2 Timoteo 4
4
1Nlɩɩ Bulu mʋa Kristo Yesuá ɔbɛ́ba begyi akɩankpapʋ pʋ́ awupʋ asʋn. Ɔbɛ́ba begyi iwie ansɩtɔ, ndɛ fʋ ɔla da mbɛɛ, 2fʋda Bulu asʋn amʋ ɔkan. Nɩ fʋbʋ ɔkpa o, fʋma ɔkpa o, mási mʋ́ blɩ. Nya klʋn afʋtswii amʋ́. Kina asʋn ha amʋ́. Wa amʋ́ atɛtɔ-ɔnlɩn, afʋsuna amʋ́ atosunahɛ wanklaan amʋ. 3Tsufɛ brɛ kʋ ɩba, aha bʋmɛ́ɛtra yaa asʋ nu atosunahɛ wanklaan amʋ. Bɔ́bwɛ tɔá iletsia amʋ́, natɩ dunka atɔ asunapʋ oduá bósuna amʋ́ tɔá bʋdekleá bónu. 4Békina ɔnɔkwalɩ asʋn amʋ yobuo ɔtɛ. 5Tamɛ fʋ mʋ́ a, ha fʋ ansɩ ɩba asɩ ɔkpagyiɔkpasʋ. Tomi afʋwun ɩwɩɔsɩn. Blɩ asʋn wanklaan amʋ wanklaan, afʋbwɛ agyʋma amʋʋ Bulu lɛha fʋ amʋ mɔ ɔnɔ.
6Mɩ mʋ́ a, brɛ lafʋn ánɩ́ bɔ́pʋ mɩ obugya wʋlɩ asɩ fɛ nta ha Bulu fɛ afɔdɩɛ-abɔtɔ. Mɩ lowu lafʋn. 7Nakɔ ɩkɔ wanklaan amʋ ta. Natsii ɔsrɩ amʋ ɛ ta. Nakɩta hogyi amʋtɔ kinkiinkin. 8Sei a, tɔá ɩda gyo mɩ gyi ɩsʋgyi atokiehɛá Bulu tɔpʋha aha ánɩ́ babwɛ yile. Anɩ Wie Yesu, ogyi asʋn ogyipʋ Ɔnɔkwalɩpʋ amʋ ɔbɔ́pʋha mɩ ɛkɛ yile amʋʋ obéyinki ba amʋ. Tamɛ megyi mɩ nkʋlɛ ɔbɔ́bwɛ ɩnɩ ha. Ɔbɛ́ha aha amʋʋ bʋdɛ mʋ yinki ba ɔkpa kɩ amʋ ɛ fɛ́ɛ́.
Paulo Onuto Ɩwɩ Asʋn
9Bɔ mbɔdɩ afʋkɔsɩ ba mɩ wa, 10tsufɛ ɔyɩtɔ atɔ dɛ Dema ansigyi wa. Mʋ́ sʋ alayinki mɩ ɔma, natɩ ɔyɔ Tesalonika wulutɔ. Kreske ɔyɔ Galatia, Tito ɛ ɔyɔ Dalmatia. 11Luka nkʋlɛ bʋ mɩ wa nfɩ. Mʋ́ sʋ nɩ fɛba a, kpa Marko buo ɩwɩ, tsufɛ ɔtɛtsa mɩ agyʋma yɔ. 12Nawa Tihiko sɩsɩ Efeso. 13Tsu mɩ liga pʋ́ mɩ nwʋlʋ amʋʋ nesi tswɩ Karpo wa Troa wulutɔ amʋ ba mɩ. Mátan nwʋlʋ amʋʋ ɩdɩn nwʋlʋ-kpakpasʋ amʋ ɛsʋ.
14Kɔbrɩ atɔ ɔbwɛpʋ Aleksandro lɔpʋ lalahɛ kʋ gyi mɩ. Ɩlɛhan mɩ wanklaan. Anɩ Wie ɔbɛ́ka mʋ ɩkɔ. 15Kɩ fʋ ɩwɩ wanklaan mʋsʋ, tsufɛ ɔlɔkʋsʋ lɩɩ anɩ asʋn blɩhɛ fɛ́ɛ́sʋ.
16Brɛá ahandɛ bɛha bɛɛ, nlɛ mɩ ɔnɔ a, ɔhaa mɛlɩɩ mɩ ɔma. Amʋ́ fɛ́ɛ́ bɛsrɩ si mɩ. Bulu osikie amʋ́. 17Tamɛ anɩ Wie lɛlɩɩ mɩ ɔma, ɔlɔwa mɩ ɔwʋnlɩn. Mʋ́ sʋ nɛtalɩ bla amʋ́ asʋn ánɩ́ ndɛ fɛ́ɛ́, mɛnɩ aha ánɩ́ bʋmegyi Yudafɔ fɛ́ɛ́ bónu. Alɩ Bulu lɔpʋlɛ mɩ tsu lowutɔ nɩ. 18Anɩ Wie ɔbɛ́lɛ mɩ tsu lalahɛ kugyikʋtɔ. Ɔbɛ́kpa mɩ pʋtɔɔ alɩɩ yowie mʋ ɔsʋsʋ iwiegyi amʋtɔ. Numnyam ɩbwɛ mʋ klɛ brɛ fɛ́ɛ́tɔ. Amen.
Ɩkla
19Nɛha Priska mʋa mʋ klu Akwila pʋ́ Onesiforo woyitɔ aha fɛ́ɛ́ itsia. 20Erasto lesin Korinto wulutɔ, Trofimo ɛ dɛlɔ. Mʋ́ sʋ nesi mʋ yaɩ Mileto wulutɔ. 21Bɔ mbɔdɩ afʋba asa atsalɩbɩ ɩfʋn. Eyubulo mʋa Pude, Lino mʋa Klaudia pʋ́ apio amʋ fɛ́ɛ́ bɛha fʋ itsia.
22Anɩ Wie ɔkpa mlɩ, ogyi mlɩ bʋalɛ.
Currently Selected:
2 Timoteo 4: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation