Ayịzaya 60
60
Tọrọkọ-jụ Sime Jeruselemu Pịrị Ebube
1Jeruselemu, saakị tẹ ịrụa ḅịya ḅara ḅịyaa! KỊNỊNYANAḄỌ ḅe ebube mẹ ḅịya ị́ ọgọnọ sararị!
2Kanakana osi asịẹ ma gbaịn ḅa,
Kụma ị́yẹrị kụma, KỊNỊNYANAḄỌ ḅe bele mẹ ị́ ọgọnọ ḅịya ḅa;
Ọ̀ tọrụkuḅu ḅẹ ḅịya mẹ ị́ na sime ḅa.
3Í bele mẹ sịẹ-sịẹ ma nụnụ ḅo ḅa,
Tẹ ị́ ịwọ ene mẹ ḅẹ ḅaa mẹ amadapụ nụnụ ḅo ḅa.
4Í simearị anga ḍiki-ikelema tẹ pakarị ye ẹrị!
Í atomi ama ḅo ḅẹ tẹ kobiriarị!
Í owiapụ-awọmẹ sụma-jụ sime tẹ ḅo ḅa
Ịn ḍọkọḍọkọ-awọmẹ dogi ḅara kẹ í eremịna-awọmẹ dogi ḅa.
5Í miemẹ ẹrị tẹ ḍereku ị́ ḅụụ ḅio ḅin ḅa;
Anị í ḅioḅẹlẹma ḅarị ḅara mịẹ tẹ í oju jike ḅa
Ịn sịẹ-sịẹ ma ngọ ma ọkị-ḅo ị́ pịrị ḅa;
Abajị mẹ saḅa ḅụ ịna ngọ ma ḅo ḅa.
6Ike-sụa-nama kẹ ogbo-ogbo ḅụ ye-muarị apụ opu ogbo
Midiyanị na Ẹfa na ḅụ sime tẹ ḅo ḅa.
Kịnị Sẹba ḅụ sime tẹ golu na kụnụaị agbamịẹ aị na ọkị-ḅo ḅa.
Kịnị KỊNỊNYANAḄỌ ḅe kọrị tẹ ye mẹ ḅẹ
iḅi-oku mẹ ḍuko ḅa!
7Keda na Nebahọtị na ḅẹ anana mamgba
Ịn kẹ ḅo ị́ pịrị tẹ ị́ kẹ agba mịẹ ḅa
Anie agbamịẹ-anga mẹ ḅụ, kẹ KỊNỊNYANAḄỌ ḅe ḅioḅẹlẹma.
KỊNỊNYANAḄỌ ḅe mịẹ tẹ ọ̀ warị mẹ ebube nyana
tarị aḅara mamgba nẹngị ḅa.
8Mịna arụ ma tẹ nwẹn kẹ gbii-gbiima oḅuto
ḅara kẹ ḅọrọarị aị ma ḅọrọ tọ-aị,
tẹ olosịkịya kịka tẹ pịkị-so ama muarị arụ ma?
9Arị arụ ma anie sụma-jụ ḅẹ amakiri ḅụ sime tẹ ḅoarị aị,
Tamụnọ atomi kẹ ama ḅoarị.
In golu na seleḅa na kẹ ịna ḅụ sụa ḅoarị
Kẹ KỊNỊNYANAḄỌ ḅe ẹrẹ kụn,
Izirẹlị tẹkẹarị Fịafịa Ḅọ ḅe,
Mịẹ tẹ tomikiri ḅẹ asịẹ mamgba amịna atomi kụn-arị ḅọ ḅe.
10KỊNỊNYANAḄỌ ḅe ḍuko Jeruselemu pịrịarị:
Tọrụ nimi-a jen asịẹ ḅẹ apụ ḅo siin í onu ma nama ḅa.
Tẹ ịna amadapụ fịrịmẹnjị ị́ pịrị ḅa.
Ị̀ ịganị ḅụ à fomu-ḅara kẹ ị́ pịrịm,
Kụma mịọkụ arị iḅi tọrụ kẹ í ḍiki tẹ
ọkụrụkụrụ nyana ị́ pịrị ḅa.
11 #
Mịẹ 21.25,26 Eneḅaka na ḍin na ḅụ í onu aḅọkọ ma finji ḅa,
Mịẹtẹ sịẹ-sịẹ ma ḅẹ amadapụ ma
ịna ngọ ọkị-ḅo ị́ pịrị ḅẹ ḅara.
12Kụma fịrịmẹnjị ị́ pịrị ḅịa asịẹ ma
Ịn gbọrsịḅị arị ḅaa guluguluma ḅa.
13Payịnị na, junipa na, Sayịpẹrẹsị na nwẹn
sịn asịn ma ḅẹ ḍụḅọ,
Lẹbanọnị opu apiri ma ḅio ḅo iḅitẹịn aḍụḅọ ma,
Mie ini ọkị-ḅo tẹ kẹ siin ị́ nama ḅarịye Jeruselemu,
Kẹ mịẹ tẹ ị̀ Warị mẹ tọrụ-gbẹ,
Kẹ mịẹ tẹ ị̀ opu ama ebube nyana.
14 #
Mịẹ 3.9
Í ponoma sime apụ ma owiapụ-awọmẹ ma ḅo ḅa
Tẹ tuuideri tẹ kụn kẹ ị́ pịrị ḅa.
Gbọrụ sakị í ḍiki-sima sime apụ mamgba ị́ aḅụọ suku sunsin ḅa.
Ịn kẹ ị́ sịn ḅarịye: KỊNỊNYANAḄỌ Ḅe Opu Ama.
Zayọnị, Izirẹlị Tẹkẹarị Fịafịa Ḅọ Ḅe Opu Ama.
15Ị́ ḅarị jen kẹ sịkị tẹ ḍiki-ḅioḅuarị ḅọ ḅara sime ḅịa,
Kịnị mamgba mangị-so tẹ gbin koro sime wararị opu ama.
Arị mịẹ tẹ ị́ ḍụḅa tẹ iḅi ḅa,
Ḍereku anga, mu ḅẹẹ-sakị ḅẹẹ-sakị la.
16Sịẹ-sịẹ na amadapụ na í ḍikiḍiki ḅa
Gbala iyingiḅọ amịna tụḅọ ḍikiḍikiarị ye ọkụ.
Í nimi ḅa mịnẹ yẹrị KỊNỊNYANAḄỌ ḅe ị́ ḅọrọma tẹ,
Mịnẹ Izirẹlị opu kụrọ Tamụnọ ḅe omoni ḅara ḅio ị́ pakama-ḅo tẹ.
17“Ị́ ojo ḅiiarị anga ḅụ, à golu ọkị-ḅo ị́ pịrị ḅa;
ikulele na ḍụḅọ na ḅiiarị anga ḅụ, à seleḅa na ojo na kẹ ị́ pịrị ḅa; tẹ ḍụḅarị kiri ḅụ àrị ikulele kẹ ị́ pịrị ḅa.
Ị́ ḅẹrẹtọn-apụ ma ḅarị jen kẹ í ponoma ḅịa;
Arị ịn mịẹ tẹ in tomḅọ la kiri kẹ mḅọ pịrị
na dein na kẹ ḅẹrẹtọn ḅa.
18Kịnị ḅarị jen kẹ kụrọ-kụrọ ḅara kẹ ye-mịẹ pọkọ naa ḅịa;
Ḅaa guluguluma ḅarị jen kẹ ị́ sịẹ mẹ ḅẹ ama
kiri mẹ kan sara ḅịa.
Arị onu ye kikima ḅara kẹ ị́ gbaịn tẹ ị́ ḍụa ḅa;
Ị́ ì tokini ḅa yẹrị ị́ ḅọrọma tẹ ẹrẹsị.
19 #
Mịẹ 21.23; 22.5 Ịrụa ḅarị jen kẹ bele sọ ị́ pịrị ḅịa eneḅaka ḅụ,
Anịanịa akalụ mẹ í bele sọ ḍin ḅụ.
Yẹrị KỊNỊNYANAḄỌ ḅe í sime gbamaso bele sọ ḅa;
Ì ebube mẹ ḅẹ bele ḅịya ị́ sarama ḅa.
20Í kururu ene ma ḅo kunoma ḅa, yẹrị KỊNỊNYANAḄỌ ḅe í sime gbamaso bele sọ ḅa,
Ḅịya tọrọkọ-tọrọkọ mu ịrụa na akalụ na nẹngị ḅa.
21Ị́ atomi mamgba kuraye mịẹ ḅa
Tẹ ini amakiri mẹ nyana mu ḅẹẹ-sakị ḅẹẹ-sakị la ḅa.
Yẹrị ịn kẹ ḍiḅim, yẹrị ịn tẹmẹm,
Ì opu mịẹfinji tomi mamgba ḍie ḅẹ ḅara.
22Ịrụ tẹịn tẹ iderima tẹịn furo kịngẹ sọ
Paka-ḅo opu kụrọ nyana tẹ sịẹ sọ ḅa.
Karakara sakị mẹ ḅo la sakị
À mịẹ tẹ miemẹ sarasarama paka ḅa,
Yẹrị anie KỊNỊNYANAḄỌ ḅee!”
Currently Selected:
Ayịzaya 60: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria