Jemụsị 3
3
Ḅịḅị Ḅio Ḅẹ Ḅẹlẹ
1Ị̀ amịnapụ, ọmịna ḅụ ḅẹ tọnwa-apụ ye-tolumapụ sọ ḅẹ ḍọkị ma. Ọmịnị sọ nimi ḅara ḅụ, ịn kẹ wamịnị ye-tolumapụ ma kọn-arị ḅara kụrọ osi apụ nye nẹngịm. 2Wamịnị-mgba sakị mamgba mịẹ-irima nyanarị. Kụma tomḅọ mḅọ ẹkwẹn-arị ye ḅụ mịẹ-irima-ye nyana-a ḅẹḅẹ, anị tomḅọ mẹ mḅọ iḅi fama tẹ ḅọ sọ tẹ, mḅọ pịkị inetẹ mḅọ bebe ḅụụ mẹ ọlọ-sịẹma ḅa. 3Wa ye kẹ asụ sịḅị kpọọ tẹ anị ḅụ ḅẹ kala anga kẹ ọ̀ ḅịḅị kpọọarị, anị ḅụ mie wa ọ̀ mịẹ tẹ ọ̀ wa ḅii anga muarị ye. 4Anịanịa, ḅekina-arụ kẹ tọnma; arụ mẹ ḍụḅa la ḅara na kụrọ fẹrụ kẹ anị dogi mẹnjịarị ḅara na sọ, lẹmụ kalịye mie anị ḅẹ ḍukuno-fẹịn tẹ anị ikelekele-a tẹ arụ-dọkụḅọ ḅe ḅii anga muarị. 5Anie anị kẹ ḅịḅị ḅio ḅẹ ḅẹlẹ mẹ na sime ḅara: anị ịrụ lama wararị kụma anị kọn-a opu ẹkwẹn ofori, gbala anị tẹịnm.
Pịkị opu piri kẹ tọnma, fịnị-ḅẹlẹ kịngẹ inetẹ bebe piri mẹ dọkịma ḅa. 6Anịsakị ḅịḅị-ḅio ḅẹ ḅẹlẹ mẹ kọrị-fịnị na kịkam. Anị amịna tomikiri, tẹ anị ḅio si, si, si, tẹ wamịna oju ḅio amịna sime-anga nyana wararị, anị nwẹnị anị ḅẹ si mẹ kẹ wamịna bebe oju wasamarị. Anị ḅio kẹngẹma paka-ḅoarị fịnị mẹ fịnị kẹ wamịna bebe sime-ḅara mẹmgba ḅụ sụarị. 7Tomi inetẹ ye kẹ Tamụnọ tẹmẹ wararị osi-aị mamgba toluma ḅo ịyọrọma ḅa — piri-ḅio-ḅẹ anama na, feni na, ikiriarị aị na, inji na. 8Kụma gbọrụḅọ-sọ amụ inetẹ anị ḅara kẹ ye kẹ ḅịḅị ḅio ḅẹ ḅẹlẹ mẹ toluma ḅo tẹ anị ịyọrọma-a. Anị anie si ḅioju, tẹ inetẹ anị ọlọ-sịẹma ḅọ ofori, kịnị ḅaa, ḅaa ye ngẹrị mie anị ḅụ simearị. 9#Suk 1.26Anị mie wa kẹ ịmịẹtẹ kẹ wa Nyanaḅọ, wamịna Ḍaḅọ ḅe ḅẹẹarị, pịkị kẹ wamịna pembema tomḅọ woriarị, Tamụnọ kẹ amịna ḅụụ kịkama tẹmẹḅọ ḅe. 10Ịmịẹtẹ ḅẹẹ ẹkwẹn ma na, wori ẹkwẹn ma na, gbọrụ ḅịḅị mẹ ḅio ọsụma paka-ḅoarị. Ị̀ amịnapụ, anị ọkọ pakama! 11Gbọrụ ngụngụḅa ḅio ḅụ iḅi minji na si minji na paka-ḅo ḅo-a. 12Ị̀ amịnapụ, ịla sịn inetẹ olivu mgbọlụ sụa ḅịa; kụrọ sịn pịkị ịla mgbọlụ sụa sụa-a; fụn ḅẹlẹarị ngụngụḅa, ḅẹlẹarị minji pakama-ḅo ḅo-a.
So Ḅio Ḅo Nimi Mẹ
13Ọmịna ogboku ḅụ ye-nimi tẹ kịnị fiearị ye naarị ḅọ emi? Mḅọ anị ḍie-pakamaa iḅi ḍumo ḅụ, pịkị iḅi amịẹaị tẹ mḅọ ḅụụ iderima na nimi na ḅụ mịẹ tẹ aị na ḅụ. 14Kụma ọmịna ḅioḅẹngbọ ḅụ afana na, ḍiki-ḅioḅu na, jụmọ kẹ ye ḅụ sụa-a na emi ḅẹḅẹ, ó nimi kẹ ḅụụ-boma ḅụ ḅọrọ tẹ si kẹ karakara mẹ mịẹ ma. 15Anị nimi ḅara mẹ So-ḅio ḅo-a, anie tomikiri ḅẹ nimi, tẹmẹ ḅụ ḅẹ ye-a, oru ḅara ḅo nimi. 16Afana na, jụmọ kẹ ye ḅụ sụa-a na paka tẹ anga, ye ọrụtọn-a na ja si ḅara, ḅara na sọ paka tẹ. 17Kụma, arịmgba ḅụ tarị ye, So-ḅio ḅo nimi mẹ anị wamaye nyana-a, anị pịkị dein wararị, gbene, pịkị ikia kẹ kịnị ḍọkị na; ọkụrụkụrụ anị ḅụ ḅin wararị, tẹ anị pakama ḅoarị mgbọlụ anie iḅi amịẹaị; ḅẹrẹ kẹ ḅioḅẹngbọ sụa wẹrị na, mịẹ tomi ḍie na anị nwẹn nyana-a. 18Dein mịẹarị apụ ma dein ḅụ ḍiḅiarị sịn mẹ sụa pakama ḅoarị mgbọlụ anie iḅi amịẹaị.
Currently Selected:
Jemụsị 3: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria