fʋn. Nkenyɔ ɔma a, anɩloyowie otsubunɔ kʋá bʋtɛtɩ mʋ́ Puteoli. 14Anɩlefia ahogyipʋ akʋ ɩnʋ. Bokokoli anɩ bɛɛ, atsia amʋ́ wa nkensienɔ. Anɩlɔkʋsʋ tsu ɩnʋ a, anɩlɔyɔ Roma wulutɔ. 15Apioá bʋbʋ Roma wulutɔ bonuá aba. Mʋ́ sʋ amʋ́tɔ akʋ bɛba ibia ogyikpa, bʋtɛtɩ ɩnʋ Apia. Akʋ ɛ bɛba ɔtɩnɛkʋá bʋtɛtɩ ɩnʋ Afɔɔ Ɔswɩɩkpa Asa, ɩbʋ ɔkpatɔ befia anɩ. Brɛá Paulo lowun amʋ́ a, mʋ ansɩ legyi, ɔlɛda Bulu ɩpan.
Bulu Asʋn Ɔkanda Roma Wulutɔ
16Brɛá anɩloyowie Roma wulutɔ a, Roma aban lɛha Paulo ɔkpa ánɩ́ ɔbɛ́talɩ yetsia ɔtɩnɛá odekle, tamɛ ɩsa ɔkɔpʋ ɔkʋ obógyo mʋ ɩwɩ bregyibrɛ.
17Ɛkɛ sasɩ a, Paulo lɛtɩ Yudafɔ ahandɛá bʋbʋ ɩnʋ fɛ́ɛ́ fia. Mʋʋ ɔlɛbla amʋ́ ɔbɛɛ, “Mɩ apio, ɩbʋ mʋ́tɔá mmɔpʋ lalahɛ kʋkʋʋkʋ gyi mɩ ɔmátɔfɔ, mmeyinta anɩ anain amandɩɛ kʋkʋ ɛ. Tamɛ anɩ ahandɛá bʋbʋ Yerusalem bɛkɩta mɩ ya Romafɔ. 18Bɔyɔ mɩ asʋntɔ a, tɛkɩ bekleá bési mɩ, tsufɛ bomowun tsitsa kʋkʋ mɩ ɩwɩ asa bɛɛ bʋmɔ mɩ. 19Tamɛ Yudafɔ amʋ bʋmotsula ánɩ́ bʋsi mɩ. Amʋ́ bwɛhɛ sʋ nɔkʋlɩ ɔkpa mbɛɛ, Roma Owie Dɛhɛn onuto ogyi mɩ asʋn. Megyi bɛɛ mbʋ mɩ ɔmá ɩwɩ asʋansʋ. 20Mʋ́ sʋ natɩ mlɩ fia nɩ. Tsufɛ ɔha amʋʋ Israelfɔ bʋdɛ mʋ ɔkpa kɩ amʋ sʋ nda ɩkan anfɩtɔ.”
21Amʋ́ ɛ bɛbla Paulo bɛɛ, “Anɩmɔkʋhɔ ɔwʋlʋ kʋkʋ tsu Yudea ɔmátɔ tsu fʋ ɩwɩ. Anɩ apio Yudafɔ amʋtɔ ɔkʋkʋ ɛ mɔkʋtsu ɩnʋ bɛbla anɩ asʋn lalahɛ kʋkʋ tsu fʋ ɩwɩ. 22Tamɛ ha anɩ abɩ fʋ agywɩɩn. Tsufɛ anɩyin ánɩ́ aha bʋtɛblɩ asʋn lalahɛ tsu Bulusum ɔpasua anfɩ fʋbʋ mʋ́tɔ anfɩ ɩwɩ ɔtɩnɛgyiɔtɩnɛ.”
23Mʋ́ sʋ mʋa Yudafɔ amʋ bɛhɩɛ ɛkɛá béfia. Ɛkɛ amʋ lɔfʋn a, Yudafɔ tsɔtsɔɔtsɔ bɛba befia Paulo woyi ɩnʋ. Paulo lɔtɔɩ kpla amʋ́. Ɔlɔpʋ Mose Mbla pʋ́ Bulu ɔnɔsʋ atɔɩpʋ amʋ asʋn wanlɩnhɛ lɛ Bulu iwiegyi amʋ asʋntɔ suna amʋ́ tsu nyankɩ pɔn owi. Ɔlɔbɔ mbɔdɩá ɔbɛ́damli amʋ́ abʋhɔ Yesu Kristo ɩwɩ asʋn amʋsʋ gyi. 24Amʋ́tɔ akʋ bohogyi, tamɛ akʋ bʋmohogyi. 25Amʋ́ wʋlɛwʋlɛ amʋ ɔnɔ mɔbwɛ kʋlɛ, bɔwa asʋn amʋ prɩ bɩ. Tamɛ Paulo lɛtra bla amʋ́ asʋn kuakʋlɛ asa bɛdasaɩn. Ɔlɛbla amʋ́ ɔbɛɛ, “Ɔŋɛ Wankɩhɛ lɛbla mlɩ anain ɔnɔkwalɩ amʋ tsʋn Bulu ɔnɔsʋ ɔtɔɩpʋ Yesaiasʋ. Ɔbɛɛ,
26‘Yɔ aha anfɩ wa afʋyɛbla amʋ́ fɛ́ɛ́,
Bónu lanu, tamɛ bʋmóonu mʋ́ asɩ.
Bɛ́kɩ lakɩ, tamɛ bʋmɛ́ɛbɩ mʋ́.
27Tsufɛ klʋntɔ bʋ amʋ́ odwin.
Batila asʋ, bun ansibi ɛ.
Nɩ megyi alɩ a, tɛkɩ bówun atɔ
bónu asʋn,
amʋ́ agywɩɩn bóbwii.
Bɛ́damli ba mɩ wa,
nɛ́tsa amʋ́ ɩlɔ.> ”
28-29Paulo lɔmɔ mʋ asʋn ɔnɔ ɔbɛɛ, “Mʋ́ sʋ ndekleá mlɩbɩ ánɩ́ Bulu nkpahɔ asʋn amʋ lawie aha ánɩ́ bʋmegyi Yudafɔ ɛ wa dodo. Amʋ́ mʋ́ bɔ́hɔ asʋn amʋ.”#28:29 Mʋ́tɔ ye 29 bʋ nwʋlʋ dada amʋ akʋtɔ: Brɛá Paulo lɛblɩ asʋn anfɩ ta a, Yudafɔ amʋ bɔkʋsʋ natɩ, amʋ́ wʋlɛwʋlɛ bʋna bʋdɛ asʋn amʋ nwɛn gyi. 30Paulo letsia ɩnʋ nfinyɔ kɛkɛ. Oletsia mʋ onuto obu haɩhɛtɔ. Oletsia hɔ afɔɔá bɛba bɛsɩna mʋ fɛ́ɛ́. 31Ɔlɔwa klʋn da Bulu iwiegyi amʋ ɩwɩ asʋn ɔkan, olosuna anɩ Wie Yesu Kristo ɩwɩ asʋn ɛ aha fɛ́ɛ́ ansɩtɔ. Ɔhaa metin mʋ ɔkpa.
Currently Selected:
Gyumagyihɛ 28: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation