Ayịzaya 59
59
Ịkịankoroḅọ Ḅe Tomi Ma Asi Sii la ḅara Ḍukom
1Ó kuroma ma mịnẹ KỊNỊNYANAḄỌ ḅe ori ịnyọ nyana-a kẹ ọ́ ḅọrọma, anịanịa ori iningi ḅaka tẹ ọ́ ḅarasụa gotẹ kọn-arị owu mẹ naa ḅụ! 2Ọmịna asi mie ò gotẹ ọ́ naa-a ye. Ọmịna asi mie ó puu ḅelemarị Tamụnọ ḅụ, ọ́ ḅụụkụrọma tẹ sunsin ọ̀ pịrịarị sakị. 3Ọmịnị iruo tẹẹ, kụrọ-kụrọ amịẹaị mịẹ tẹ pịkị kịnị ḅaa tẹẹ.
4Ọ́ ḅẹrẹ-siri muarị kụma ọ́ ḅẹrẹ karakara nyana-a. Iruo aị ḅụ mie ọ́ sịrẹrẹ wararị kẹ ọmịna ḅẹrẹ ḍuko ọkị. Ọ́ tọn-arị aị tọn-arị aị kẹ ye kẹ ja apụ lama. 5Ọ́ tọn-arị si-aị ma arị si oronwi anyị na kịkam, arị kịnị ḅaarị ḅara ḅụ. Anyị mẹ ḅaa kọsịma, kụma oronwi paka-ḅoarị! Kụma ó ḅịyarị aḅẹrẹ ma kẹ ọ́ mịẹ ḅẹ gbọrụ iḅi sọ ofori; 6arị mịẹye ḅụ sọ-a ḅara anie gbala olokongoḅa warị kẹ ḅịtẹ ḍori mịẹye ḅụ sọ-a ḅara! 7#Rom 3.15-17Sakị mamgba ọ́ gbọrụ siye tọn-arị, tẹ ḅụụ-fụkamam ó koru tẹ anị mị. Mịẹye-ofori apụ ma ḅaa ḅụ gbala-gbala ó ḅio-maaịn-tọn nyana-nyana-a. Ó mu anga mu anga sima na guluguluma na mie ọ́ mịẹ koroma tẹ soarị, 8tẹ gbọrụḅọ-sọ yela-a ḅara sime nyana-a ọmịnị emi anga ḅụ. Ọ́ nyana tẹ mịẹarị ye goyegoye jụmọ inoma ye famam. Sụngụma-sụngụmatẹ etela mie ọ́ mẹnjị-mẹnjị ye, tẹ anị etela mẹnjịarị tẹ ye ḅụụ la-a so ḅarị ḅọ ofori.
Tomi Ma Ịna Si Ḍuko-pakamarị
9Tomi ma mẹẹ, “Mịọkụ wa nimi tẹ Tamụnọ gotẹ wa ponomarị apụ ma ḅara-ḅio wa ḅọrọma-a ye. Wa wa kẹ mẹnjị ḅẹ bele kẹ ḅiotọn-arị kụma kanakana ngẹrị mie emi ye, 10tẹ wa tọrụngbọ-pụụntẹ-apụ ḅara kẹ ḅii ma mẹnjịarị. Eneḅaka-fịafịa-ogbo ḅụ wa pụmbụma-pụmbụmarị, gbala ḍin ọkụ, gbala wa fịtẹ-apụ kanakana tomikiri ḅụ simem. 11Wa tẹmẹ-naịn-naịn tẹ ḅụụ-ḅalaḅalarị; wa ḅii lamarị Tamụnọ ponoma na iri-amịẹaị na ḅụ wa ḅọrọma, kụma gberie-sọ paka-a.”
12“KỊNỊNYANAḄỌ, wa kẹ ị́ mịẹ tẹ asi-aị ḅakam. Wamịna asi ḅẹrẹ kẹ wamịna ọgọnọ gbanarị. Wa arịmgba nimi lama wararị. 13Wa kọngọ-kụrọma ị̀ pịrị tẹẹ, ị̀ sịkị tẹẹ, pịkị ḍụkụ tẹ ì ḍukamẹnjị-a. Wa jen-apụ ponoma tẹ ọḅụ kẹ ì gbin tẹ. Wamịna akuroma ma papaa aị; wamịna ẹkwẹn ma iruo aị. 14In tomḅọ la kiri kẹ mḅọ pịrị dee-siin tẹẹ, tẹ kuraye mịẹ ḅarị inetẹ ḅo kpeki-a. Karakara ama-karakara-ogbo ḅụ mbelembelearị, tẹ anịanga kịnị mingirima-mingirima-a mịẹ gbọrụ kiri sọ ḍọkị ẹrị-a. 15Kịnị mingirima-mingirima-a kalịye sọ ofori, anie mịẹ tẹ ḅẹḅọ-ḅẹḅọ tẹ si mịẹ dasịẹmarị ḅọ mẹ amịna ḅụụ ḍọkị ẹrịarị mịnẹ mḅọ si mịẹ gbo pịrị ḅọ sọ tẹẹ.”
KỊNỊNYANAḄỌ Ḅe Tẹlẹmarị Ori Atomi Pụkọ-pakamaḅo
KỊNỊNYANAḄỌ ḅe miemẹ ẹrị tẹẹ, anị ọ̀ ḅụụ siinm mịnẹ tomḅọ la kiri kẹ mḅọ pịrị ofori. 16#Ayị 63.5Ọ̀ ḅụụ-bua tẹ ẹrịm mịnẹ gbọrụḅọ-sọ ofori ḅarasụa in ponomarị apụ ma pịrị. Mie ḅụ ori ọ̀ kụrọ kẹ ịn pụkọ-pakamaḅo tẹ owu-ḅara-iḅi nyana ḅa. 17#Ẹfi 6.14,17; 1 Tẹs 5.8Ò tomḅọ la kiri kẹ mḅọ pịrị kẹ ọmụḅọ kapa sọma tẹ sụa ḅa, tẹ owu-ḅara-iḅi nwẹnị ọmụḅọ okpoko-sun sọ ọ̀ pịrị ḅa. Ḅio tọn kụrọma tẹ ye kẹ kura ḅara ḅụ wẹrị ọ̀ kapa sọ ḅa, tẹ nwẹnị fomu-ḅara kẹ iri ḅara kẹ kịnị kẹ tọrụsiẹrịarị apụ ma pịrị. 18Si kẹ ọ̀ tọn apụ ma mịẹ ye mie ò ḍiki tẹ fomu-ḅara kẹ ịn pịrị ḅarịye, jen-a jen-a sụma-jụ ḅẹ amakiri ma ḅụ angarị apụ ma. 19Ịrụa mẹ saakịarị yọ ḅụ ọkị mu anị tuuideriarị yọ la, ḅẹḅọ-ḅẹḅọ ò ḍiki ḅalafaa ḅa, pịkị ori opu kụrọ sọ. Ò ḅo ḅarị ḅara owi minji na kụrọ fẹrụ na kịka ḅa.
20 #
Rom 11.26
KỊNỊNYANAḄỌ ḅe ori atomi ḅẹẹarị, “À Jeruselemu ḅo tẹ ọ́ ḍụa tẹ ọmịnị-mgba ḅụ ọmịna si ḅụ pịkị tẹ apụ ma ḅọrọma ḅa. 21Tẹ àrị ọḅọkụ kẹ ọmịnị na fịarị; arị ị̀ kụrọ na ì toluma aị na kẹ ọ́ pịrịarị, arị ọmịna aị sọ mu ḅẹẹ-sakị ḅẹẹ-sakị la ḅẹ ḅara; tẹ mịọkụ sakị tọrọkọ mu ḅụ, ọmịnị ị̀ ḅịḅị poki tẹ ọmịna awọmẹ na ọmịna furo-ḅẹ-apụ na toluma tẹ ini ị̀ ḅịḅị poki ḅa, tọrọkọ-jụ ḅo ḅarị sakị mamgba ḅụ.”
Currently Selected:
Ayịzaya 59: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria