Egberima-Ẹkwẹn 22
22
1Ị́ nwẹnị iḅi-ereso na pẹrẹ na ḅụ gberie sẹlẹ ọkị ḅarị ḅẹḅẹ, iḅi-ereso sẹlẹ-ọkịị.
2Ngọ-kọnḅọ na igoinḅọ na gberie nyana gboloma wararị: KỊNỊNYANAḄỌ ḅe ini maa apụ ma tẹmẹm.
3Sịḅịḅio nyana apụ ḅoarị ḅụụ-fụka ẹrị tẹ anị kọkọrọ ḅa, kụma ḅẹrẹ kuroma-kuroma-a ḅọ tọrụ-gelegele mẹnjị mu anị ḅio sọ tẹ ọḅụkọ tiye-ì-gbo ḅẹẹ ḅa.
4KỊNỊNYANAḄỌ ḅe ḅịḅịpoki, ḅụụ-iderima, tẹ ị́ ngọ na, kụn na nangwọ ḍumo na nyana ḅa.
5Í í ḍumo ḅẹlẹmarị ḅẹḅẹ, etela akaka ḅụ si-sịḅịḅio-sụapụ ma kuun-sịẹma-sịẹma ḍiein ma ḍiki ḅụụ-kịẹn. 6Tụḅọ ḍumo kọn na-iḅi ḅara kẹ mḅọ toluma tẹ mḅọ ḍumo mẹmgba ḅụ mḅọ anị kẹ ḅiokoroma ḅa.
7Igoin wararị apụ anie ngọ-kọn wararị tomḅọ ḅe omoniapụ; igbigi ḅọlọọ, tẹ igbigi kẹ kịnị ḅọlọ-ḅọlọ ḅọ ḅe omoniḅọ sọọ. 8Ị́ kịnị inoma ḍiḅiarị ḅẹḅẹ, opu ḅụụ-fụka puu-paka-ḅo ḅa, tẹ ị́ kẹ osi-apụ ponomarị ye mẹ kunoma ḅa.
9Ḅara sarasara tẹ ị́ fịye kẹ igoin-apụ ma na ḍiya. Í boma nyana gbamaso ḅa.
10Ḅụụ-gelemarị ḅọ ḅụ ị́ ḅụụ sikimaa, anịtẹso, nụnụa na, kamụ-sọ na, anịanịa ẹrẹ sịn na ḅarị jen kẹ paka ḅịa.
11Ị́ kpaịntẹ ḅioḅẹngbọ na iḅi ẹkwẹn na ḅẹlẹmarị kụma amadaḅọ ḅe í ikiaḅọ sọ ḅa.
12KỊNỊNYANAḄỌ ḅe mịẹ tẹ karakara mẹ kpaịn simearị, iruo ẹkwẹn ma sime-ḅara ḍie-pakama ḅụ.
13Kọrịnama ḅụụ-lọkọ nyana wararị ḅọ warị ḅio simearị; ori mẹ ọkụkụ ò kun ḅa ọ̀ paka mu kụma.
14Sẹfị anie ḍiein — anị kuun-sịẹmarị apụ anie KỊNỊNYANAḄỌ ḅe ịganị pịrịarị apụ.
15Papaa ofori-ofori amịẹaị sime kala awọmẹ pịrịm, kụma iḅi fomu ye anị sime-ḅara mẹ kan-siin ḅa.
16Í ḍiepịrị-aị kẹ ngọ-kọnapụ ẹrẹ pịrị, anịanịa igoin-apụ ma ponoma, tẹ ngọ-kọn-arị ḅẹḅẹ, í ḅioju sọ igoin ḅa.
Nimi Ẹkwẹn Suei Ma
17Pokii, tẹ à ye-nimi atomi ḍuko ye kẹ í toluma ḅa. Ịna atoluma-aị ma ḍawọọ, 18tẹ í ḅioḅẹlẹ ḅa ị́ arị kẹ ḅiokoroma tẹ arị goo-pakama ḅarị ḅẹḅẹ.
19À ḅiiarị ị́ Tamụnọ kẹ ḅiokpọma. Anie mie à gotẹ arị ḍuko ị́ pịrị ḅẹ-yearị mịọkụ. 20Àrị ẹkwẹn suei kẹ koroma ị́ pịrị tẹẹ. Arị ḅio ḍawọye na iḅi ḍuko-toluma ye na emi, 21tẹ arị karakara mẹ sime iḅi ḅara kẹ í toluma ḅa. Anịtẹso ini ị́ fịrịma pakama mu anị ḍọkị ḅẹ sakị ị́ karakara pakịrị-ḅịḅị mẹ ọkị-ḅo ḅa.
1
22Igoinḅọ ḅe inoma ma, í inetẹ ḅa kịngẹ gotẹ ḅarasụa-pịrịḅọ ofori apụ ma inoma ma ḅẹrẹ-siri ḅụ. 23KỊNỊNYANAḄỌ ḅe ịna aḅịḅị pakịrị tẹ ịna ḍumo ẹrẹmarịḅọ-ẹrẹmarịḅọ nye ẹrẹma ḅa.
2
24Owi ḅioḅẹngbọ na kụrọ-kụrọ amịẹaị na ḍumo nyanaḅọ na ikia-sọ ma. 25Ẹbịsịya ị́ ịna ye-mịẹ aḅara ḍawọ tẹ ḅarị inetẹ ḍima ḅịa.
3
26Minini tẹ jụmọ fị saa onyo-sẹịn ma. 27Í inetẹ gbẹẹ-a so kụma ini í iḅila ọkị-so ḅa.
4
28Gbala-gbala elemu sakị kụra ḅio í elemu aḍapụ sụa koroma oke elekima mẹ siin ma.
5
29Iḅi ḅara kẹ kọrịnama kọrịarị gbọrụ tomḅọ kẹ ì ḍie, tẹ arị iḅi tọnwa-apụ nẹngị tẹ amadapụ ogboku sime gbẹẹ ḅọ kẹ í ḍie ḅa.
Currently Selected:
Egberima-Ẹkwẹn 22: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria