Jemụsị 2
2
Ḅẹrẹ Kẹ Ḅioḅẹngbọ Sụa Wẹrị Gboloma Ḅeri nụnụ Ẹkwẹn
1Ị̀ amịnapụ, wa Nyanaḅọ Jizọsị Kịrayịsị minini apụ ḅara ḅụ, anie ebube KỊNỊNYANAḄỌ ḅe, gbala-gbala ó tomi ẹrị tẹ kẹ ini na mịẹarị aḅara ḅụ ọ́ kịrị pakama ma. 2Kẹ ọkị, ó kobiri wararị anga ḅụ ngọ-kọn tẹ golu na iḅi kapa na ḅiri ḅọ nwẹnị sọ-ḅo, tẹ igoinḅọ tẹ kanị-kanịtẹ kapa sụa ḅọ sọ-ḅo sọ-ḅo, 3ó nimiatẹ ḅiri gbasị wararị ḅọ ḅe ḅẹẹ, “Mịanga simearị iḅitẹịn kiri mẹ ḅụ lẹgịị,” tẹ igoinḅọ ḅe ḅẹẹ, “Anịanga sịẹsimee, anịanịa ḅo mịanga ị̀ ḅụọ-suku kiri-ḅio lẹgịị,” ḅẹẹ ḅẹẹ, 4anie ḅụ ọmịnị ọmịna ogboku kịrị pakama ḅẹrẹ-ḅarasii nyana tẹ, pịkị si akuroma ḅụ ḅo aḅẹrẹkọn kọn tẹ.
5Ị̀ iḅi amịnapụ, ó pokii! Tamụnọ mị tomikiri mẹ ḅẹ igoin-apụ ma sẹlẹ-ọkịm, in ḅo minini ngọ-kọn tẹ ò minini ọ̀ ḅẹlẹma apụ pịrị Ama mẹ nyana. 6Kụma ọmịnị igoin-apụ ḍiki-simarị! Ó ponoma tẹ ọ́ fọnọ ḅẹrẹkọn-apụ tọrọkọ muarị apụ ma tọ apụ? Ngọ-kọnapụ ma! 7Ini mie pịkị ịn kẹ ọ́ pịrị tẹ iḅi ẹrẹ mẹ ḍuko-simarị apụ ma.
8 #
Lẹv 19.18
Ọ́ karakaraye mẹ mịẹarị apụ sọ ḅa, ọ́ Tamụnọ Ama-da tẹ ḅẹrẹtọn-arị anga mẹ ḅẹ oloko mẹ koko, koko, anie Fịafịa Ḍiri mẹ ḅio emi ye mẹ, “Ị́ ị̀ ḅụụ ḅẹlẹma ḅara kẹ ị́ na kpekitẹ anga ḅọ ḅẹlẹmaa.” 9Kụma ọ́ tọrụngbọ kẹ ye ẹrị ḅara kẹ tomi na mịẹ-mịẹ, ó si mịẹ tẹ, anịsakị Oloko mẹ pịkị ḅẹrẹ-pẹlẹ ọmịna ḅara sima ḅa, oloko kan apụ ḅara ḅụ. 10Ḅẹḅọ-ḅẹḅọ tẹ gbọrụ oloko kịngẹ kan ḅọ, mḅọ arịmgba kan tẹ. 11#Pks 20.14; Dit 5.18; Pks 20.13; Dit 5.17Kẹ gotẹ ọkọ ḍukoarị, “Sẹfị ma” ḅẹẹ gbọrụḅọ ḅe mie pịkị ḅẹẹ ye, “Kịnị-ḅa ma.” Ị́ nwẹnị sẹfị-a sọ, ị́ kịnị-ḅaaḅa, ị́ paa oloko kan ḅọ sọ tẹẹ. 12Ọmịnị omoni ḅara-ḅio kịnị pakama-ḅoarị Oloko ḍiki tẹ kọn ḅarị atomi ḅara kẹ ẹkwẹn kọn tẹ pịkị anị ḅara kẹ ye mịẹ. 13Kẹ gotẹ ọkọ ḍukoarị Tamụnọ ọkụrụkụrụ nyana ḅara kẹ ọkụrụkụrụ nyana kịnị pịrị-a ḅọ kọn ḅịa. Kụma ọkụrụkụrụ mẹ kụrọ tẹịnm Tamụnọ ḅẹrẹkọn ḅụ.
Minini Na Kọrịnama Na
14Ị̀ amịnapụ, gbọrụḅọ nwẹnị ḅẹẹm mḅọ minini nyana wararị, tẹ mḅọ amịẹaị ọkọ sime-a kụma tọ iḅi anị ḅụ emi? Anị minini mẹ inetẹ mḅọ ḅọrọma ḅẹ? 15Ọkị mịnẹ mịnapụ ma ḅụ owiapụ, anịanịa ereme emi tẹ sụa ḅẹ akapa na fị ḅẹ fịye na ḅụụ-fụka nyana wararị. 16Anị tọ iḅi kẹ ịn mịẹ ḅẹ ị́ papaa ḅịḅị kẹ ịn ḅẹẹ, “Tamụnọ ó bomaa! Ori ọmịna oḅoku mẹ dee tẹ pịkị ọ́ pịrị fị furo ḅinmaa!” ọmịnị ịn kẹ anga ḅẹ aị ḍọkị ịn pịrị-a kụma? 17Anie anị pịkị sime minini pịrị ḅara: anị ngẹrị emi tẹ kọrịnama anị ḅụ ofori ḅẹḅẹ, anị papaa fịtẹ koro simearị.
18Kụma gbọrụḅọ ḅẹẹ ḅa, “Gbọrụ tomḅọ minini nyana wararị, jụmọ kọrịnama nyana wararị.” Ị̀ pakịrị ḅịḅị anie, “Ị́yẹrị tomḅọ inetẹ kọrịnama ofori ḅara kẹ minini nyana ḅẹ ḅara mẹ kẹ ì ḍie. Yẹrị ị̀ akọrịnama ḅụ ì minini kẹ í ḍie ḅa.” 19Gbọrụ Tamụnọ kịngẹ mie emi ye mẹ í minini? Iḅim! Oru ma sọ minini wararị, tẹ oju sẹkịarị, ḅalafa ḅụ. 20Ị́yẹrị oḅori-ḅọ! Í ḅiiarị jụmọ kẹ í toluma, mịnẹ kọrịnama ḅụ ḅụ ofori minini mẹ anie ye ḅụ ofori ye? 21#Suk 22.1-14Ndẹẹ wamịna atẹngịḅọ Ebira-amụ ḅọrọ tẹ Tamụnọ na kura ḅara? Ori ọ̀ kọrị kọrịnama ḅụ ḅọrọm, anie ori ọ̀ tụḅọ Ayịzịkị kẹ agbamịẹ-anga ḅụ agba mịẹ Tamụnọ pịrị sakị mẹ. 22Ọmịnị inetẹ ẹrị-a? Ò minini na ori akọrịnama na gbọrụ ḅụ mẹnjịm; ori akọrịnama ma mịẹtẹ ò minini bebe ye sọm. 23#Suk 15.6; 2 Pkị 20.7; Ayị 41.8Tẹ Fịafịa Ḍiri mẹ ḍuko ye mẹ ḅo mịẹ tẹ ye sọ tẹ, “Ebira-amụ Tamụnọ mininim, tẹ ò minini nyana ye mẹ ẹrẹsị Tamụnọ karakaraye-mịẹḅọ ḅara kẹ ori ọkịm.” Tẹ mie ḅụ ini Ebira-amụ kẹ Tamụnọ ikiaḅọ sịnm. 24Ọkọẹrẹsị, ọmịnị ẹrị tẹ mịnẹ tomḅọ akọrịnama ḅụ mie mḅọ ḅọrọ tẹ Tamụnọ na kurarị ye, mḅọ minini ḅụ kịngẹ-a.
25 #
Jọs 2.1-21
Anị gbọrụ ḅara mie anị sime Rehabụ, ama-mẹnjị-ẹrẹḅọ ma pịrị ḅara. Á Tamụnọ na kura ḅọ sọm, árị akọrịnama ḅụ, anie arị Izirẹlịapụ kẹ fịrịma tẹ toluma ama mẹ sime-ḅara ḍiki ḅẹ mu apụ ma, da warị suu tẹ pịkị ḅarasụa ịn pịrị tẹ ịn jen etela ḅụ tolu-ḅọrọ so ye mẹ. 26Mie ḅụ, tẹmẹ mẹ ofori oju fịị tẹ ḅara, anie pịkị kọrịnama ḅụụ ḅụ ofori minini sọ fịị tẹ ḅara.
Currently Selected:
Jemụsị 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria