Rufu 4
4
Bohazi Rufu Na Simem
1Anịtẹso Bohazi nwẹnị ogigo-ḅọkọ mẹ mum, tẹ anịjụ lẹgị-sime. Ḅụụ-palị mịnaḅọ ḅe tẹ Bohazi ḍuko sime ḅọ ḅe nwẹnị anịjụ ḅo, tẹ anieḅụ Bohazi nwẹnị ḅẹẹ, “Ị̀ ikiaḅọ, tọrụ pịkị akaka daa, tẹ mịanga lẹgị-simee.” Tẹ ọ̀ nwẹnị tọrụ pịkị akaka da tẹ lẹgị-sime. 2Ọ̀ nwẹnị opu ama mẹ ḅẹ omongiapụ ma ḅụ oyia apụ ọkị tẹ ḅẹẹ, “Ọ́ mịanga lẹgị-simee.” Anieḅụ ịn nwẹnị lẹgị-sime. 3Anịtẹso ọ̀ nwẹnị ḅụụ-palị-mịnaḅọ ḅe ḅẹẹ, “Nahomi ma tẹ Mohabụ ḅẹ sịẹ mẹ ḅụ pịkịma-ḅo tẹ ḅọ ma kiri mẹ tẹ sime wamịna mịnaḅọ Ẹlịmẹlẹkị pịrị kiri mẹ dẹrịarị. 4Anieḅụ à kuromam arị anị gbolomaye ḍuko ị́ pịrị ḅa, tẹ ḅẹẹ ḅa, arị apụ ma tẹ mịanga lẹgị-sime wararị apụ ma na, ị̀ atomi ma ḅẹ omongiapụ ma na sime anga ḅụ anị fẹẹ, ị́ anị pakịrị ọkị ḅarị ḅẹḅẹ anị pakịrị ọkịị. Kụma ị́ anị pakịrị ọkị ḅịa ḅẹḅẹ, ḍuko ị̀ pịrịị, mịẹtẹ arị anị nimi ḅẹ ḅara, kẹ gotẹ ọkọ ḅẹẹarị, í sikima kụma anị pakịrị ḅẹ ḅọ ofori, anịsakị yẹrị ị́ palịm.” Tẹ ọ̀ nwẹnị ḅẹẹ, “Arị anị pakịrị ọkị ḅa.”
5Anịtẹso Bohazi nwẹnị ḅẹẹ, “Í Nahomi ḅara ḅụ ḍụọ mẹ fẹẹ ene, mie ị́ pịkị Rufu, Mohabụ ḅẹ diḅọ-fịtẹ-ẹrẹḅọ ma sọ fẹarị ene, mịẹtẹ fịtẹ-ḅọ ḅe ẹrẹ mẹ ḅarị ọ̀ nyana ye ḅụ faa ḅịa ḅara.”
6Anịtẹso ḅụụ-palị-mịnaḅọ ḅe nwẹnị ḅẹẹ, “Ọkọ ḅẹḅẹ àrị inetẹ anị pakịrị ọkị ị̀ ḅụụ pịrị ḅịa, anieofori à ḅofa ì soku ḅụ à nyana ye ḅụụ-fụkama. Ị́yẹrị sime ị̀ pịrịtẹ à pakịrị ọkị ḅẹ ye mẹ ọkịị, kẹ gotẹ ọkọ ḅẹẹarị, àrị inetẹ anị pakịrị ọkị ḅịa.”
7 #
Dit 25.9
Mịọkụ mie elemu sakị ḅụ Izirẹlị ḅụ ye pakịrị ọkị na, gberie kẹ jen ye ḍima ọkị gbolomaye mịẹ-mịẹ ḅara; kẹ miemẹ gbolomaye mịẹ kụrọma ḅụ, anịḅẹ gbọrụḅọ ọ̀ ḅụọ sime okuro siin tẹ anị kẹ osi-ḅọ ḅe pịrị pịrịm; mị ḅara mẹ mie ịn kẹ Izirẹlị ḅụ anị ḍie-pakamarị ḅara.
8Anieḅụ ḅụụ-palị-mịnaḅọ ḅe, “Anị fẹẹ ị́ ḅụụ pịrịị” kẹ Bohazi ḅẹẹ tẹso, ọ̀ nwẹnị ori okuro sin tẹ kẹ Bohazi pịrị. 9Anịtẹso Bohazi nwẹnị omongiapụ ma na, tomi mamgba na ḅẹẹ, “Ọmịnị anie mịmgba ḅẹrẹ kịrị sime apụ, mịnẹ Nahomi ḅara ḅụ á sime Ẹlịmẹlẹkị pịrị aị mamgba na, sime Kilọnị na, Malọnị na pịrị aị mamgba fẹẹ ọkị fama tẹ. 10#Dit 25.5,6Rufu, Mohabụ ḅẹ diḅọ-fịtẹ-ẹrẹḅọ, Malọnị ta ma sọ àrị á fẹẹ ọkị ị̀ ta sọma tẹ, kẹ mịẹtẹ fịtẹ-ḅọ ḅe ẹrẹ mẹ ọ̀ nyana ye ḅụụ sime gbamaso tẹ ḅarị ori amịnapụ ma ogboku ḅụ na, ọ̀ paka anga mẹ ḅẹ ogigo-ḅọkọ mẹ na ḅụ pẹlẹ-so ḅịa ḅara; ọmịnị anie mịmgba ogbo-sịẹapụ.”
11 #
Suk 29.31
Anịtẹso tomi mamgba tẹ ogigo-ḅọkọ mẹ ḅụ sime apụ ma na, omongiapụ ma na nwẹnị ḅẹẹ, “Wamịnị anie ogbo-sịẹ apụ. Yee KỊNỊNYANAḄỌ ḅe ẹrẹḅọ ma tẹ ị́ warị mẹ ḅio sọ-ḅoarị ḅọ ma mịẹ tẹ á Resẹlị na, Liya na tẹ gbolomatẹ Izirẹlị warị mẹ nama pakama-ḅo apụ ma sime-ḅara sime. Yee ị́ Ẹfịrata ḅụ lolo-kama, tẹ Bẹtịlịhẹmụ ḅụ kụn nyana. 12#Suk 38.27-30Anịsakị yee ị́ furo-ḅẹ-apụ Pẹrẹzi, oriḅe tẹ Tama iyi Juda pịrị ḅọ ḅe furo-ḅẹ-apụ sime-ḅara sime, KỊNỊNYANAḄỌ ḅe kẹ ma iriawọ ma ḅụụ ḅụ ị́ pịrị ḅarị awọmẹ sịḅị gotẹ.”
Bohazi Na Ọ̀ Ḅụụ Ḅụ Paka-ḅo Apụ Na
13Anieḅụ Bohazi Rufu ọkịm, tẹ á ḅo ọ̀ ta sọm; tẹ ò so á ḍọkụma-mum, tẹ KỊNỊNYANAḄỌ ḅe sime-kọn kẹ á pịrịm, tẹ á gbọrụ owiḅọtụḅọ iyim. 14Ama mẹ ḅẹ ereme ma nwẹnị Nahomi ḅẹẹ, “Boma sime kẹ KỊNỊNYANAḄỌ ḅe pịrịị, oriḅe tẹ mịmgba ḅụ taa-owiḅọtụḅọ tẹ ḅụụ palị mịnaḅọ sọ kẹ ị́ pịrị ḅarị ḅọ kẹ ị́ pịrị ḅọ ḅe; anịsakị yee ori ẹrẹ Izirẹlị ḅụ ereso wasama! 15Yee ḅị tụḅọ ḅe í ḍumo kụrọma, pịkị í omongi sakị ḅụ í ḍikiḍiki ḅọ sọ, kẹ gotẹ ọkọ ḅẹẹarị, ị́ Owiḅọtụḅọ ta tẹ ị́ ḅẹlẹma tẹ í ḅụụ sọnọma owiapụ-awọmẹ nẹngị ḅọ ma árị iyi tẹẹ.” 16Anịtẹso Nahomi nwẹnị tụḅọ mẹ ọkị tẹ kẹ á kuḅu-ḅio suu, tẹ ò ḍikiḍikiḅọ sọm.
17Ini na kpeki tẹ angarị ereme ma nwẹnị gbọrụ ẹrẹ kẹ ò kuro, ini mẹẹ, “Ịn gbọrụ owiḅọtụḅọ iyi Nahomi pịrị tẹ.”
Ini Obẹdị kẹ ẹrẹ kẹ ò kurom. Ḅị Obẹdị ḅe anie Jese ḍa, anịsakị Jese anie Devidi ḍa ḅe.
18Mịọkụ mịna apụ ma anie Pẹrẹzi ḅụụ ḅụ paka-ḅo apụ ma: Pẹrẹzi anie Hẹzịrọnị ḍa; 19Hẹzịrọnị Ramụ iyim; Ramụ, Amịnadabụ iyim; 20Amịnadabụ, Nasọnị iyim; Nasọnị, Salimọnị iyim; 21Salimọnị, Bohazi iyim; Bohazi, Obẹdị iyim; 22Obẹdị, Jese iyim; anịsakị Jese, Devidi iyim.
Currently Selected:
Rufu 4: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria