Ayịzaya 63
63
KỊNỊNYANAḄỌ Ḅe Sịẹ-Sịẹ Ma Ḅụ Nyana Owu-ḅara-iḅi
1 #
Ayị 34.5-17; Jer 49.7-22; Izi 25.12-14; 35.1-15; Emọ 1.11,12; Oba 1.1-14; Mal 1.2-5 “Nwẹn kẹ Idọmụ ḅẹ opu Bozara ḅụ sime tẹ ḅoarị ḅọ ḅẹ tụḅọ? Ḅieḅe tẹ awụ tọrụ sụa ye ḅiri ḅụlụ-ḅụlụ tẹ kụrọ na ịnyọ na kẹ gbọnma ḅoarị ḅọ ḅe tụḅọ?”
“KỊNỊNYANAḄỌ ḅe orii, kụrọ nyana tẹ kịnị ḅọrọmarị ḅọ, ori owu-ḅara-iḅi ḍuko wasama ḅẹ ḅoarị.”
2“Tiye ẹrẹsị ò ḅiri ye nwẹn kẹ awụ ḅịyarị, gbala kẹ iru mịẹ ḅẹ girepu-asịnmgbọlụ nanga owiḅọ ọkụ?”
3 #
Mịẹ 14.20; 19.15;
Mịẹ 19.13
KỊNỊNYANAḄỌ ḅe pakịrịarị, “Ị̀ ịganị ḅụ à girepu-asịnmgbọlụ nanga ḅara kẹ sịẹ-sịẹ ma nanga tẹẹ, tẹ gbọrụḅọ-sọ ḅo ḅarasụa ị̀ pịrị-a, arị ịn nangam ị̀ ịganị ḅụ, tẹ ịna ọmbie ị̀ kapa mẹmgba ọmbịmam. 4À tọn-pẹlẹm mịnẹ ì atomi ḅọrọma ḅẹ sakị mẹ ḅo la tẹẹ; anie à fomu-ḅara kẹ si kẹ ịn tọn apụ ma pịrị ḅẹ sakị mẹ. 5#Ayị 59.16Anị ị̀ ḅụụ-buamam à ḍikitẹ ẹrị sakị mịnẹ sime tẹ ḅarasụa ị̀ pịrị ḅẹ gbọrụḅọ-sọ ofori. Kụma ị̀ ịganị ị̀ mịẹ kụrọmam, tẹ yẹrị nwẹnị ḅarana owu-ḅara-iḅi mẹ nyana. 6Ị̀ ịganị ḅụ à bebe sịẹ-sịẹ ma nanga kọsịmam. À nwẹnị ịna ḍumo ọmbie mẹ ọsụma kiri ḅio sara.”
KỊNỊNYANAḄỌ Ḅe Nyana Izirẹlị Pịrị Iḅi
7À KỊNỊNYANAḄỌ ḅe gbarị-gbarị-a ḅẹlẹma ḅẹ ye ḍuko ḅa;
Ọ̀ kọrị wa pịrịtẹ aị mamgba gotẹ arị ò tokini ḅa.
Ọ̀ kpọma Izirẹlịapụ ma boma lamatẹ,
Ori ọkụrụkụrụ na gbarị-gbarị-a ḅẹlẹma na ẹrẹsị.
8KỊNỊNYANAḄỌ ḅe ḅẹẹm, “Ini ma ị̀ atomii; ini oḅori kẹ ị̀ sịn ḅịa.” Tẹ mie ḅụ ori ịn ḅọrọmam, 9ịna tọrụsiẹrị mamgba ḅụ. Enjẹlị-a, kụma KỊNỊNYANAḄỌ ḅe ḅioju mie ịn ḅọrọma ye. Ọ̀ ḅẹlẹma na sịḅị-kụrụkụrụ na ḅụ ori ịn pụkọ-pakamaḅom. Sakị mamgba ori ịn balarị ḅọrọtẹ sakị ḅụ sọ, 10kụma ịn kọngọ-kụrọma ọ̀ pịrị tẹ kururu kẹ ọ̀ Fịafịa ḅụụ ḅio su ḅinmam. Mie ḅụ KỊNỊNYANAḄỌ ḅe ini na fịya-a ḅọ sọ tẹ owu kẹ ịn pakam.
11Kụma ọkọ sọ in Mozizi gboloma ḅọrọtẹ ene ma kẹ ḅiokoromam, anie KỊNỊNYANAḄỌ ḅe fịrịmẹnjịḅọ ḅe, tẹ ịn nwẹnị gbela, “KỊNỊNYANAḄỌ ḅe tẹ tọrụ mẹ ḅụ ori atomi ma sịḅịdapụ ma ḅọrọma ḅọ ḅe mịọkụ ọ̀ tọ-anga emi? Ọ̀ tẹmẹẹ kẹ Mozizi pịrị KỊNỊNYANAḄỌ ḅe ọ̀ tọ-anga emi? 12#Pks 14.21Tụḅọ amịna ebube kụrọtẹ ḅara kọngọ kẹ fịrịma tẹ anị Mozizi ama-ḅara anga sime? Tụḅọ tọrụ mẹ kẹ maaịn puu ịna tọrọkọ mịẹ tẹ ori ereso gbamaso ḅẹ ḅara?” 13Tụḅọ pokolo ayọ ma ḅụ tọrọkọ tarị ịn pịrị? Ḅele tẹ piri-ḅio mangịarị asụ amẹẹ kịka, pụmbụ sọ ịn pụmbụ-a.
14Ḍikiḍikiarị opu anama ọkị tụndụ suku ḅẹ fịye-pakama kiri muarị ye ọkụ, mie ḅụ KỊNỊNYANAḄỌ ḅe ịnyọsara kẹ ori atomi pịrịm. Ori ori atomi tọrọkọ tarị tẹ kụn ọkị-ḅo ori ẹrẹ pịrịm.
Ọkụrụkụrụ na Ḅarasụa na Ḅiiarị Tẹkẹ
15KỊNỊNYANAḄỌ, So-ḅio sime tẹ wa ḍiki, ị́ ị́ fịafịa kiri sime-ḅara na ebube na ḅụ angarị yọ mẹ. Opu bala tẹ ị́ nyana wa pịrị-pịrị ye mẹ tọ-anga emi? Ị́ kụrọ tọ-anga emi? Ị́ ḅẹlẹma na sịḅị-kụrụkụrụ na tọ-anga emi? Wa ḍiki-tọrụsin ma. 16Ị́yẹrị wamịna Ḍaḅọọ. Wamịna elemu aḍapụ, Ebira-amụ na Jekọbụ na ọkọ kẹ wa ọkị-a-o, kụma, KỊNỊNYANAḄỌ, anie wamịna ḍaḅọ, sakị mamgba wa pụkọ-pakamaḅoarị ḅọ ḅe. 17Tiye ẹrẹsị ị́ wa wẹrịso tẹ wa ị́ ḅụụ ḅụ iri-faa? Tiye ẹrẹsị ị́ wa mịẹ tẹ wa kọngọ-kụrọma nwenii tẹ wa ọḅụ pịkị ì gbin? Fịrịmẹnjị ị́ pịrịarị apụ ma sịḅị ẹrẹsị pịkị-ḅoo, sakị mamgba sime ị́ pịrị apụ ma gotẹ.
18Wamịnị, ị́ fịafịa atomi ma, si kẹ wa tọn apụ mie gbọrụ sakị ḅụ wa dee-pakama ye, ịn nwẹnị ị́ fịafịa yọ mẹ nanga ḅọrọ. 19Ị́ kẹ wamịnị na mịẹarị ḅara gbala jen sakị amụ ị́ wamịna ḅẹrẹtọnḅọ sọ-a ye ọkụ, gbala jen sakị amụ wa ị́ atomi sọ-a ye ọkụ.
Currently Selected:
Ayịzaya 63: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria