1 Timoteo 2
2
Bulusum Mbla
1Ɩtɔá ndedunka ánɩ́ mlɩgyankpa bwɛ gyi, mlɩkokoli Bulu aha fɛ́ɛ́ nwunsʋ, amlɩbɔ mpaɩ ha amʋ́. Mlɩkʋlɩ Bulu atɔ ha amʋ́, amlɩda mʋ ɩpan ɔhagyiɔha nwunsʋ. 2Ilehian ánɩ́ mlɔ́bwɛ mʋ́ alɩ ha awie pʋ́ ahandɛ ɛ, mɛnɩ asʋtɔ bólwii anɩ, abétsia iwilwiitɔ, atalɩ sum Bulu ɔkpagyiɔkpasʋ. 3Ɩnɩ bʋ alɛ, anɩ Nkpa Ɔhɔpʋ Bulu tekle nɩ. 4Tsufɛ odekleá ɔbɔ́hɔ aha fɛ́ɛ́ nkpa, mɛnɩ bɛ́bɩ ɔnɔkwalɩ amʋ. 5Bulu ɔkʋkʋnʋ ɔkʋlɛ bʋ ɩnʋ. Nsɩnɛ ɔlapʋ ɔkʋlɛ pɛ ɛ bʋ Bulu mʋa anyankpʋsa nsɩnɛ. Mʋgyi Kristo Yesu, ogyi nyankpʋsa amʋ. 6Mʋlesi mʋ nkpa ha pʋhɔ aha fɛ́ɛ́ nkpa. Asʋn anfɩ Bulu lɔpʋha ɔyɩ fɛ́ɛ́ mʋ́ brɛ wanklaantɔ nɩ. 7Ɔnɔkwalɩ ndɛ mlɩ bla, mmɛdɛ afunu wa. Ɩnɩ sʋ Bulu lɛlɛ mɩ ɔbɛɛ, mbwɛ mʋ asʋn ɔkan ɔdapʋ, mʋ sumbi ɔyɔpʋ pʋ́ osunapʋ ha aha ánɩ́ bʋmegyi Yudafɔ, mɩ ambla amʋ́ ɔnɔkwalɩ asʋn tsu Yesu hogyi ɩwɩ nɩ.
8Ndekleá ɔpasua kugyikʋtɔ a, ayin ánɩ́ amʋ́ ɩwɩ lɛtɩn bʋtsu ɩbɩ fʋa bɔ mpaɩ. Ɔblɔ ntɛ nwɛngyi mátsia amʋ́tɔ. 9Atsɩ amʋ ɛ bʋdɩda tati ɔkpa wanklaansʋ. Amʋ́ atɔ dɩdahɛ máwɔ ansibi. Bʋmádʋn imi bwɛ, wa sika atɔ, dɩda atatiá ɩbʋ ibia dʋbɩ. 10Atsɩá bɛɛ bʋtenya Bulu ifu bʋbwɛ yile. Mʋ́ ɔbɛ́ha bɔ́wa akɩlɛ nɩ. 11Ilehian ánɩ́ bétsia asɩ diin, ba ɩwɩasɩ suan atɔ. 12Mmɔkʋha atsɩ ɔkpa mbɛɛ, bʋsuna ayin atɔ, ntɛ bʋgyi ayinsʋ. Mboun bʋtsia diin. 13Tsufɛ Adam Bulu legyankpa bwɛ asa ɔlɔbwɛ Hawa. 14Megyi Adam ɛ Satan lɛmlɛ, mboun Hawa ɔlɛmlɛ, ɔlɔkʋsʋ lɩɩ Bulu mblasʋ. 15Tamɛ Bulu ɔbɔ́hɔ ɔtsɩ nkpa tsʋn ɩkwɩɩsʋ.#2:15 Tsʋn ɩkwɩɩsʋ, ntɛ Tsʋn mʋ abi kwɩɩhɛsʋ. Idesuna ánɩ́ Tsʋn obiá ɔtsɩ amʋ ɔbɔ́kwɩɩsʋ, ntɛ tsʋn Yesu ɩkwɩɩsʋ. Nɩ ɔlɛtalɩ kɩta mʋ hogyi pʋ́ mʋ abadwɛtɔ, ɔlɛha mʋ ɩwɩ lɛtɩn, oletsia nkpa ɛ wanklaan.
Currently Selected:
1 Timoteo 2: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation