Gyumagyihɛ 2
2
Ɔŋɛ Wankɩhɛ Ɩbatɔ
1 Pentekoste Ɛkɛ, igyi Israelfɔ atɔ pɔpwɛ ɔnɔ ɔdakɛ amʋ lɔfʋn a, ahogyipʋ amʋ fɛ́ɛ́ bɛba befia amʋ́ ofiakpa. 2Ɔtsawʋlɛ pɛ a, olu kʋá igyi fɛ afu kpɔnkpɔntɩ lotsu ɔsʋsʋ bɔbʋla woyi amʋʋ bʋbʋ mʋ́tɔ amʋ. 3Ɩnʋ bowun tɔkʋá igyi fɛ ogya plɛnplɛn, ɩlɛlɩan ɔdandʋ. Ɩlɛdasaɩn dɩnka amʋ́tɔ okugyiɔkʋsʋ. 4Ɔŋɛ Wankɩhɛ lɔbʋla okugyiɔkʋtɔ, ɩlɛha okugyiɔkʋ lefi asɩ ɔdɛ ɔblɩ bamba blɩ.
5Brɛ amʋtɔ a, Yudafɔá bʋtenya Bulu ifu, bʋbʋ ndɩtɔ fɛ́ɛ́ baba bʋtsie Yerusalem. 6Brɛá ɔdɔm anfɩ bonu okitikiti amʋ a, bɛsrɩ befia ɩnʋ. Amʋ́tɔ okugyiɔkʋ lonu mʋ wulutɔ ɔblɩ. Mʋ́ sʋ ɔnɔ lobwie amʋ́. 7Ɩlɔwa amʋ́ ifu, wa amʋ́ wanwan. Mʋ́ sʋ bɛfɩtɛ bɛɛ, “Aha anfɩ bʋdɛtɔɩ a, megyi Galileafɔ sɔɔn bʋgyi? 8Mʋ́ nkalɩ ɩlɔbwɛ asa anɩdenuá bʋdɛ anɩtɔ okugyiɔkʋ wulutɔ ɔblɩ blɩ? 9Anɩtɔ akʋ atsu Partia, Media, Elam, Mesopotamia, Yudea, Kapadokia, Ponto, Asia, 10Frigia, Pamfilia, Egyipte ɔmátɔ pʋ́ Libia awulu ánɩ́ ɩbʋ manta Kirene wulutɔ. Akʋ ɛ botsu Roma wulutɔ, 11bʋgyi Yudafɔ pʋ́ amʋ́á bʋmegyi Yudafɔ bawie Yudafɔ Bulusumtɔ aná fɛ́ɛ́ bʋbʋ anɩtɔ. Kretafɔ pʋ́ Arabiafɔ ɛ bʋbʋ anɩtɔ. Tamɛ anɩdenuá bʋdɛ Bulu atɔ kpɔnkpɔntɩá alabwɛ blɩ anɩtɔ okugyiɔkʋ ɔblɩtɔ.” 12Alɩ amʋʋ asʋn amʋ ilobwie amʋ́ ɔnɔ amʋ sʋ bɔbwɛ yɔɔ, si bʋdɛ amʋ́ aba fɩtɛ bɛɛ, “Ngya amansʋ ɛ nɩ?”
13Tamɛ amʋ́tɔ akʋ bɔbwɛ ahogyipʋ amʋ ahinla bɛɛ, “Nta banun bʋ.”
Petro Asʋntɔlɛ Suna Aha Amʋ
14Ɩnʋ Petro mʋa mʋ aba duɔkʋn amʋ bɔkʋsʋ lɩɩ. Mʋʋ Petro lotsu ɔmɛ fʋa bla ɔdɔm amʋ ɔbɛɛ, “Apio aba Yudafɔ pʋ́ mlɩ fɛ́ɛ́á mlɩbʋ Yerusalem, mlɩhɩɛ yaa asʋ, anlɛ asʋntɔ suna mlɩ. 15Mlɩmákɩ mlɩaa aha anfɩ babʋ, tsufɛ ɔyɩ mɔkʋkɛ. Brɛá dokweba lada nɩ. 16Mboun asʋn anfɩ ɩlaba ndɛ anfɩ Bulu ɔnɔsʋ ɔtɔɩpʋ Yoel lɛblɩ yaɩ nɩ. Ɔbɛɛ,
17‘Bulu ɔbɛɛ, “Nkɛ trahɛ amʋtɔ a,
nɔ́pʋ mɩ Ɔŋɛ wa anyankpʋsa fɛ́ɛ́tɔ.
Mlɩ abi yinhɛ pʋ́ mlɩ abi tsɩhɛ bɛ́blɩ asʋn ánɩ́ nɔ́pʋwa amʋ́ ɔnɔ.
Mlɩ nyasubi bówun atɔ.
Mlɩ ayin dɛhɛn bókun nkude.
18Nkɛ amʋtɔ a, nɔ́pʋ mɩ Ɔŋɛ wa mɩ asumpʋ
atsɩ mʋ́a ayin fɛ́ɛ́tɔ.
Mʋ́ sʋ bɛblɩ asʋn ánɩ́ nɔ́pʋwa amʋ́ ɔnɔ.
19Nɔ́bwɛ ofula nwʋlʋtasʋ,
bwɛ osuna ɔsʋlʋsʋ.
Ogya, obugya pʋ́ ogyasi tuun bɛ́ba ɔyɩtɔ.
20Owi ɔbɛ́ta ɔpa.
Ɔtsra ɛ ɔbɛ́pɛ kɔɔ fɛ obugya,
asa anɩ Wie numnyam ɛkɛ kpɔnkpɔntɩ amʋ ɩbɔ́fʋn.
21Ɩbɛ́ba ánɩ́ ɔhagyiɔha ánɩ́ okpoli anɩ Wie a, ɔbɛ́ha mʋ obénya nkpa.” > ”
22Petro lɔyɔ mʋ́sʋ ɔbɛɛ, “Mɩ apio Israelfɔ, mlɩyaa asʋ amlɩnu asʋn anfɩ. Bulu lɔbwɛ ofula mʋ́a atɔ kpɔnkpɔntɩ pʋ́ osuna tsɔtsɔɔtsɔ tsʋn Yesu Nasaretyin amʋsʋ, pʋsuna ánɩ́ mʋlɔwa mʋ. Mlɩ fɛ́ɛ́ mlɩlowun mʋ́, tsufɛ mlɩ ansɩtɔ ɩnɩ fɛ́ɛ́ lɛba. 23Igyi tɔá Bulu yin yaɩ dodo, igyi mʋ apɛá bɛ́lɛ Yesu ha mlɩ. Mlɩlɛha aha ánɩ́ bʋtamagyi mblasʋ bɛda mʋ manta oyikpalihɛsʋ, mɔ mʋ. 24Tamɛ Bulu lɛlɛ mʋ lowu sɩnsɩɩnsɩntɔ, kʋsʋa mʋ tsu afulitɔ. Tsufɛ lowu mɛ́ɛtalɩ gyi mʋsʋ, osin afulitɔ. 25Ɩnɩ sʋ Owie Dawid lɛblɩ mʋ ɩwɩ asʋn ɔbɛɛ,
‘Bregyibrɛ a, ntowun anɩ Wie mɩ ansɩsʋ.
Tsufɛ ɔlɩɩ mɩ gyɔpɩsʋ, sʋ tɔtɔ mɔ́ɔwa mɩ ifu.
26Mʋ́ sʋ ansɩ tegyi mɩ,
ntɔtɔɩ ansigyisʋ.
Nyankpʋsa ngyi. Lowu da gyo mɩ,
tamɛ ndɛ Bulu ɔkpa kɩ.
27Tsufɛ fʋméesi mɩ ɔkla wa afulitɔ.
Fʋmɛ́ɛha mɩ fʋ osumpʋ wankɩhɛ mmɔ́ɔplɔ.
28Fʋlosuna mɩ ɔkpa ánɩ́ ntsʋn mʋ́sʋ, mɩ anya nkpa ánɩ́ ɩtamata.
Nɩ fʋbʋ mɩ wa a, ansɩ bégyi mɩ ekekegyiɛkɛ.> ”
29Petro lɛtra bla amʋ́ ɔbɛɛ, “Mɩ apio Israelfɔ, mbʋa hɩɛ bla mlɩ amlɩnu. Anɩ nain Owie Dawid lowu, bopula mʋ. Bɔtʋ ɔwʋlʋ anfɩ wanlɩnbɩ a, mʋ ntsan da anɩ wa nfɩ. 30Bulu ɔnɔsʋ ɔtɔɩpʋ ogyi, oyin ánɩ́ ntam ánɩ́ Bulu lɛka ha mʋ ɩbɛ́ba mʋ́tɔ. Bulu lɛka ntam ha mʋ ɔbɛɛ, mɛ́ha mʋ natɩna ɔkʋ obétsia mʋ obiasʋ ɛkɛ kʋ. 31Ɩnɩá anɩ nain Owie Dawid lowun mʋ́ yaɩ sʋ a, ɔlɔtɔɩ tsu Kristo, (ɔha amʋʋ Bulu lada mʋ ofuli amʋ) kʋsʋ tsu afulitɔ ɩwɩ ɔbɛɛ,
‘Bulu méesi mʋ wa afulitɔ.
Mʋ́ sʋ mʋ ɔyʋlʋ mɔ́ɔplɔ.> ”
32Petro lɔyɔ mʋ́sʋ ɔbɛɛ, “Yesu gyi ɔha ánɩ́ Bulu lɔkʋsʋa tsu afulitɔ, anɩ fɛ́ɛ́ anɩgyi mʋ́ adansɩfɔ. 33Bulu lotsu Yesu ya ɔsʋsʋ, ha mʋ otsiakpa yile mʋ gyɔpɩsʋ. Anɩ Sɩ Bulu lɔpʋ Ɔŋɛ Wankɩhɛá ɔlɛhɩɛ yaɩ ɔbɛɛ, mɔ́pʋha mʋ ahogyipʋ ha mʋ. Ɔŋɛ amʋ Yesu lapʋha anɩ a. Mʋ́ gyumagyihɛ mlɩdewun, mlɩdenu a. 34Megyi Owie Dawid Bulu lotsu ya ɔsʋsʋ, tamɛ mʋlɛblɩ yaɩ ɔbɛɛ,
‘Anɩ Wie Bulu lɛbla mɩ Wie ɔbɛɛ,
Tsia mɩ gyɔpɩsʋ,
35yɔfʋn brɛá nɔ́pʋ fʋ alupʋ bwɛ fʋ ayabi oyikpa.> ”
36“Mʋ́ sʋ mlɩ Israelfɔ fɛ́ɛ́ mlɩnu. Ɩbʋ mʋ́tɔá mlɩlɛda Yesu manta oyikpalihɛsʋ. Tamɛ mlɩhɩɛ bɩá Bulu lada mʋ ofuli, bwɛ mʋ Kristo pʋ́ anɩ Wie.”
37Brɛá Israelfɔ amʋ bonu asʋn anfɩ a, ɩlɛhɩɛ han amʋ́. Mʋ́ sʋ bɛfɩtɛ Petro mʋa mʋ aba sumbi ayɔpʋ atrahɛ amʋ bɛɛ, “Apio, ntɔ abwɛ?”
38Mʋʋ Petro lɛlɛ mʋ́ ɔnɔ ɔbɛɛ, “Mlɩtɔ okugyiɔkʋ ɔdamli klʋntɔ, abɔ mlɩ asu Yesu Kristo ɩdatɔ, mɛnɩ Bulu obési mlɩ lakpan kie mlɩ, ha mlɩ Ɔŋɛ Wankɩhɛ amʋ. 39Tsufɛ mlɩa mlɩ abi-aná pʋ́ aha ánɩ́ bʋbʋ tsutsuutsuá Bulu ɔbɛ́tɩ fɛ́ɛ́ ɔlɛhɩɛ Ɔŋɛ Wankɩhɛ anfɩ ha.”
40Petro lɛblɩ asʋn tsɔtsɔɔtsɔ, pʋtɔɩ kpla amʋ́ ɔbɛɛ, “Mlɩlɛ mlɩ ɩwɩ tsu ndɛmba-abi lalahɛ anfɩtɔ.” 41Amʋ́tɔ aha tsɔtsɔɔtsɔ bɔhɔ Petro asʋn amʋ. Mʋ́ sʋ bɔbɔ amʋ́ asu. Ɛkɛ amʋ a, aha bɔ́bwɛ fɛ mpɩm-sa (3,000) bɛtsɩa ahogyipʋ amʋtɔ. 42Ahogyipʋ amʋ bɛlɛ ansɩ kɩta sumbi ayɔpʋ amʋ atosunahɛ, amʋ́ ɩkʋlɛbwɛ togyitɔtɔ, ɔpasua amʋtɔ atogyihɛtɔ-ye pʋ́ mpaɩbɔtɔ.
Ahogyipʋ Amʋ Tsiatɔ
43Sumbi ayɔpʋ amʋ bɔbwɛ ofula pʋ́ osuna tsɔtsɔɔtsɔ, ɔnɔ lobwie ɔhagyiɔha. 44Ahogyipʋ amʋ fɛ́ɛ́ bɔbwɛ togyitɔ kʋlɛ. Betsia ye amʋ́ atɔ ha aba. 45Betsia fɛ amʋ́ atɔ, ye kɔba ánɩ́ benyatɔ ha amʋ́tɔ okugyiɔkʋá ɔma. 46Amʋ́ fɛ́ɛ́ betsia fia Bulu ɔtswɛkpa wunsɩnɛsʋ ekekegyiɛkɛ. Bɔpʋ amʋ́ klʋntɔ-ɔdwɛ tsia gyi atɔ ɔpasuatɔ amʋ́ aba woyitɔ. 47Betsia kanfʋ Bulu, aha fɛ́ɛ́ bekle amʋ́ asʋn, anɩ Wie Bulu letsia pʋ aha ánɩ́ ɔdɛlɛ bɛtsɩa amʋ́tɔ ekekegyiɛkɛ.
Currently Selected:
Gyumagyihɛ 2: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
