2 Tesalonikafɔ 3
3
Mpaɩbɔ
1Ɩtrahɛ-trahɛ a, apio, mlɩbɔ mpaɩ ha anɩ, anɩ Wie asʋn amʋ ɩkɔsɩ klɛɩ. Aha abʋpʋ obú hɔ mʋ́ fɛ alɩ amʋʋ mlɩ ɛ mlɩlɔhɔ mʋ́ amʋ. 2Mlɩbɔ mpaɩ, Bulu ɔlɛ anɩ tsu awuntɔlɩnpʋ pʋ́ aha lalahɛ ɩbɩtɔ. Tsufɛ megyi aha fɛ́ɛ́ lɔhɔ anɩ Wie gyi.
3Tamɛ anɩ Wie bʋ ɔnɔkwalɩ. Ɔbɔ́wa mlɩ ɔwʋnlɩn, hɔ mlɩ lɛ Lalahɛ Ɔbwɛpʋ amʋ ɩbɩtɔ. 4Anɩ Wie laha anɩlahogyiá mlɩdɛ ntobi amʋʋ anɩlosuna mlɩ amʋ fɛ́ɛ́ bwɛ, mlɩméesi bwɛ ɛ.
5Ɔkpa mlɩ, amlɩnu ɔdwɛá Bulu bʋ asɩ yɔ ɔtɔtɔɔtɔ; ɔha amlɩtomi fɛ Kristo.
Tsiatɔ Wanklaan
6Apio, anɩdɛ mlɩ ɔla da anɩ Wie Yesu Kristo ɩdatɔ anɩaa, mlɩmápʋ Akristofɔ amʋʋ bʋna bʋdɛtsʋn, bʋtamakle agyʋma, bʋmɛdɛ atosunahɛ amʋʋ anɩlosuna mlɩ amʋsʋ gyi wa mba. 7Mlɩ onuto mlɩyin ánɩ́ ilehian ánɩ́ mlétsia anɩ atsiabi. Tsufɛ anɩmɔwa ɔwʋlɩyɔ, natɩ tsʋntsʋn brɛá anɩbʋ mlɩ wa. 8Anɩmegyi atɔ ɔhaa wa, kina mʋ́ ɩkɔ ka. Mboun anɩlɔyɔ agyʋma ɔpa mʋ́a onye kinkiinkin, mɛnɩ anɩméesi ipian tswɩ mlɩtɔ ɔkʋkʋʋkʋsʋ. 9Megyi bɛɛ, anɩmá ɔkpa bla mlɩ anɩaa, mlɩkɩ anɩsʋ, sʋ anɩlɔbwɛ mʋ́ alɩ. Mboun anɩlɔbwɛ mʋ́ suna mlɩ, mɛnɩ mlɩ ɛ mlɔ́bwɛ mʋ́ odu. 10Brɛá anɩbʋ mlɩ wa kʋraa a, anɩlɔwa mbla ha mlɩ anɩaa, “Ɔha ánɩ́ ɔmɔyɔ agyʋma mágyi atɔ.”
11Anɩlanuá mlɩtɔ akʋ bʋtsie kpaalɩ, bʋmɛdɛ agyʋma kʋkʋʋkʋ yɔ. Okengye bʋna bʋdɛwa tsʋn. 12Anɩdɛ amʋ́ ɔla da anɩ Wie Yesu Kristo ɩdatɔ anɩaa, bʋsi natɩ tsʋn, abʋyɔ agyʋma nya amʋ́ atogyihɛ.
13Tamɛ apio, mlɩ mʋ́ a, yilebwɛ ɩmáta mlɩ ɔŋɛ. 14Nɩ ɔkʋ megyi asʋn anfɩ anɩlawanlɩn sɩsɩ mlɩ anfɩsʋ a, mlɩkɩ mʋ wanklaan. Mlɩa mʋnyɔ mlɩmágyi mba, mɛnɩ pɛlɩ bɛ́kɩta mʋ. 15Tamɛ mlɩmálu mʋ, mboun mlɩtɔɩ kpla mʋ fɛ mlɩ pio.
Ɩkla
16Iwilwii Owie amʋ onuto ɔha mlɩ iwilwii brɛ fɛ́ɛ́tɔ ɔkpagyiɔkpasʋ. Anɩ Wie otsia mlɩ fɛ́ɛ́ wa.
17Mɩ Paulo onuto lapʋ mɩ ɩbɩ wanlɩn ɩnɩ. Mɩ ɩda anfɩ ntɔwanlɩn wa mɩ nwʋlʋ fɛ́ɛ́ asɩ, pʋsuna ánɩ́ itsu mɩ onuto wa nɩ.
18Anɩ Wie Yesu Kristo ogyi mlɩ fɛ́ɛ́ bʋalɛ.
Currently Selected:
2 Tesalonikafɔ 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation