Matiyo 19
19
Jizọsị Siya Gbolomaye Tolumam
(Mak 10.1-12)
1Jizọsị ò ḍuko sime aị ma ḍuko fama tẹso, ọ̀ Galili ḅụ so Jodanị Tọrụ saḅa-koro ḅụ Judiya ibe mum. 2Opu tomina-ogbo-ogbo ò ḍuka mu tẹ ọ̀ pịkị ịna ḅụ obi apụ gwọm anịanga ḅụ.
3Farịsiiapụ ma ḅẹ apụ ọ̀ dama-ḅo tẹ ọ̀ ḅịḅị paka ḅẹ ye ḍọkị gotẹ, ò gbelam, “Wamịna Oloko mẹ anị minini owiḅọ pịrị, mịnẹ ọ̀ ta kẹ ọ̀ mịẹ si, mịẹ si, ò ḅii-ḅii ori inetẹ á siya ḅẹ?”
4 #
Suk 1.27; 5.2 Kẹ ịn pakịrị ḅụ Jizọsị nwẹnị gbela, “Fịafịa Ḍiri mẹ ḍuko ye ó go-a, mịnẹ ye sukuyọ-saakị ḅụ tomi ma Tẹmẹḅọ ḅe, owi na ịyọrọ na mie ọ̀ tẹmẹ ye ḅara? 5#Suk 2.24Tẹ Tamụnọ ḅẹẹm, ‘Miemẹ ẹrẹsị owiḅọ ḅe amịna ḍaḅọ na, iyingiḅọ na koroma so tẹ mu amịna taḅọ na oḅoloma ḅa, tẹ ini maa apụ ma gberie mịẹ ḅa.’ 6Mie ḅụ ini ḅarị maa apụ-a, kụma gbọrụḅọọ. Ọkọẹrẹsị Tamụnọ kpọọ gboloma tẹ apụ ma tomḅọ in puama.”
7 #
Dit 24.1-4; Mat 5.31 Farịsiiapụ ma nwẹnị ò gbela, “Ọkọ ḅẹ kụma, Mozizi tiegotẹ oloko sụa mịnẹ owiḅọ siya ḍiri kẹẹ tẹ kẹ amịna taḅọ pịrị tẹ á ḅẹẹ tẹ á so?”
8Jizọsị nwẹnị pakịrị, “Mozizi gotẹ ọmịnị ọmịna ereme siya minini ọ́ pịrị ye, ọmịnị ma ye kẹ ó tolumaḅọ ḅụụ-fụkama ḅakam. Kụma tomikiri mẹ tarị tẹmẹ sakị ye ọkọ sime-a. 9#Mat 5.32; 1 Kọr 7.10,11Ọkọ ẹrẹsị, à ḍuko ọ́ pịrịarị, mịnẹ owiḅọ tẹ amịna taḅọ siya ḅọ, siya ḅọ, á jen owiḅọ na kọn na-iḅi-a mẹnjị kọn sikima, mḅọ jen ẹrẹḅọ sime-sime, mḅọ sẹfị tẹ.”
10Ò ḍukamẹnjịapụ ma nwẹnị ọ̀ ḅẹẹ, “Mie owiḅọ na amịna taḅọ na ogboku ye sime-ḅara ḅẹḅẹ, ẹrẹḅọ sime-a iḅi ẹrẹḅọ sime nẹngịm.”
11Jizọsị nwẹnị pakịrị, “Mị tolumaye mẹ sime ḅẹḅọ-ḅẹḅọ pịrị-a, kụma Tamụnọ anị kẹ pịrị apụ kịngẹ mie anị sime pịrị ye. 12Kẹ gotẹ ọkọ ḅẹẹarị, tomi gotẹ inetẹ ere-sime ḅịa aị kịrị-kịrị wararị: ja apụ ini iyi ḅara ḅụ ini ẹrẹḅọ sime ḅịa; ja apụ ịna pembema atomi ere-sime ḅịa ḅara mẹ kẹ ịn wẹrịm; tẹ ja apụ Tamụnọ Ama-da mẹ gotẹ amịna ḅụụ kẹ ere-sime ḅịa ḅara mẹ wẹrịm. Yee inetẹ mị tolumaye mẹ ọkị ḅẹ ḅọ anị ọkị.”
Jizọsị Kala Awọmẹ Bomam
(Mak 10.13-16; Luk 18.15-17)
13Kịnị nwẹnị ḍọkọḍọkọ-awọmẹ kẹ Jizọsị pịrị tẹ ọ̀ ḅara kẹ ịna ọgọnọ gbana tẹ tẹkẹ ịn pịrị ḅẹ ḅo, kụma ò ḍukamẹnjịapụ ma tomi ma ḍiki-ịganịm. 14Tẹ Jizọsị nwẹnị ḅẹẹ, “Yee awọmẹ ma ị̀ ḍọkụma-ḅo, ọmịnị in kiki ma, kẹ gotẹ ọkọ ḅẹẹarị, Tamụnọ Ama-da mẹ anị sime in sime-ḅara ḅẹ atomi pịrịm.”
15Tẹ ori amịna aḅara kẹ ịna ọgọnọ gbana fama tẹso, ọ̀ nwẹnị mẹnjị so.
Ngọ-Kọnḅọ Ḍumo Gbamaso Ḅẹ Ḅara Gbelam
(Mak 10.17-31; Luk 18.18-30)
16Gbọrụ sakị, gbọrụ owiḅọ Jizọsị ḍọkụma-ḅo tẹ ò gbelam, “Ye-tolumaḅọ, à tọ iḅiye mịẹ tẹ sime gbamaso ḍumo nyana ḅẹ?”
17Jizọsị nwẹnị pakịrị, “Í tiegotẹ iḅiye gbolomaye kẹ ì gbelarị? Gbọrụḅọ ngẹrị anie Iḅi-ḅọọ. Oloko mẹ tọn koroma aị ma mịẹ, í ḍumo ḅio sọ ḅẹ-ḅiiarị ḅẹḅẹ.”
18 #
Pks 20.13; Dit 5.17;
Pks 20.14; Dit 5.18;
Pks 20.15; Dit 5.19;
Pks 20.16; Dit 5.20 Ọ̀ nwẹnị gbela, “Oloko ma ḅọrọ tọ-aị?” Jizọsị nwẹnị pakịrị, “Kịnị-ḅa ma; sẹfị ma; furu ma; iruoye kẹ gbọrụḅọ sịḅị sọ sẹịn ma; 19#Pks 20.12; Dit 5.16; Lẹv 19.18ị́ ḍa na í iyingi na kụụn; tẹ pịkị ị́ ị́ ḅụụ ḅẹlẹma ḅara kẹ ị́ na kpeki tẹ anga ḅọ ḅẹlẹmaa.”
20Asatụḅọ ḅe nwẹnị pakịrị, “Ma oloko mamgba ị̀ kala-sakị kụra-ḅio à kokoarị. Jen tẹ ị̀ ḅara kọntẹ à mịẹ na-iḅi ye tiye?”
21Jizọsị nwẹnị ọ̀ ḅẹẹ, “Ị́ kara-gbasị ḅẹ ḅiiarị ḅẹḅẹ, ị́ nyana aị mamgba dẹrị tẹ igbigi mẹ kẹ igoin-apụ ma pịrịị, anịsakị í So-ḅio ngọ nyana ḅa; anịtẹso ḅo tẹ ì ḍukamẹnjịị.”
22Asatụḅọ ḅe miemẹ naa sakị ò kururu na mẹnjị som, ọ̀ kpọma ngọ-kọn lamam ẹrẹsị.
23Anịtẹso Jizọsị nwẹnị ò ḍukamẹnjịapụ ma ḅẹẹ, “À mịẹtẹ ó nimiarị mịnẹ ngọ-kọn apụ ḅo Tamụnọ Ama-da suku-ḅio simearị atomi sọ mẹ ḅụụ-fụkama ḅara ḅakam. 24À pịkị ḍukoarị mịnẹ ngọ-kọnḅọ ḅo Tamụnọ Ama-da suku-ḅio simearị tomḅọ sọ mẹ, ḅụụ-fụkama ike-sụa-nama laga tọrụngbọ ḅụ tolu-ḅọrọ nẹngịm.”
25Jizọsị ḍukamẹnjịapụ ma miemẹ naa sakị, anị kpọma ịna ḅụụ-buamam. Ịn nwẹnị gbela, “Ọkọ kụma tụḅọ inetẹ ḅọrọma ḅẹ?”
26Tẹ Jizọsị da-da in ḍiki tẹ pakịrịm, “Miemẹ tomi ḅụụ anị inetẹ mịẹ ḅịa ḅara sime wararị; Tamụnọ ḅụụ kụma, ye goyegoye inetẹ mịẹ ḅa.”
27Anịtẹso Pita nwẹnị ẹkwẹn pakama. Ori mẹẹ, “Ḍikii, wa ye goyegoye ḅụ ḅara-siin tẹ í ḍukamẹnjị tẹ. Wamịnị nyana ḅarịye ḅọrọ tiye?”
28 #
Mat 25.31;
Luk 22.30
Jizọsị nwẹnị ịn ḅẹẹ, “À mịẹtẹ ọmịnị inetẹ nimi ḅa, mịnẹ Ḅo-ḅarị Ịwọ sakị mẹ, tẹ Tomḅọ Tụḅọ ḅe ori ebube emine ọgọnọ lẹgị ḅarị sakị mẹ ḅụ, ọmịnị ì ḍukamẹnjị oyi maa apụ finji ma sọ, ọkọ kẹ ọrụ emine, emine ọgọnọ lẹgị tẹ Izirẹlị ḅẹ oyi, maa afuro finji ma kọn ḅa. 29Tẹ ḅẹḅọ-ḅẹḅọ tẹ amịna awarị, anịanịa owiapụ-amịnapụ, anịanịa eremịna amịnapụ, anịanịa ḍaḅọ, anịanịa iyingiḅọ, anịanịa awọ, anịanịa amịna akiri wẹrịso tẹ ì ḍukamẹnjịḅọ, arịḅẹ kiri sọnọa si nẹngị ye nyana ḅa, tẹ Tamụnọ pịkị sime gbamaso ḍumo kẹ mḅọ pịrị ḅa. 30#Mat 20.16; Luk 13.30Kụma tọnwa-apụ tẹ mịọkụ tarị apụ ma ḅo kunoma apụ sọ ḅa, tẹ tọnwa-apụ tẹ mịọkụ kunoma apụ ma ḅo tarị apụ sọ ḅa.
Currently Selected:
Matiyo 19: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria