Ayịzaya 48
48
Tamụnọ Anie Tọrọkọ-jụ Paka Ḅẹ Ye Nimi Kụrọ Nyanaḅọ
1Ó miemẹ pokii, Izirẹlịapụ,
ọmịnị tẹ Juda furo ḅụ paka apụ!
KỊNỊNYANAḄỌ ḅe ẹrẹ ḅụ mie ó ye karịarị,
pịkị ọkịarị mịnẹ ó sunsin Izirẹlị Tamụnọ ḅe pịrịarị
kụma ó ḍukoarị ye anie ó fiearị ye anị-a.
2Anịsọ ọ́ paa ḅụụ-boma-boma tẹ ḅarị
mịnẹ ọmịnị fịafịa opu ama mẹ ḅẹ apụ
tẹ ọ́ pịkị Izirẹlị Tamụnọ ḅụ sịrẹrẹarị,
anie Kụrọmamgba nyana KỊNỊNYANAḄỌ kẹ ẹrẹ fị wararị ḅọ ḅe.
3KỊNỊNYANAḄỌ ḅe Izirẹlị ḅẹẹarị:
Ḅọrọtẹ alatẹ sakị à paka ḅẹ ye ḍukom;
anịtẹso ḅiotọn-a ḅara ḅụ à mịẹ tẹ anị pakam.
4À nimi wẹrịm mịnẹ ó ḅo kọngọ-kụrọma-apụ sọ ḅa,
ikulele kụrọ-ḅara kụrọ tẹ ojo ḍụkụ-ḍụkụ-a ḅara mẹ sime.
5Tẹ mie ḅụ alatẹ sakị ḅụ mie à tọrọkọ-jụ í sime
ḅẹ ḅara mẹ ḍuko ye,
mịẹ ḅẹ aị ma ḍuko wasama tẹrẹmẹ arị ḅo kiri ọkịm,
kẹ mịẹ tẹ ị́ ḅarị inetẹ ḅẹ ḅịa ḅara
mịnẹ í oru-afụḅara ma na mḅudu ma na mie
mịẹ tẹ arị paka ye.
6À Ḍuko ḅọrọma tẹ aị ma mịọkụ kiri ọkị tẹ;
ị́ mịẹ-mịẹ jen ọkụ ḅarị ofori tẹ minini
ḅa mịnẹ à ḍuko aị ma kuram.
Mịọkụ à tọrọkọ ḅo ḅarị ịwọ aị ḍuko ị́ pịrịarị,
mịẹ ḅẹ ịwọ aị tẹ jen ene amụ à mịẹfinji ị́ pịrị-a aị.
7Mịọkụ-mịọkụ mie à mịẹ tẹ arị pakarị;
ḅọrọ tẹ sakị ḅụ mie kịkaye paka-a.
Anị pakam namịna, mimgbe ị́ ḅẹẹ tẹ mịnẹ
anị gboloma ye-mẹmgba í nimi wẹrịm.
8À nimim mịnẹ anie ḅioḅẹngbọ kẹ ḅụụ ḅụ gbana ḅẹ ḅọ-a,
anie sakị mamgba kịnị kọngọ-kụrọ ḅọ
ḅara kẹ ì nimi tẹ mẹ.
Anie ẹrẹsị gbala-gbala mie mamgba ị́ naa-a,
anie ẹrẹsị anị ḅẹ ẹkwẹn gbọrụmgbọ-sọ ḅo ị́ aḅeri laa-a.
9“Kịnị ị̀ ẹrẹ tokini ḅẹ gotẹ,
arị ị̀ ịganị dasịẹmarị;
arị anị nụnụ ọḅụ pịrịarị tẹ ị́ ḅaa
guluguluma ḅịa ḅara.
10À tọrụsiẹrịma fịnị ḅio ị́ daaḍiki tẹẹ;
anie in seleḅa kẹ kọrị-fịnị ḅio fọị iḅimarị ḅara.
Kụma à ḍọkị ẹrị tẹ ị́ ḅụụ kẹ ye mịẹ-mịẹ ye ofori.
11À mịẹarị ye mẹ, ị̀ sịḅị ẹrẹsị mie à gotẹ mịẹarị
à ḅarị ḍụkụ tẹ ị̀ ẹrẹ sii ḅịa
anịanịa jen gbọrụḅọ-sọ ị̀ na sọ tẹ ebube nyana,
anie ì ebube ye sime yẹrị kịngẹ pịrị ḅẹ ye mẹ.”
Sayịrọsị, KỊNỊNYANAḄỌ Ḅe Sẹlẹ pakama-ḅo Sịḅịdaḅọ
12 #
Ayị 44.6; Mịẹ 1.17; 22.13 KỊNỊNYANAḄỌ ḅe mẹẹ:
Ọmịnị ì pokii, Izirẹlị, yẹrị sịn ọkị tẹ apụ ma!
Yẹrị Tamụnọ, Tarịḅọ, Kunomaḅọ, ngẹrị Tamụnọ ḅe!
13Ị̀ aḅara kiri mẹ suku-saakịm
tẹ pịkị So ma nụnụ finjimam.
À Kiri na So na sịn kụma,
anị-gbọrụ-kirikiri in tolu-pakarị ị̀ tọrọkọ.
14Ó ḅo kobiri tẹ pokii, ọmịnị-mgba!
Oru-atamụnọ ma ḅụ ḅẹ gbọrụḅọ-sọ inetẹ ḍuko wẹrị-a
mịnẹ à sẹlẹ pakama-ḅo tomḅọ ḅe owu kẹ Babịlọnị paka ḅa
à ḅiiarị ọ̀ mịẹ ḅẹ ye mie ọ̀ mịẹarị.
15Yẹrị anie ẹkwẹn tẹ ọ̀ sịn ḅọ ḅee;
à tọrọkọ-sụn ọ̀ pịrị tẹ ọ̀ kẹ paka
tẹ mịẹ tẹ ye ori na iḅim.
16“Mịọkụ ó ḅo ì kpeki tẹ à ḍukoarị ye naa.
Sukuyọ-saakị ḅụ à kịnị mamgba naa ḅẹ ḅara kẹ ẹkwẹn tẹẹ,
tẹ mịẹ tẹ sakị mamgba ị̀ ẹkwẹn ma paka tẹ.”
(Mịọkụ Tẹịn Ḅẹrẹtọn KỊNỊNYANAḄỌ ḅe ọ̀ kụrọ kẹ ị̀ pịrị tẹ ị̀ fịrịma pakama tẹẹ.)
KỊNỊNYANAḄỌ Ḅe Tọn-koroma Ori Atomi Pịrịye
17Izirẹlị tẹkẹarị Fịafịa Ḅọ ḅe,
KỊNỊNYANAḄỌ ḅe tẹ ọ́ ḅọrọmarị ḅọ ḅe ḅẹẹm:
Yẹrị anie KỊNỊNYANAḄỌ ọmịna Tamụnọ ḅe;
ọmịna iḅi gotẹ ye kẹ ó toluma ḅẹ-ḅiiarị ḅọ ḅe
tẹ ọ́ da-mu ọ́ sọ na-iḅi etela ḅio suuarị ḅọ ḅe.
18“Mimgbe ọ́ paa ì oloko ma poki tẹẹ!
Ọkọ namịna boma-boma ogilolo puu tẹ mẹnjị ḅo ọ́ la tẹẹ
gbala-gbala kụlụkụlụ-kpaịkpaị ḅịa okolo kịka tẹẹ!
Mimgbe owu-ḅara-iḅi ḅo ọ́ pịrị tẹẹ
ḅakụ-ḅakụ ḅo tuḅu ọgọnọ sararị ọnụngọ kịka tẹ.
19Mimgbe ó furo-ḅẹ-apụ ma onwin ḅin ḅara ḅin tẹ
à mịẹ tẹ gbala-gbala kịnị ịn ḅaa guluguluma-a so tẹẹ.”
20 #
Mịẹ 18.4
Ọ́ Babịlọnị ḅụ paka-so, ọ́ ḅarana sịḅị nyana ḅara kẹ so!
Ọmịnị ịba mẹ oloku pakama ḅioḅẹlẹ ḅụ ọ̀ mịẹ
tẹ anga-anga ḅụ kịnị anị nimi:
“KỊNỊNYANAḄỌ ḅe ọ̀ fịrịmẹnjịḅọ Izirẹlị ḅọrọma tẹ!”
21KỊNỊNYANAḄỌ ḅe ori atomi tọrọkọ-sụn tẹ
ọfịrịarị, samụnọtẹ ịkpa ḅio ịn kẹ tolu-ḅọrọ sakị,
in minji pọkọ tarị tọrụsiẹrị ẹrị-a.
Ọ̀ mịẹ tẹ minji ịkụ ḅio paka-ḅo ịn pịrịm,
ori ịkụ puu tẹ minji mẹnjị paka-ḅom.
22 #
Ayị 57.21
KỊNỊNYANAḄỌ ḍukoarị, “Ye ḅụụ la-a sime si-mịẹapụ pịrị-a.”
Currently Selected:
Ayịzaya 48: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria